آلمیشام اذن شهادت وقت هجراندور آنا
گل دویونجا گور منی فرصت بو بیر آندور آنا
آچما باشون یولما زلفون توکمه اشگون دامنه
آغلاما بیر بیله آغلاتما منی قربان سنه
بوندان آرتوق غصّه ویرمه بو یول اُستنده منه
چوخدور اندوه و غمیم آز قلبیمی یاندیر آنا
باخما حسرتله منه باخدوقجا گوز یاشون آخور
آه جان سوزون دل سوزانمی ناره یاخور
تیز مرخّص قیل گیدوم سلطان مظلومان باخور
الّلری قوینوندا دورموش دیده گریاندور آنا
اولما دلگیر اولمادی سو تشنه لب سالدون یولا
راضیم سوز عطشدن گلشن عمروم سولا
عشق قربانی گرک اَلقانیلن سیراب اولا
لایق کوی محبّت تشنه قرباندور آنا
دوتموسان اون سگّز ایل اُلفت منیله ماه و سال
ایمدی هجرانیم سنه بر اَمردور گرچه محال
منّتین زهرایه قوی حقّون منه ایله حلال
خاطری منظوردور خاتون رضواندور آنا
ایسترم بر خدمت عالی ایدم زهرا پسند
اذن ویرسن دوغرانام من قطعه قطعه بند بند
تا اولاخ زهرا یانندا سنده منده سربلند
ایله بر گونه هامی یرگشته حیراندور آنا
یثربه دوشسه یولون ایتسن آنا بیرده گذر
بینوا صغرا باجیم سندن منی آلسا خبر
مرگیمی واضح دیمه مدّتدی که هجران کسر
ناتواندور خسته دور باغلی دولی قاندور آنا
ایلیه هرکیم منه گوز یاشی دنیاده نثار
ایلرم منده شفاعت روز محشر هر نه وار
قویمارام یانسون (شهابی) ایلرم اوددان
نوکریمدور گرچه غرق بحر عصیاندور آنا
- یکشنبه
- 4
- مهر
- 1400
- ساعت
- 15:50
- نوشته شده توسط
- یوسف اکبری
ارسال دیدگاه