صادق اوُغلون حسرتیله وِیردی جان یا فاطمه
ظلمله مَسموم اوُلوب لب لرده قان یا فاطمه
بو گُونون مثلن دَه باتدی دین اسلامون گُونی
عالمه وِیردی فداکار اوُلماقین سر مشقنی
جعفری مَذهَب گرک باشه وِیره اوُز عشقنی
یاد ایده اوز پیشواسین هر زَمان یا فاطمه
بو نه عالم دور خانم اوُغلان لارون مَسموم اوُلوب
هر بیری بیر نوعی له بو دَهری دَه مَظلوم اوُلوب
اوُن بیر اوُغلون نان بیری مهموم اوُلوب مغموم اوُلوب
آغلوری مین یوز اوتوز بش اِیلدی قان یا فاطمه
اوُلدی چوخ مظلوم ایکی اوُغلون حسینله حسن
مُجتبی حقّین دَه جَعده اِیلدی ظلمون اَلَن
من دیمم نه ظلم اِیدوب کرب و بلادَه اَهرَمن
روزِ عاشورا ویروب لَب تَشنه جان یا فاطمه
آغلاسان فردوس دَه زین العبادین حالی نه
آغلادی قرخ اِیل حسینه بی پناه اطفالی نه
اوُد لانار قلبون امامِ باقرین احوالی نه
ایله سن گُوزدن یوزه اَشگون رَوان یا فاطمه
اوُغلیوی مسموم ایدوب ظلمی له منصورِ دَنی
هر زمان آغلار قویوب دور قصر جنّت دُه سنی
آغلادار حُجّاجی یَثرب دَه بقیع دَه مَدفنی
زائرین حالین پوزار ورماق همان یا فاطمه
دُورد اِمامین قبری نه زوّاری اِیله لر سلام
واقعاً عالم دَه چوخ مظلوم اوُلوب بو دُورد اِمام
بیر گُوراق حضاریله اوُردا عزا داروق تمام
آرزو قالمازدی دل دَه اوُل زمان یا فاطمه
طوسی دَه مدفون اوُلان موسی الرضایه آغلاسان
وای اوُغول وای ناله سیله بو جهانی داغلاسان
هر شبِ جمعه گلوب اَشگون عذاره باغلاسان
کیم اوُلار موسی الرضا تک مهربان یا فاطمه
گه گیدوب اوُغلون جواده آغلاسان هر روز و شب
آخر اُمّ فضل امامین قتلی نه اوُلدی سبب
ایتمدی شرم و حَیا خلاقی دَن اوُل بی ادب
سوگتوردی اوُز کنیزی اوُل زمان یا فاطمه
کاسه نی آلدی کنیزین دَن سویی توک دی یِره
قویمادی اوُ تشنه کامه بیر اِیچیم تا سو وِیره
کاش اوُلیدی بوجهان فانی دَگییدی بیر بیره
تشنه لب جان تاپشران دا اوُل جوان یا فاطمه
گه امامِ عسکری حالی نه سینه داغلاسان
ناله و فریاد ایدوب اشگون عُذاره باغلاسان
مهدیّ صاحب زَمان اَحوالی نه قان آغلاسان
هاردا دور اوُغلون حسین قانین آلان یا فاطمه
قلبی نین دردی ایدوب عالم لره از بس اثر
اللّری قوینون دا یا جدّا دِیر حیران گزر
گه گیدر کرب و بلایه جدّی قبرین دَن اُپَر
عرض ایدر ای عمّه می آغلار قویان یا فاطمه
گه نجف صحراسی نه آغلارگُوزیله یول سالار
جدّینین عطرین گیدوب قبرِ شریفین دَن آلار
کاظمی نه گه گِیدر گه سامریا دَه اوُلار
یاد ایدر اجدادینی صاحب زَمان یا فاطمه
شام دُه امّا دونر شامه او شاهین گُون دوزی
چون باتوب اوُردا حسینین بیر ایشیقلی اوُلدوزی
تا گُورر ویرانه دَه قبرین او نسگل لی قزی
خسته دور یورقون یاتوب اوُل باغری قان یا فاطمه
یا امامِ جعفر صادق سنه جانلار فدا
ایسته حق دَن حاضری نه بیر براتِ کربلا
اوز آنان زَهرایه خاطر بیزلری ایله دعا
دامنون دَن چکمز ال (غمگین) اوُلان یا فاطمه
- پنج شنبه
- 1
- مهر
- 1400
- ساعت
- 15:12
- نوشته شده توسط
- یوسف اکبری
ارسال دیدگاه