گَل زینبی جان اوُسته مُلاقات اِیله قارداش
بی کس باجیوی غَرقِ مُباهات اِیله قارداش
من بیر اِیله وَحشتلی بیابان دا حسین جان
دوتدوم سو کنارینده سنه شام غریبان
هر چند عوضین اِیستمورم اِی شهِ خوبان
قارداش لیقیوی عالمه اِثبات اِیله قارداش
بو علّته جان اوُسته آنام چوخ کَدر اولدی
اوغلی واریدی، قارداشی یوخ دیده تَر اولدی
امّا باجیوین اُلماقی اوُندان بَتَر اولدی
قارداش سیز اوغول سوزدی مُراعات اِیله قارداش
سن اوُلما رضا زار و غَریبانه گِیدم من
آیری قاپیا چاره و دَرمانه گِیدم من
عالم نه دِیر قَبره غَریبانه گِیدم من
بیر لحظه وَلُو کَشف و کَرامات اِیله قارداش
بختیم یاتوب اَلبتّه که یاتسون نه سوزوم وار
گر غصّه بُوکوب قدّیمی قلبیم دَه دوزوم وار
آخِر صِله اَرحامه گوره سنده گُوزوم وار
غربت دَه اُلَن باجیوه خِیرات اِیله قارداش
ای زینبین آرامی اوغول سوز باجون اُلسون
گل سیر اِیله بیر شامی اوغول سوز باجون اُلسون
گور باشداکی غوغامی اوغول سوز باجون اُلسون
بیت الحزنی روضهء جَنّات اِیله قارداش
جان خسته دی دردیم گیچوب اَفسرده دوادَن
بیر طاقه کَفن آل منه بازارِ بَلادَن
باغلا بیر اووج گوشه سینه خاکِ شَفادَن
اوز تُربتی وی اَفضلِ سُوغات اِیله قارداش
عبّاسه یتور خواهشیم ای شاهِ خُجسته
آخِر دینن ای سروِ سر و دست شکسته
نَفسونله مُواسات اِیلدون دینِ حقّ اوسته
اَللّهه گوره بیرده مُواسات اِیله قارداش
شام اهلی دیور هیچ بونا بیر اَل یتورن یوخ
اِئل صاحبی دور دردی نه درمان گتورن یوخ
وار یتدی نفر قارداشی یِردَن گوتورن یوخ
دشمن گوزی نه باری عنایت اِیله قارداش
- سه شنبه
- 30
- شهریور
- 1400
- ساعت
- 21:29
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه