بو خرابه شامیده زینبین باشینی تاپوپدی بلا حسین
ئولورم هرایمه تِز یتیش منه ای امید و رجا حسین
دئمیرم یولون بو دیاره سال، منه داغلی سینه وی داغلا گیت
دئمیرم یوخومدی بیر آغلیان، منه گل بو یرده بیر آغلا گیت
دییورم یولوندا قالان گوزی، گل اوزون بو شهریده باغلا گیت
وئره تا قدوم مبارکین، دل بی قراره صفا حسین
دئمیرم که یوخدی بو شهریده، باشیم اوستونه گَلنیم منیم
دئمیرم اولیدی و یا حسین، بو مکاندا اِیش بیلنیم منیم
دییورم خوشا منیم حالیمه، اولی کوینکین کفنیم منیم
او مین اوخلی کوینکی آلمیشام، اِیلدیم من عهده وفا حسین
بولَه کاش زینب حضوریوی، چیخا تا قباقیوه یا اَخا
سنی پیشواز اِیلیه باجون، وئریله عنایتیوه بها
دم وصلی گورسه اگر گوزوم، تاپاجاخدی داغلی دیلیم صفا
نه اِیدوم نه اِیلورم اولموری، اورکیم فراقه رضا حسین
دییورم اجازه وئریدی شرع، باجیویندا قانی آخیدی کاش
او بلا چولونده و یا غمون، منی یاندریدی یاخیدی کاش
ایله اود دوشیدی وجودیمه، هامی صف چَکیدی باخیدی کاش
ولی گورمییدی نگاریدن، اِیلیوبله یاری جدا حسین
آنام اوغلی نچّه دیاره که، نچه یول دوشوب گذریم منیم
بیری دشت کرب بلادی که، ویروب اود یانوب جگریم منیم
چوخ آغیر مصیبته دوزموشم، اورکیمده وار کدریم منیم
غم اَریتدی جسمیمی شمع تک، قالور اِیندی بیرجه نما حسین
بیریده بو شامِ خرابیدور، که گوزومده گوندوزی شام اِیدوب
من هارا بو شهر خراب هارا، منه وصل یاری حرام اِیدوب
متحیرم که فراقیوه، نجّه قلب خسته دوام اِیدوب
قاپیمیز یاناندان اِیله تاپور، بو بلالی باشی بلا حسین
من او کوه درد و غمم، ولی، منی فرقتون علن آغلادار
سالارام خیالیمه یثربی، یادیما دوشر حسن آغلادار
گه آنام غمی گه آتام غمی، منه آرتیرار مُحن آغلادار
منه ایندی یوخدی بیر آغلیان اوزوم آغلورام عجبا حسین
من او کوه درد و غمم منی، گتیرنمیوب مُحنیم دیله
اولا مین برابر اگر بو غم، اِیلمز خدایه باجون گِله
ولی هجریوه دوزه بولمورم، باشیمی سالوبلا نه مشکله
باجیوین اورکده بو دردینه، سن اوزون گل ایله دوا حسین
او بولود تک ایله دوتولموشام، سببین دئمَم بیله بیلمیرم
ایله حاله درد و غمون سالوب، گوزومون یاشین سیلّه بیلمیرم
ئولوم آرزودی بو دم منه، ئولورم ولی ئوله بیلمیرم
باشیما او سایه وی سالماسان
گینه اِیتمرم گله یا حسین
ای (عتیق) (انور) خوش کلام، او گوزل فصاحتیله مدام
نه یازوب ، یازوب بیزه عشقیله اِیلیوب بو فعلی او گون تمام
سایلور که خلق آرا محترم قلمون او غیره بولوب حرام
اودی که شفیع اولاجاق اونا یِتیشنده وقت جزا حسین
- سه شنبه
- 30
- شهریور
- 1400
- ساعت
- 21:18
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه