گل حسین غربت ولایتده ویرور جان زینبون
سینه سینده اللّری حالی پریشان زینبون
ای منیم آرامِ جانیم جسمیده روحیم حسین
قالموشام طوفانِ غمده گل منیم نوحیم حسین
سن گلن یولّاره قربان قلبِ مجروحیم حسین
گُل جمالون گورمه سه جان ویرمز آسان زینبون
گُل جمالون گورماقی مین لر بهشته ویرمرم
باشیم اوستونده سنی گورسم بولورسن نیلرم
خاکِ پایونده سنه بو جانی قربان ایلرم
تا سنه اولدی هامی بُولسون که قربان زینبون
سن سیز عالمده حسینیم گُوندوزوم گور شب دِگل
دلده کی غم فرقتون دور اوزگه بیر مطلب دِگل
قالموشام نه حاله گَل گور، گوردوقون زینب دِگل
بارِ مُحنتدَن اولوب دور قدّی چُوگان زینبون
قارداش هجرینده توکر رُخساره قان یاش باجیسی
جان ویرنده دیزلری اوُسته قویار باش باجیسی
گَل حسین یالقوز ویرور جان یِتدی قارداش باجیسی
حسرتیله آختارور جان اوُسته جانان زینبون
سن حسینیم اَمر اِیدردون دائماً صبره منی
هر گورن اشکیم دَن اوخشاتدی یاغان ابره منی
بیر کسیم یوخ دور یانیمدا تا قویا قبره منی
بس آنام تاپشورمیوب دور جان سنون جان زینبون
بو ولایتده غریبم کیم گلر بس یاسی مه
گَل اوزون هم سُویله قارداش اَکبریله قاسیمه
نهرِ علقم دَن یولون سال ویر خبر عبّاسی مه
ایله فرمایش ویرور جان دیده گریان زینبون
صفحهء عشقین تمام اِیتدیم حسین هر سَطرینی
باشیم اوستونده او دور آچدیم اِسارت چَترینی
کُوینگون دَن جسمی وین گُل تک آلاردیم عطرینی
دائم اولموشدی ایشی بلبل تک اَفغان زینبون
بو علاقه رختینی تن دَن اُلونجه سویمادیم
آند اولا اوز جانیوه سندن حسینیم دویمادیم
کُوینگون بیر آن یِره بو سینم اوستن قویمادیم
عطریوی پیراهنون دَن آلدی هر آن زینبون
چون حبیبیم ایستیوب دور من گرک تک جان ویرم
سن نجه جان ویرمسن منده سنون تک جان ویرم
سینم اوسته پاره پاره اوُخلی کُوینک جان ویرم
دلده کی عشقین اِیده دنیایه اِعلان زینبون
مشکل ایش دور دامنِ وصلون اَله بیرده سالام
کردگاریم ایستیوب غربت دَه حسرتله قالام
شامیده مدفون اولوب عَطرون رقیّن دَن آلام
اولماسون هجران اِیوینده صبری تالان زینبون
روحی مز بیر دور اولیدی بو سیاقدا قبری میز
آرزو اِیلردیم اولسون بیر رواقدا قبری میز
بیر بیرین دَن حیف اولا دوشدی اوزاقدا قبری میز
دلده کی درد و ملالی اوُلدی پنهان زینبون
من دیدیم اُلسم منی اِیلر حسینیم سر فراز
تا قیلالّار زینبه قارداش حضورین دَه نماز
یتدی قارداشدان بیری قالمور اَیا شاهِ حجاز
عزّتیله دَفن اولا بانوی ذی شاُن زینبون
رسمی دور باجی علاقه مند اولار قارداشی نه
فرقتون باعث اولوب دور زینبین گوز یاشی نه
بیر نفر اِسمون یازیدی باری قبریم داشی نه
عطرون اِسمون دَن آلیدی مو پریشان زینبون
ایله دویموش دوم حیاتیم دَن آنام جانی حسین
لیک بیر غم آغلا دور بو خانه ویرانی حسین
خوار اولار قارداش سیزین شامِ غریبانی حسین
کیم اولار ماتم نشینی زار و نالان زینبون
(اعظمی) چوخ طول وِیرمه بوندان آرتوخ مطلبه
درد و غم هر دَن سالاندا جسمیوی تاب و تبه
اشکیوی جاری قیلوب ایله تَوسّل زینبه
لطف ایدر، اِسمی اولوب هر دَرده دَرمان زینبون
- سه شنبه
- 30
- شهریور
- 1400
- ساعت
- 21:23
- نوشته شده توسط
- یوسف اکبری
ارسال دیدگاه