بو چرخ کج روشین، کج مداری وار آناجان
ولایت اهلینه دائم فشاری وار آناجان
نه بیر منم آناسیز قیز اسیرِ غصّه و غم
هاچان یتیمه لرین اعتباری وار آناجان
بو توزلی زلفیمه مدّتدی دَگمیوب شانه
فقط نسیمِ صبانین گذاری وار آناجان
سرشکیله یووارام غم غبارینی یوزدن
غمونده گوزلریمون جویباری وار آناجان
اگرچه من آناسیز بیر قیزام ولی مندن
حسینیمون آنالیق انتظاری وار آناجان
بیزی بو حاله سالانلار محال راحت اولا
خدای مُنتقمین گیر و داری وار آناجان
گذشت ایله منی گر گَلنمورم زیارتوه
بو امردن قیزوون اعتذاری وار آناجان
بُلَنمورم سنی دفن ایلیوب بابام هاردا
او پاک تربتوین استتاری وار آناجان
نقدر گور منه حسرت نقدر مشکل دور
که هر غریب اُلنین بیر مزاری وار آناجان
گیدَللَه اهل و عیالی اونون زیارتی نه
بو امر شرعدی بیر افتخاری وار آناجان
و لیک تک آنا سَن سَن که قبرون ایتگین دور
بو سرّه بیر آتامین اختباری وار آناجان
اودا گیدَنده گیدر نصف شب، گَلنده ولی
گورن بیلر که دلِ داغداری وار آناجان
نه مدّتی گئجه لر بسترینده گورمه میشم
همیشه دیدهء شب زنده داری وار آناجان
آدون گَلنده بابام اودلی دلدن آه چکر
نه ماجرادی رُخِ شرمساری وار آناجان
گوزینده حلقه وورار گوز یاشی زلال کیمی
غمونده دیدهء گوهر نثاری وار آناجان
گورنده اود اورگی اود دوتار یانار آلیشار
شرارِ آهِ دلِ شعله باری وار آناجان
گورن بیلر که بیزیم آستانه میزده هنوز
همان او کشمکشون یادگاری وار آناجان
محیط جهلدی قان باغلیوب یانان اورگی
بو عالمین اونا بی حد فشاری وار آناجان
آلوبلا حقّین الیندن اولوبدی خانه نشین
گنه بو ظلم لره اصطباری وار آناجان
همان علیدی که ایتمَز هامی عربدن باک
نظامِ ظلمی پوزان اقتداری وار آناجان
قولوندا قدرتی خیبر شکندی وحشتی یوخ
الینده قائمهء ذوالفقاری وار آناجان
و لیک وحشتی وار اختلاف اُمّتدن
نه آیری قصدی نه آیری شعاری وار آناجان
گوزی گوره گوره ارثیّه سی اولوب غارت
کیمین او پایه ده صبر و قراری وار آناجان
دییَر قالوب بوغازیمدا سوموک، گوزومده تیکان
قضای حقّه دلِ برد باری وار آناجان
کسیک الیله ایدوم حمله یا دوزوم دایانیم
علیدی پنجهء دشمن شکاری وار آناجان
و یا یوموم گوزیمی گورمیوم، اولوم اعمی
ایشیق گونوزده اونون شام تاری وار آناجان
گنه گورور ایله صبر ایلَماقدا مصلحتی
صلاحِ شرعدی دین اضطراری وار آناجان
ولی بو صبریله بیر گوهرین فراقینده
ایکی گوزونده دُرِ شاهواری وار آناجان
بو آستانه ده بیر خاکسار دور (خوندل)
زهی شرف بیله بیر خاکساری وار آناجان
امیدی واردی فقط بیر سَنون عنایتوه
نه شعر بافی و نه شاهکاری وار آناجان
- سه شنبه
- 30
- شهریور
- 1400
- ساعت
- 20:21
- نوشته شده توسط
- یوسف اکبری
- شاعر:
-
حاج حیدر خوندل
ارسال دیدگاه