جان اوسته گرچه قیلّام فریاد و داد الهی
جان ویرمرم گَلینجه اوغلوم جواد الهی
پابند درد هجرم یوخ وصل، بی طبیبم
گُل یوزلی بیر جوانه شوریده عندلیبم
نه وار ایلیم یانیمدا نه عترتیم غریبم
آغلار گوزوم سیزیلدار نی تک فُواد الهی
رحم ایتمدی الهی مامون بو دل حزینه
ویردی من غریبه ظلمیله زهر کینه
قیلّام نظر یساره حسرتله گه یمینه
عرشه چخار دلیمدن آه نهاد الهی
بیر ماهیم اولوبدور خشکیده نهر آبیم
بسمل کیمی واریمدور جان اوسته اضطراریم
یاندی دیلیم دوداقیم، گیتدی توان و تابیم
قلب ملولیم اولسون هیهات شاد الهی
روحیم یاخوندی چخسون حالیم اولوب مشوّش
زهر ایلیوب اثر وار گویا بدنده آتش
ویرموب نشانه اصلاً بیر من کیمی بلاکش
عالمده آب و آتش هم خاک و باد الهی
اوغلوم ندندی گَلمور یرده یوزوم فکارم
یولدا قالوب گوزوم بیر دلداره انتظارم
قلبیم شکسته دور چوخ، پژمرده حال و خوارم
ایستر شکسته گوگلوم مُلکی عماد الهی
اوغلوم گَلوب شکسته دلده عماد اولِیدی
آخِر نفسده قلبیم محزوندی شاد اولِیدی
یانیمده جان ویرنده اوغلوم جواد اولِیدی
جان اوسته ایلیِیدیم اخذ مراد الهی
غربت من غریبی ایلوبدی زار و خسته
بو وقته کاش اولِیدی معصومه باشیم اوسته
باشین آچوب ایدِیدی ناله او دل شکسته
ماتم منه دوتِیدی اول خوش نژاد الهی
بو حالیله گر اُلسم احوالیمه کیم آغلار
غربتده جان ویرنده کیم گوزلریمی باغلار
کیم باش آچار جنازم اوستونده سینه داغلار
بو رسمیدور غریبی ایتمزله یاد الهی
زهر جفا سالوبدور کُبّادیمه شراره
غسل و کفن کیم ایلر اَُلسم من فکاره
اوغلوم تقی نی گوندر قویسون منی مزاره
ایله بو دلفکاره لطف زیاد الهی
تقسیم غمده دوشدی بو نوع طرح قسمت
اولسون من غریبه مدفن بو کنج غربت
گَلسه جوانیم اولّام خوشنود بی نهایت
امر قضایه قیلّام من انقیاد الهی
هجران غمینده قیلّام گه داد و آه و ناله
پوزقوندی حالتیم چوخ، گه آغلارام بو حاله
جان ویرماقین حسینون سالّام گهی خیاله
نه ظلم ایدوب او شاهه اهل عناد الهی
قویموشدی قتلگهده قانی یوزین زمینه
اطرافینی سراسر آلموشدی قوم کینه
جان اوسته ظلم ایدردی اعدا او شاه دینه
رحم ایلمزدی اصلاً اتباع عاد الهی
بس که ووروبلا یاره اول شاهه قوم عدوان
اوراق اولوب یازیلدی جسمی مثال قرآن
کُتّاب اهل کوفه، خامه سِنان و پیکان
زخمیندن آخدی قانی اولدی مداد الهی
آخدوقجا قانی هردو، ووردوقجا یاره دشمن
من راضیم دیردی بو جور و ظلمه دلدن
ایتدیم سنیله یارب بیع و شری ازل من
یتسون گرک تمامه داد و ستاد الهی
قالو بَلی گونونده دل ویرمیشم بلایه
قالسون یر اوسته نعشیم گیچسون باشیم جدایه
سن سووموسن خوشام من بیر بیله ابتلایه
ایلر وفا یارالی دل استناد الهی
عبّاس و عون و قاسم، جدّیم شبیهی اکبر
جان ویردیلر، علاوه اوخلاندی تشنه اصغر
قطعه به قطعه اولسا جسمیم خوشام سراسر
اثبات ایدم گرک من مهر و وِداد الهی
دوغرانسا بند بندیم ای راز قلبه عالِم
خیمَم تالانسا تاراج اولسا منال و مالیم
شمر ستم شعاره اولسا یتیم عیالیم
ایتمز مگر رضای دل ازدیاد الهی
ایتدیم وفا من عهده، سنده وفا قیل اظهار
زوّاریمی باغیشلا ای ذوالجلال و غفّار
هر کیمسه ماتمیمده اولسا منیم عزادار
ایله منیله همدم یومُ المَعاد الهی
یارب اولوب (حسینی) تیر غمه نشانه
از بس که خوار ایدوبدور انظاریده زمانه
گر اولماسا تفضّل سندن بو باغری قانه
خوش گون گوره اورکده یوخ اعتماد الهی
- شنبه
- 3
- مهر
- 1400
- ساعت
- 19:15
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه