ای فاطمه نین قلبینون آرامی حسینیم
ترمیم اِیلین پایهء اِسلامی حسینیم
زینب بو گُوزل قَبریوی مین جَنّته وِیرمز
دنیادَه قالان عُمرینی بو ساعته وِیرمز
قَبروندی بو یا اینکه گُلستانِ وفادی
قَبر اولسادا گُلشن کیمی پُر ذُوق و صفادی
هر دردَه بو قَبرین توزی عالم دَه شَِفادی
بی جا دگی قبرون بو قدر کامه چاتوب دی
بو قَبری دَه زَهرا آنامین روحی یاتوب دی
بو قَبری طواف ایلین ایلر عملِ خیر
عادی نظریله باخانا قَبری دی ولاغیر
من تک باخانین فکری درست ایلسه گر فکر
بو قَبری گورر اوندا نجه عطر فشان دور
واللّهی دیر قَبر دگُول باغِ جنان دور
بو قَبریوی کیم گورمه سه بولمز که نلر وار
بو قَبر حریمین دَه دعالردَه اَثر وار
بو تربتِ پاکون دَه منه کُحل بصر وار
هر کیم آلا آغوشی نه بو خاکیله خشتی
حتماً بو مزارون دان آلار عطرِ بهشتی
من شاکرم االله یتیردی منی مج دَه
بو مَجد و جلالون گتیرور زینبی وَجده
الحق اوُلا زیبندَه دی بو تُربته سجده
بو تُربت اوُلوب قانیویله چون که سر شته
وار حقّی وورا کرب و بلا طَعنه بهشته
بو قَبرون اِیدوب زینبیوی غرقِ تماشا
بولمور نه دیه نه دانیشا ای گُل زَهرا
چوخ سعی ایدورم صحبته نطقیم اولا گویا
سندَن سوروشام یاره لروندَن نه خبر وار
قاسم کیمی مه پاره لَروندن نه خبر وار
بو قَبر کنارین دَه رضا دور اُله زینب
گیت سه وَطنه شامی دَن اِیلر گِله زینب
آمادَه دی بیردَه دوشه چولدَن چوله زینب
امّا بولورم نازلی رقیّه منی گُوزلر
اول کشتهء اوُلادِ اُمّیّه منی گُوزلر
اوّل سویونر قَبریوه هر کیم اوُلا زائر
امّا قییدَن دَه سخلار قلبِ مسافر
گیتسم دَه ولی گیتمز اوُرک دَن بو مناظر
تاپسون سنیله رُتبه مُقدّردی بو قَبرون
آی سهلی دی، گوندنده منوّردی بو قَبرون
شاماته گِیدوب ایلمیشم کشفِ حقایق
هاردان اوُلا بولّم سنه بیر زائرِ لایق
اولسان بو سوزوم دَه منیله سن دَه موافق
نَذر ایلمیشم قَبریوی گورسم سورونم من
بو قَبر کنارین دَه غباره بورونم من
هم دَم منه بو گُوزدن آخان اشکِ بصردی
چخماز بو یادیمدان باشیوی شمر کَسردی
سُنبل کیمی قَبرون دَن اوتور گُوگلوم اَسردی
قَبرون کیمی نه قَبر اوُلی نه بیر بیله درگاه
بو منصبی تنها سنه اِعطا اِیدوب الله
گلمزدی خیاله گُلِ زَهرانی سولیدی
زینب گُوزی فکر ایتمزیدیم بیله دولیدی
اِی کاش رقیّم دَه کناریم دَه اوُلیدی
پَروانه کیمی شمعِ وصالین دَه یانیدی
قَبرون باشینا حسرتیله بیر دولانیدی
ویرانه، دَه نه بیر دانیشاردی نه گُولردی
هر بیر آنا گیزلین دانیشی دی او بولردی
گلسِیدی بو قَبره سنه قربان کسیلردی
من گَلدیم اوزوم رختِ وفانی دیمه سویدوم
یاندی اوُرگیم، روحیمی ویرانه دَه قویدوم
بو شعری (امینی) اوزی بولدی نجه یازدون
جان واردی کلامون دَه، دیمه دوز یولی آزدون
قوی سیدیله گر گُوزدَن آخان اشکی یومازدون
اِمداد اوزی اِیتدی سنه دُردانه رقیّه
ویرانه دَه جان ویردی غریبانه رقیه
- چهارشنبه
- 7
- مهر
- 1400
- ساعت
- 18:34
- نوشته شده توسط
- یوسف اکبری
- شاعر:
-
مجید امینی
ارسال دیدگاه