گل حسین قمچی یوران پیکری نیلی باجوام
عرش درد و محنون غملی سهیلی باجوام
قاره بختیمدن ئولن وقته گلیلی باجوام
رشتۀ عزت و اقبالیمی بختیم قیردی
آلدی قارداشلاریمی خوار ایلیوب سندیردی
من سنون گوزلری یوللاردا قالان زینبوم
قتلگهده سنی اللردن آلان زینبوم
من سنون کرب و بلاده قوجالان زینبوم
تیغ آهیله یانان قلبی پیاپی بولورم
هارداسان قارداش حسین ایندی آدامسیز ئولورم
روزگارین دئمه قارداش ایشی منله چوخوموش
سر نوشتین قلمی قلبیمه بیر گون اوخوموش
هئچ اولدن ایله بیل قارداشیم اصلاً یوخوموش
یّدی قارداش آدین ازبر ایلیوب هی دیورم
یّدی سندن بیری گلمور نقدر گوزلیورم
آز قالور سایه گله اشکی روان گوزلریمه
گجه تک ظلمت اولوب ایندی زمان گوزلریمه
کسیلن پنجوی گل قوی نگران گوزلریمه
گوزلریم قوی کسیلن اللریلن باغلانسون
گوزلرون یوم یوزومه باخما اورک داغلانسون
سندن اوزگه باشیم اوسته نه گلن ایستیورم
نه سرین یر گزورم من نه وطن ایستیورم
دیورم گل ولی فکر ایتمه کفن ایستیورم
جان یتوب سینمه قارداش وطنی نیلیورم
گوگلوم ایستور سنی والله کفنی نیلیورم
ره عشقونده سنون عمر بوئی جان قویدوم
سنه نسبت بلورم خدمته نقصان قویدوم
یولا دوشدوم قولی باغلی سنی عریان قویدوم
آغلارام پیکروی قویدولا من سیز قبره
آی کفنسیز منی دفن ایله کفنسیز قبره
کاش نسیم ئوز جهتین دوندره اول غملی یره
باخوب احوالیمه رحم ایلیه الله گوره
قلبیمون غصه لرین محضر یاره یتوره
بلکه احوالیمه آگاه دگلسون هله سن
حالیمه آگه اولوب باشیمون اوسته گله سن
غربانین ئورگی سنسا مگر آلمازلار؟
جان ویرنده باشی اوستنده گلوب قالمازلار؟
یّدی قارداش باجسین یاده مگرسالمازلار؟
بلورم دوزدی بیر آز فاصله میز چوخدی حسین
یول مگر سو یولی تک باغلیدی یول یوخدی حسین؟
مرغ روحی یورولان سینه قفس مثلی سخور
کهنه دیوارۀ عمری گوزومون یاشی یخور
جان یتوب سینیه قلبیم سنه خاطر داریخور
دئمورم عرشه دگن باشوه عّزت تاجوام
سن ئوزون یاخچی بیلورسن که حسینچی باجوام
سنیلن بدو تولدن حسین هم نفسم
ایندی بیر قوش کیمی زندانی کنج قفسم
کجه گوندوز سسی غملی اوجالان بیر جرسم
ایدورم ناله سزلتیم سسی کم کم یاییلور
نالمه قبریده مظلومه رقیه آییلور
باخورام حسرتیلن گوز دولوسی یوللاره
چوخ سوزوم وارولی یوخ طاقت حسین گفتاره
کیپریگیم آدوی اشگیله یازوب رخساره
گوز یاشیم آدوی گه یوزده پوزار گاه یازار
بی کسم کیمه کفن ایلر منه کیم قبر قازار
باشیم اوسته گلنیم اولمادی خواراولدوم حسین
قلبیدن غملی بلوطلار مثلی دولدوم حسین
باغبان سیز گله بنذر سارالوب سولدوم حسین
منی گوزدن نه گناه اوسته سالوبسان قارداش
گون ایوینده ئولورم هاردا قالوبسان قارداش
- یکشنبه
- 4
- مهر
- 1400
- ساعت
- 14:18
- نوشته شده توسط
- یوسف اکبری
- شاعر:
-
لا ادری
ارسال دیدگاه