آچون عم اوغلومون قولون دوزنمورم وفالییم
آپارمیون دالینجا من گلنمورم یارالییم
توکولموسوز گل اوستونه گلی چمندن آلماقا
قصاص بدر و خیبری شه زمندن آلماقا
ویرا ویرا بو خسته نی علینی مندن آلماقا
محالدور که ال چگه م اگرچه من یارالییم
خزان یتنده گلشنه یتشدی جان دوداقیمه
پوزولدی غنچه صدمه لر یتوشدی قول بوداقیمه
عم اوغلوم آز قالوبدی کیم دچار اولا فراقیمه
آچوبدی قنفذ ال منه یخلموشام یارالییم
آتام وفاتینه گوره قورولدی ایوده انجمن
عزایه گلمه دوز اودور گلوب نوایه بوالحسن
قاپی دویولدی من دیدیم بو یاسه اولما وار گلن
وروبدی ثانی تسلیت عجب منه عزالییم
علیدن اوتری باشیمی بوگون بلایه سالموشام
قاپی دالیندا دردینی بو خسته جانه آلموشام
گلینجه فیضه دادیمه بیر اوزگه حاله قالموشام
نلر گلموبدی باشیمه دیمم نچون حیالییم
سوزوم نه بو یان قاپی نه بو سنان گهرده دی
نه محسنوم نه قوللاریم نه اوز حالیم نظرده دی
عم اوغلوم احترامی چون بو شهرده خطرده دی
یاخندی غصه مرگ اولام که قلبیدن یارالییم
یاخندی جان ویروب اوله م فشار روزگاردن
فلک ولیّ ذالمنی سالوبدی اعتباردن
گلوبله بیعت آلماقا بو غملی شهریاردن
بو بیعت اوسته اود دوتوب قاپوم یانار بلالییم
ابو ترابین اللرین ابو قحافه باغلیوب
جفا ایدوب عیالینه دل علینی داغلیوب
او ساعت اولمیه علی او کان صبر آغلیوب
اوزوم فدای گوزیاشی او چشمه زلالییم
علی ئوزونده من نجه گوروم سنخلوق ایخدا
یاخندی روح فاطمه بو جسمدن اولا جدا
شهنشه ولا هارا بو شال و بو رسن هارا
بو بهت و حیرت ایچره من تعجبم خیالییم
بو مسجده ایچره اهل کین کسوبله چاره مین یولون
قلنج لار الده حیدرین کسوبله صاقیلن صولون
باخور بالالارین گلون آچون عم اوغلومون قولون
باشیندا یوخ عمامه سی بو غصه دن نوالییم
دایان بو یرده سوز داخی (فغانی) یازما ختم ایله
دوشوبدی تنگه قافیه اگرچه اود ورار دیله
ایدوبله اوزلری نظر بو نوحه آدلی نسگیله
آچون عم اوغلومون قولون دوزنمورم وفالییم
- شنبه
- 3
- مهر
- 1400
- ساعت
- 20:29
- نوشته شده توسط
- یوسف اکبری
- شاعر:
-
حاج یحیی فغانی تبریزی
ارسال دیدگاه