ختم اولوب جدّون عزاسی یا علی موسی الرّضا
باشلانوب ثانی جفاسی یا علی موسی الرّضا
آغلادور گرچه غمون شاها بو اهل عالمی
بو غمی یاددان چخاردوب لیک آنان زهرا غمی
قویدی یرده امّتی جسم رسول اکرمی
قویدولار شورا بناسی یا علی موسی الرّضا
داد او شورادن چخان بیر راییدن فرمانیدن
داد ثانی اَلده عنوان ایلین عنوانیدن
گَلدی بیعت آلماقا شاهنشه دورانیدن
اودّی بیعت ماجراسی یا علی موسی الرّضا
باشینه یغدی نچه بی دین او مردود ازل
گَلدی باب رحمته بی اعتنا و بی محل
حلقه ی درب مَلَک دربانه ووردی اوّل اَل
اولمادی حقدن حیاسی یا علی موسی الرّضا
گَلدی پشت بابیده دوردی آنان خیرالنّسا
سسلدی آیا ندور بو های و هوی و ماجرا
سویلدی ثانی- دی گَلسون بیعته میر هدا
بسدی پیغمبر عزاسی یا علی موسی الرّضا
ایتدی فرمایش آنان بیزلر عزاسی یاسلیوخ
سینه داغلی، دل شکسته، ماجرالی یاسلیوخ
ایلیوب رحلت آتام، باشی قرالی یاسلیوخ
اولموشوخ غم آشناسی یا علی موسی الرّضا
نه خدای دادگردن ایلدی شرم و حیا
نه ایدوب صدّیقه ی کبری سوزینه اعتنا
اود ووروب یاندوردی درگاه بتولی برملا
یاندی حق دولت سراسی یا علی موسی الرّضا
آتش ظلم و ستم گیتدوقجا اولدی شعله ور
یاندی باخدوقجا آنان زهرا، آلشدی یاندی در
یتدی صدمه بطنینه پهلوسی سیندی مختصر
اُلدی بطنینده بالاسی یا علی موسی الرّضا
بیر بیله گون تاپدی پایه کاخ بیداد و جفا
تا قلجلاندی نماز اوسته باشندان مرتضی
عاقبت اوز اهلینون مسمومی اولدی مجتبی
یتدی باشه ابتلاسی یا علی موسی الرّضا
بسکه دوز گَلدی جفا اهلیله چرخ کجمدار
سالدیلار فرصت اَله اهل جفا قوم شِرار
کربلاده ظلمیله دینون ستونین یخدیلار
گیتدی ایمانین اساسی یا علی موسی الرّضا
تا اَلیندِیدی ابوالفضلین حسینون بیدقی
احتراز ایتمزدی هرگز اهل کینون بیدقی
داد ایله بیر وقتیده که یاتدی دینون بیدقی
باش ویروب کفرین لواسی یا علی موسی الرّضا
تا آت اوستن یخدیلار عبّاسی اهل کین یره
آلدیلار اطرافینی اول بی کسون چون دایره
سبقت ایلردی یارا وورماقدا تک تک بیر بیره
شام و کوفه اشقیاسی یا علی موسی الرّضا
بیر طرفدن نیزه داران یکسر اَللرده سِنان
بیر طرفدن آلدیلار اطرافینی خنجر ووران
یاره اوستن ووردولار ازبسکه یاره کوفیان
حدّیدن گیچدی یاراسی یا علی موسی الرّضا
باخمادی بیرحملر جسمی دولوبدور تیریله
ووردولار یاره سِنان و خنجر و شمشیریله
گور نه رفتار ایلدی روبه صفتلر شیریله
آغلا ای غم مبتلاسی یا علی موسی الرّضا
نازنین جسمین ایله بیر حاله سالدی قوم کین
خیمه گاهه حمل ایدَنموب نعشینی سلطان دین
دوشدوقی یرده اونی دفن ایتدی فخرُ السّاجدین
وار مزار غم فزاسی یا علی موسی الرّضا
دلده کی دردیم منی شاها ایدوبدور پانشست
آز قالور بو درد عاصی جانینه ویرسون شکست
قویما طعن ایتسون منه هر بی سر و پا خودپرست
سنده دور دردیم دواسی یا علی موسی الرّضا
- شنبه
- 3
- مهر
- 1400
- ساعت
- 19:25
- نوشته شده توسط
- یوسف اکبری
- شاعر:
-
مرحوم حسن عاصی تبریزی
ارسال دیدگاه