آه او ساعتدن سلام آخِر اکبردن اوجالدي
خيمه ده مظلوم امامون صورتي سولدي سارالادي
اضطراب و هوليله يوز قويدي دشت کار زاره
تا يِتوردي شه اوزين شبه رسول تاج داره
نوجوان اوغلون گوروب توپراقلار اوسته پاره پاره
اختيار اَلدن گيدوب آتدام اوزين توپراقه سالدي
عمريم اولسا يوز مين ايل بو بير سوز اوسته
ذوالجناح اوستَن عزيز فاطمه دوشدي يوز اوسته
اولمادي طاقت دورا نِچّه قدم گيتدي ديز اوسته
يانديروب زهراني هم پيغمبرين آرامين آلدي
باشلادي شه ناله، بلبل تک گل خنداني گورجک
سويلدي نه تيز چخوب باتدون علي صبح اولدوزي تک
همّ و غمدن سَن خلاص اولدون اوزون، قويدون مني تک
بير بيله دشمن آرا بي کس آتان بو چولده قالدي
بو مصيبتده دايان چخما قفسدن اول دل آرام
شه گوروب جان اوسته دور اول نازنين شوخ دلارام
باشيني باسدي اورک باشينه تا اولسون دل آرام
دل که آرام اولمادي آرتوب غمي دردي چوخالدي
خم قدين اَگدي قويوب صورت علينون صورتينه
نقل ايدر راوي باخارديم من امامون حالتينه
گوردوم اولدي بو عمل افزوده شاهون رقّتينه
قان محاسندن آخور، گوز جامي هِي دولدي بوشالدي
سرخوش ايتدي شهرياري شربت هجران شهدي
بي نتيجه اولمادي عشق عالمينده جدّ و جهدي
داغ اکبر قدّيني اگدي دوزلدي نقص عهدي
مقصدي گلدي اَله آئينه ي قلبي صافالدي
شرمگين اولمور عجب چرخ جفاجو اوز ايشيندن
آه يازهرا امان بو روزگارون گردشيندن
سَنکه گوردون توپراقي قاني نجه سيلدي ديشيندن
اسگلوب نه غصّه دلدن، نه غم و محنت آزالدي
شه سَسين آلدي او شهزاده اُلومدن بير يانشدي
جسمينه بير تازه جان گَلدي گوروب تا سَس تانشدي
غنچه وَش سولموش لبين ناگاه بير آچدي دانشدي
باغبان ياندي چکوب بلبل نوا گُللر سارالدي
سويلدي مندن سلام ايت ليلي بي اقربايه
وير تسلّي گَلمسون بو غمده فرياد و نوايه
قاتليم وورسا يارالي باشيمي نوک جدايه
سربلند ايلر حرملرده آنامدا باش اوجالدي
بولمورم نه حاليدي شه آغليوب دشمن گُلردي
بير خدا عالِمدي بيرده زينب کبري بولردي
گلمسِيدي قارداشي اکبر باشي اوسته اُلردي
گلدي امّا شيشه ي صبر حسيني داشه چالدي
عالم معناده زهرا آغلادي بو حاله ياندي
غيرت ا... عصمت اللهي گوروب حالي دولاندي
اکبرين ياددان چخاتدي داغ هجرين سهل ساندي
دوردي فوراً اوز عباسين زينبين باشينه سالدي
بولمورم من قالدي اکبردن صورا ليلا نه حاله
خيمه ده يا قتلگهده تاپدي نعشين چکدي ناله
گورمسون ا... آنارلار تا جهان وار لا محاله
گوردي ليلا گون گوزينده تيره تار اولدي قرالدي
نظم ميداننده (شاني) آز دولاندور رخشِ طبعون
شکر ايزد آرتروب قلبونده نورون تخش طبعون
هر کسون بير قسمي بو اولدي سنونده بخش طبعون
حاليني بو نوحه نين آنلار اولار که اهل حالدي
- شنبه
- 3
- مهر
- 1400
- ساعت
- 19:34
- نوشته شده توسط
- یوسف اکبری
- شاعر:
-
مرحوم حسین شانی تبریزی
ارسال دیدگاه