بو مرغِ گوگول ایستیری توفیق خدادن
تا ایلسون آزاد اُوزینی دامِ بلادن
مدّتدی باتوب گوشۀ عزلتّده ملاله
ایندی منی ایستر سالا بیر اَمرِ محاله
من اوز اوزیمه دوشمزیدیم هئچ بو خیاله
وادار ائلیوبله منی بعضی رُفقادَن
مشهور دور عالم دَه منیم یوخدی سوادیم
منظور بو دور ذکر اولونا خیریله آدیم
گوگلیم دَه بو دور شام و سحر اصلِ مرادیم
بیر توشه جزایه آپارام دارِ فَنادَن
تحصیلِ کمالاته کیم آلاتی دی مَنظور
مطلب اوزی واضح دی نه لازم اُولا مَسطور
تا واردی خداوند جهان ایلیه مَقدور
اِمضا اولونور گر گئچوب اِمضاسی قَضادَن
وار هر پارا اشخاص که شیرین دی مقالی
اولماز که مساوی هامی نون فهم و کمالی
عالِم دَگیلم من اُوخیم علمِ رَجالی
سای سونله سایاندا منی سُلکِ عُلمادَن
بیر نکتهء باریک دی بو سؤز اِئله دُرِ گوش
گُلزاره گِئدوب گُور گُلی خاری له هم آغوش
بیر شمعی که حق دَن یانا اُولماز اُولا خاموش
تحقیق اِئله بو مَطلبی جمله عُقلادن
بیر باغی دَه هم گُل اوُلو هم خار اوُلو هم خَس
هم بلبل اوُلو قُمری اوُلو زاغ و زَغن بس
صدقیله منیم شعری مه ایراد اِئده هر کس
آگاهدی اُول کیم سه یقین رَسمِ وَفادَن
دنیا دولی دور شاعری لن جمله سی اُستاد
اُستاد گرک اِیلیه شاگردینی اِرشاد
امّا دییرم دوت میه بیجا یِره اِیراد
قیلّام بو تَمنّانی جمیعاً شُعرادَن
- چهارشنبه
- 31
- شهریور
- 1400
- ساعت
- 19:19
- نوشته شده توسط
- یوسف اکبری
- شاعر:
-
مرحوم مشهدی اصغر دلریش
ارسال دیدگاه