ای پیمبر تک جمالی مَطلَعُ الاَنوار اوغول
گَل آنان لیلانی قویما حسرت دیدار اوغول
گوستَرور آئینه ی حُسنون جمال احمدی
قاش گوزون، زلفون، یوزون، خالوندی خالِ احمدی
ایلینده آرزو هر دم وصال احمدی
سنله تاپموشدی تسلی عترت اطهار اوغول
ایتموسَن سنده بو شوقیله بو گون عزم جدال
آل پیغمبر فراقوندان اولوب افسرده حال
قالدی گوگلیمده علی اکبر بو اندوه و ملال
قویمادی صد حیف کیم بو چرخ کج رفتار اوغول
ایمدی که میدان عشقه گیدماقا آماده سَن
منده مانع اولمارام گیت ویر باشون جلّاده سَن
یاخشی وقتونده آنان لیلانی سالدون یاده سَن
وار یری اولسام اُلونجه دیده سی خونبار اوغول
زحمتون چَکدیم یِتوردوم من سنی بو حدیوه
باری گَل سنده قسم ویرّم اوغول اوز جدیوه
بیر قاباقیمجا یِری ایلوم تماشا قدیوه
گیت خدای ذوالجلال اولسون سنیله یار اوغول
شوق بزم وصل جانانیله مدهوش اولموسان
باش و جانوندان گیچوب بیله کفن پوش اولموسان
واردی نه فکر و خیالون دلده خاموش اولموسان
بیرجه کلمه باری منله ایله بیر گفتار اوغول
باخ سکینه گور قوجاقلوبدی نه نوعی غم دیزین
بوینی چیگنینده گیدن یولّاریوا تیکمیش گوزین
گیتماقون بُلسه یقین ایمدی هلاک ایلر اوزین
آیریلوق الفاظین هرگز ایلمه اظهار اوغول
باغلودور گوگلوم سرِ زلفون اوغول بیر تارینه
احتیاجی یوخ آناوین ایتدوقی اظهارینه
قویدی حسرت بو فلک سَن تک اوغول دیدارینه
گوندوزوم چون ظلمت شب تک اولوبدور تار اوغول
- یکشنبه
- 4
- مهر
- 1400
- ساعت
- 15:24
- نوشته شده توسط
- یوسف اکبری
- شاعر:
-
مرحوم ثریا تبریزی
ارسال دیدگاه