گوروب آز عمریله چوخ ابتلا و درد و بلا
پیمبرین قیزی ام الائمة النجبا
او گونکه گیتدی الیندن آتاسی زهرانون
اوجالدی گوگلره آه و نواسی زهرانون
بلالی باشینه سالدی قرا او کنز بلا
بلایه سالدی جهانی بلاسی زهرانون
یازوب قضا قلمی بیر خبر شهادتینه
اولوب آتا اولومی مبتداسی زهرانون
الینده بیعتی عنوان ایدوب گلوب ثانی
دیدی گرک گیده الدن اساسی زهرانون
دیدی بتوله عم اوغلون دی بیعته گلسون
حزین سسیله اوجالدی صلاسی زهرانون
بویوردی ال گوتور اینجیتمه بیز عزاداروق
هنوز تازه ئولوب مقتداسی زهرانون
جواب ویردی اگر آچماسان من اود وورام
بو سوزدن آتدی فغان و بکاسی زهرانون
بویوردی بولموسن آیا بو مطلبی ظالم
رضای حقّیدی مطلق رضاسی زهرانون
اوتانمیوب او دنی سسلدی اودون گتورون
گرک بو گون یانا دولتسراسی زهرانون
وورولدی اود ملک اذن ایستین قاپی یاندی
ایشیتدی فضّه گلور بو صداسی زهرانون
دایانما فضه خبر ویر عم اوغلوما گلسون
شهید اولوب ستمیله بالاسی زهرانون
نه ظلم اولوب دیمرم بو قدر وار عرض ایدرم
ئولونجه سینه ده قالدی یاراسی زهرانون
همان او صدمه اولوب علت وفات بطول
دگول بیانه گلن ماجراسی زهرانون
جوانلیقیندا قدین بار درد و غم بوکدی
آقاردی باشداکی زلف قراسی زهرانون
اَریتدی جسمینی تشریح محض ایلدی غم
پوزولدی نقشه سی قالدی نماسی زهرانون
حیات عاریه دن ایله تنگه گلمیشدی
فقط بیر ئولماقیدی مدّعاسی زهرانون
دیردی سجده ده ریحانه ی رسول خدا
وفاتینی یاخون ایت ای خداسی زهرانون
دیوب دعاسینه سکّان نُه فلک آمین
که استجابته یتدی دعاسی زهرانون
یاخونلاشوب اجلی اولدی بستری ناخوش
گلوبدی بیر گون ایوه دلرباسی زهرانون
گوروب بتول یاتوب رو به قبله افسرده
کسوب علاقه بدندن قواسی زهرانون
دیدی گوز آچ اولوم آغلار گوزیوه من قربان
گوروب که گلمدی اصلاً نداسی زهرانون
دیدی دوباره دور ای یادگار پیغمبر
گوروب که دینمه ماقا وار بناسی زهرانون
اورکلنوب دیدی آخِر عم اوغلوام زهرا
بو سوزده جوشه گلوبدور وفاسی زهرانون
آچوب گوزین دید گل باشیم اوسته بیر اگلش
عم اوغلی یا علی وار التجاسی زهرانون
یاخونلاشوب حسنینیم یتیم اولا ئولورم
واریمدی نچّه سوز ای مه لقاسی زهرانون
ازل بودور گجه ویر غسلیمی گجه کفن ایت
بودور اورکده کی درده دواسی زهرانون
قاپومی یاندیران اشخاصی قویما گلسونلر
اولاردی علّت رنج و عناسی زهرانون
ایکیمجی عورت اگر آلسان آل امامه نی سن
اودور محبّی بو غم آشناسی زهرانون
او گلسه زینبیمه غم گونی مصاحب اولور
تاپار تسلّی بلا مبلاسی زهرانون
سینیقدی زینبیمون قلبی، سن نوازش ایله
بو سوزده وار سنه چوخ التماسی زهرانون
حسن گر آغلاسا سیل گوزیاشین تسلی ویر
ملول قویما اولا مجتباسی زهرانون
خصوص اوغلوم حسین جدّینون امانتی دور
اودور گوزینده عم اوغلی ضیاسی زهرانون
حسینیم آغلاسا چوخ روحیمه اذیت اولور
چخار سپهره فغان و بکاسی زهرانون
ایشیتمیشم بو حسینین سوسوز کسلّه باشین
فزون اولور غم بی منتهاسیزهرانون
اوغول اوغول دیرم نعشی اوستونه گیدرم
گلولّه شیونه آل عباسی زهرانون
حسین قانین آغارام زلفیمه خضاب ایدرم
جهانه شور سالور قان حناسیزهرانون
بتول رحلت ایدوب آی دولاندی ایل گیچدی
ظهوره گلدی بو لفظ خفاسیزهرانون
کسیلدی باشی حسینون سویولدی گل جسمی
آلوب قرارینی شمرین جفاسیزهرانون
گلوب حسین یاننا ساربان بی ایمان
سولوبدی گوردی گل با صفاسی زهرانون
او ظالم ایلدی بیر ظلم تیتردی یرلر
عمامه سین یره ووردی آتاسیزهرانون
روایت ایلوری جمّال قتلگهدِیدیم
گلور نه گوردوم اوغول وای صداسیزهرانون
گلوب دوشندی حسینین جنازه سی اوسته
اوجالدی ناله ی وا مُحجتاسی زهرانون
گورنده اللرینی ووردی باشه غشّ ایلدی
پوزوب پیمبری بو مایُراسیزهرانون
گتوردی حضرت زهرانی هوشه پیغمبر
آخوب عذاره دُرِ پربهاسیزهرانون
دیدی شل اولسون الی کیم کسوب اوغول الیوی
فَداکَ اُمُّکَ اولدی اداسیزهرانون
محاسنین بویادی عقل کلّ قانیله
رسول اکرمه وار اقتداسی زهرانون
اوغول قانین گوتوروب یاخدی زلفینه یوزینه
عقیقه دوندی رخ کهرباسی زهرانون
ایدوب «حسینیه» چوخ جور و ظلم بیر بی دین
آل انتقامین اوزون ای خداسی زهرانون
- یکشنبه
- 4
- مهر
- 1400
- ساعت
- 14:12
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه