باراِلها تَنگ اوُلوب زندان منه
حبس دَه بیر اِیل کِچور هر آن منه
موسی جَعفر اَبا ابراهیمم
یاخشی ئوز گوسترمدی دوران منه
صادقم صادق اِمامون اُوغلیام
عبدِ صالح دور گُوزل عنوان منه
اوُلدوم اُول گُون که اِمامِ کاینات
یتدی سندن رُتبهء شایان منه
شاهدِ عادل ئوزون سن حالمه
اِستراحت اولمیوب اِمکان منه
اِیستدوم سندن ئوزوم خلوت مکان
فیضِ سجدَه تا اولا ارزان منه
عرضیمی اِئتدون خداوندا قبول
خوانِ لطفوندن یتوب اِحسان منه
سلسله جاندان سالوب چارم ندور
دورماقیم یِردن دَگول آسان منه
نچه اِیل دور گردنیم دَه سلسله
مونسیم دور اولموش آویزان منه
بَصره دَه زنداندا قالدوم مدّتی
اوردا خوش کچدی گُونوم بُوردان منه
فضل زندان بانیمیدی روز و شب
ائتمیوردی سَند تک طُغیان منه
هانسی ظلمی ائتمیشم هارونه من
تیره محبس دَه ائدور جبران منه
آدیمی قویدی منیم اخلالگر
قورخمادی سَندَن دِئدی بهتان منه
خانوادَم بیلمیور من هاردیام
منتظر دور بیر بُلوک طفلان منه
ناگرانم چوخ قزیم معصومه دَن
سخت اولوبدی عالمِ هجران منه
نامه یازمور نیلسون اوغلوم رضا
نامه یازسا یولّاسون هاردان منه
چاره ساز الله ئوزون بیر چاره قیل
اَل تاپوب درّندهء خون سان منه
محبسه هر وقت گلور توهین اِئدور
دشمنِ جان دور بو زندانبان منه
تنگ یِرده تنگه گلدوم نیلیوم
حکم اِیله گلسون اَجل الاّن منه
اولمیوم سندیله بیرده رو برو
آچماسون قمچی او بی اِیمان منه
زَهرلی خرمانی جبریله وئروب
قویمیوب قالسون او ظالم جان منه
ای قلم کرب و بلایه چک سوزی
یوز ویروب دور حالتِ افغان منه
مقتله دوشمشدی شاهِ نینوا
هیچ دیموردی ارحم اِی سُبحان منه
سسلنوردی یا غفور و یا رحیم
خیمه لردن خوشدی بو میدان منه
نوحِ عشقم قالمشام طوفاندا من
ذرّه تأثیر اِیلمز طوفان منه
گلشن اوُلدی جدّیمه نمرود اوُدی
اوُد توکور خورشیدِ نُور افشان منه
یِر قزوب قوملار قزوب داشلار قزوب
آتشِ جانسوز دور هر یان منه
دوشدی یوسف چاهه دوتدی جَبرئیل
ویرموسن بو باره دَه رِج حان منه
چاهِ عقشیم دور چوخور یِئر چخمارام
غبطه ایلر یوسفِ کَنعان منه
کُولگه یِرده کسدیلر یحیی باشین
بنذمز یحیی دَه ای مَنّان منه
شمر کسمز کُولگه یِرده باشمی
آغلاسون یحیی گرک دور قان منه
نیزه اوسته باش لاسام تکبیریمی
ماُت اولور داوود خوش اِلحان منه
مَدّینَه موسی قاچوب فرعون دَن
واله اولسون موسی عُمران منه
من عمر سعدون اَلیندن قاچمادیم
عاشقم حاشا یِته نقصان منه
دارون اوستوندن قاچان عیسی هانی
دارِ مُحنتده اولا حیران منه
یولّادون اسماعیله یارَب فَدا
واردی شکریم گلمدی قربان منه
گتدی یتمش بیر نفر اسماعیلیم
خوشدی لفطون اولسا پشتیبان منه
خضرِ دشتِ کربلایم باخمارام
چکسه حسرت چشمهء رضوان منه
باشیم اوسته باش آچوب دور اَبجدیم
هی باخولّار دیده سی گریان منه
حضرتِ زَهرا اَلین دَه معجری
مجتبائی له گلوب مهمان منه
عاشقم من عاشقِ کامل عَیار
ذات پاکون دور سنون جانان منه
تلّون اوستن قتلگاهه بوی لانور
گُوز تیکوب اطفالِ سرگردان منه
عترت و اطفال دَن گُوز یوموشام
بس دی یارَب ذِکرِ الرَحمان منه
اکبریم دَن اصغر و عباسی دَن
خوشدی یارَب اِیتدی گیم پیمان منه
امر ایله گلسون بلا اوستن بلا
حاضرم سن ویر فقط فرمان منه
شاد اولور روحیم قوشی شَهپر آچور
دگدوقی جه نیزه و پیکان منه
جان ویرن وقته باجیم زینب گلوب
قتلگهده تاپماسون درمان منه
مانعی یوخ جسمم اولسا پایمال
قالماسون بو سینهء شان شان منه
باش یارا آلنیم یارا آغزیم یارا
سجده چوخ لذّت وِیرور اَلان منه
ناطقِ قرآنم عاشق لر دییر
جلدسیز شیرازه سیز قرآن منه
(انورم) ای شاهِ گردون تاج حسین
سند اِیدوب سن لطفِ بی پایان منه
- سه شنبه
- 30
- شهریور
- 1400
- ساعت
- 21:40
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه