چون حمل اولوندی خیمیه اکبر جنازه سی
اوج ایلدی فلکلره وا اکبرا سسی
اطراف نعشی آل علی دوتدی لاله تک
گوز یاشلارین سپردیله گل استه ژاله تک
لیلا شرار آهیله دنیانی داغلادی
بو دلریله اوخشادی اوز اغلون آغلادی
ای آسمان حسنده رخشنده ماه اوغول
بوگردش سپهردن افسوس و آه اوغول
قویدی اورکده حسرتیمی چرخ کجمدار
اولدی تمام نقشه فکریم تباه اوغول
ای رو حیمون چکیده سی وی قلبیمه سرور
زلفین کیمی منیم گونوم اولدی سیاه اوغول
جسمیندی بو بو حالیده یا گلدی بیر طبق
خندان اولوبدی من ایدورم اشتباه اوغول
سن یوسفه عزیز زلیخا منه کنیز
فخر ایلرم یولوندا اولام خاکراه اوغول
بیکس آنان قبول ایلسن بیر کنیز دور
ای کشور محبته قدرتلی شاه اوغول
قان قطره سین یوزوندن اگر گوز یاشیم سیله
سیراب ایدر بو توپراقی خونین میاه اوغول
آچ قانلی گوزلرین یوزیمه ایله بیر نظر
بلکه تسلی دل اولا بیر نگاه اوغول
سنسیز گیدر منیمده بو صحراده عزتیم
من دل شکستیه سنیدون عزّ و جاه اوغول
چوخلار بو گون بو کوی محبتده جان ویروب
اما سنیله گلشن اولوب قتلگاه اوغول
دنیا بویی آدون اولاجاق ورد اهل عشق
باخما یتوردی قتله سنی بو سپاه اوغول
بسدور منه بو فخر که اول قتیلیسن
آچدون طریق عشقه گوزل شاهراه اوغول
(خوندل) اولوب بو درگه والاده خاکسار
امید عفوی وار ایلیوب چوخ گناه اوغول
- یکشنبه
- 4
- مهر
- 1400
- ساعت
- 15:17
- نوشته شده توسط
- یوسف اکبری
- شاعر:
-
حاج حیدر خوندل
ارسال دیدگاه