من بو سودادن علی ال چکن اصلا دگلم
گزمسم چوللری مجنون کیمی لیلا دگلم
گل خیالیله گرک دالدالانام خاره گیدم
گل کیمی باشدان آتوب پرده نی بازاره گیدم
گه گزوب چوللری گه مجلس اغیاره گیدم
گوره‌لر عشقده ثابت قدمم یا دگلم
چوخ خوش عالمدی وار اوز عالمیمه شکریم علی
قید عالمدن عجب فارغ اولوب فکریم علی
صحبتیم وردیم علی فکریم علی ذکریم علی
ازگه بیر صحبته بیر کلمیه گویا دگلم
اشگیله مخزن اولوب لؤلؤ مشحونه گوزوم
دوندوروب دامنیمی دجلۀ جیحونه گوزوم
قویمادی پرده چکم نکتۀ مکنونه گوزوم
یوخسا اُز سرّیمی من بولدورن اصلا دگلم
گوروم قانلو باشون نیزه‌ده هر آن گورونور
مه یوزین گاه نمایان گهی پنهان گورونور
تل‌لرونده دوزولوب شدّۀ مرجان گورونور
یا گوزوم یاشیدی من مطلبه دارا دگلم
باخوب آغلار گوزیمه اشگیله طوفان گورورم
اودی دل ملکی تک عالملری ویران گورورم
یا پریشاندی خیالیم که پریشان گورورم
تابع زلف پریشانوام آیا دگلم
وصل امّیده ورار عشقده عشاق قدم
من که قطعاً بولورم وصلوی عالمده عدم
ایستیرم عالمه بو نکته‌نی من واضح ایدم
که بو تصمیمیله من اهل تمنّا دگلم
گر بو تصمیمیله تحصیل مرام ایلمه‌سم
عشق عوالیمینی تسخیر تمام ایلمه‌سم
اُز گونو تک هامویه گونلری شام ایلمه‌سم
بول که لیلا آدینا اسمی مسمّا دگلم
من بلا طالبیم صدقیله عن قلب سلیم
بو دلیلیمدی انیسیم غم اولوب ناله ندیم
گلمه سم آهیمیله نالیه با عظم رمیم
عالم عشقوه بولسونله مسیحا دگلم
فکریله جلوه لنور صورتون آغلار گوزومه
دانشوب صحبته گللم سنیله اُز اُزیمه
گورورم گلمدی بیر کلمه جوابون سوزیمه
اوندا بیللم بو مقاماته مهیّا دگلم
دوزدی لیلا اُزینی محو علی‌اکبر ایدوب
«ذهنی»ده قصّه‌سینی زینت خوش دفتر ایدوب
چوخ سالوب ذهنینه اوّل‌کی سوزون ازبر ایدوب
من بو سودادن علی ال چکن اصلا دگلم
- یکشنبه
- ۴
- مهر
- ۱۴۰۰
- ساعت
- ۱۵:۱۸
- نوشته شده توسط
- یوسف اکبری
- شاعر:
-
استاد مرحوم ذهنی
ارسال دیدگاه