جان ویرورم گَل باجی معصومه گَل
زهر ویروبدور من مظلومه گَل
اود دوتوب اودلاندی دل مضطریم
زهر اثریندن یانوری لبلریم
یرده یوزوم یولدا قالوب گوزلریم
جان ویرورم گَل باجی معصومه گَل
گلشن عمریم گُلی خندان اولوب
حالیم آنام باجی پریشان اولوب
غربت اَلیندن جگریم قان اولوب
جان ویرورم گَل باجی معصومه گَل
گورماقیم اطفالیمی اولدی محال
محشره قالدی باجی بیرده وصال
عترتیمون باشلارینه قاره سال
جان ویرورم گَل باجی معصومه گَل
من کیمی یوخدور کسیلن چاره سی
زهریله خونین دل صد پاره سی
غربت اسیری وطن آواره سی
جان ویرورم گَل باجی معصومه گَل
وار نه منیم حالیمه بیر آغلیان
باشیمون اوستونده جگر داغلیان
اُلسم اگر یوخ گوزیمی باغلیان
جان ویرورم گَل باجی معصومه گَل
زهر ویروبدور منه دشمن باجی
رحلت ایدم آز قالوری من باجی
گَل گوزیمی باغلاماقا سن باجی
جان ویرورم گَل باجی معصومه گَل
ظلمیله مامون پلید و شقی
ایلدی خاموش بو نور حقی
قالدی یتیم ای باجی اوغلوم تقی
جان ویرورم گَل باجی معصومه گَل
رحم ایدن ای کاش اولا گوز یاشیمه
ایلیه اخطار بنی هاشمه
قوم و قبیله یغیشا باشیمه
جان ویرورم گَل باجی معصومه گَل
گوردی من بی کسی دشمن غریب
ایلدی اوز بُلدوقون ایمن غریب
دشمنیمون قدرتی چوخ، من غریب
جان ویرورم گَل باجی معصومه گَل
گوشه ی غربتده اَُلن گونده من
کاش اولِیدون باشیم اوستونده سن
جسمیمه زلفوندن ایدِیدون کفن
جان ویرورم گَل باجی معصومه گَل
مردمک گوزده مجسّم اجل
یرده یوزوم، یولدا گوزوم، دلده اَل
سسلنوری جدّیم اوغول دورما گَل
جان ویرورم گَل باجی معصومه گَل
گوردی قضا ظلمه منی چون رضا
جبراً عیالیمدن آیردی قضا
دل دوداقیم یاندی مَضی ما مَضی
جان ویرورم گَل باجی معصومه گَل
ایلدی بیر پایه ده مامون جفا
واوَلَدا سویلدی خیرُ النّسا
ایتدی خراسانی منه کربلا
جان ویرورم گَل باجی معصومه گَل
سِلم و رضا مُلکینه من والیَم
جدّیمه غربتده بو گون تالیَم
بو غمیله اُلّم، اوزوم حالیَم
جان ویرورم گَل باجی معصومه گَل
باغلی دگل شهر سناباده یول
فرض حسین ایت، منه سن زینب اول
بوینوما سال باجی دین وقته قول
جان ویرورم گَل باجی معصومه گَل
دشت بلاده او شه انس و جان
ویردی لب عطشان قوری یرلرده جان
آغلارام احوالینه جان اوسته قان
جان ویرورم گَل باجی معصومه گَل
قانیله غلطانیدی مظلوم امام
دوره سین آلموشدی گروه ظلام
آز یولیدی قتلگهیله خیام
جان ویرورم گَل باجی معصومه گَل
گرچه دگلدی او قَدَر فاصله
مانعیدی لیک سَنان، حرمله
گَلسون عیالی باشی اوسته دله
جان ویرورم گَل باجی معصومه گَل
باخمادی میدانی دوتوب قیل و قال
گَلدی گنه باجیسی پژمرده حال
گوردی ویرور جان شه گردون جلال
جان ویرورم گَل باجی معصومه گَل
بسدی (حسینی) سوزون ایله تمام
مختصر ایت، اولدی مطوّل کلام
مطلعی یاز مقطعه، قیل اختتام
جان ویرورم گَل باجی معصومه گَل
- شنبه
- 3
- مهر
- 1400
- ساعت
- 16:28
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه