نجه دوزوم دایانوم گلمیوم فغانه نجه
حسینِ تشنه لَبون اربعینی دور بو گجه
فغان و شیونله نُه فلک دولان گجه دور
آناسی فاطمه نون اشکی قان اولان گجه دور
دلِ جهانی اوُدا درد و غم یاخان گجه دور
امام عصرین اوزه گُوزیاشی آخان گجه دور
خدنگِ غم دلِ پیغمبری دَلن گجه دور
دلن دَه وا ولدا شیونه گلن گجه دور
علی ولیّ خدا بی قرار اولان گجه دور
دوباره اوُدلی دلی پُر شَرار اولان گجه دور
سحر آچیل سا نوائیله نینوا دولاجاق
قیامت عالمی عالم دَه آشکار اولاجاق
نوایه نِی کیمی سکّان آسمان گله جاق
او قَبرِ پاکه نچه دسته کاروان گله جاق
فغانیله جَبَروت اهلی دسته به دسته
زیارته گله جاقلار او توزلی قَبر اوُسته
هامی پیمبر او صحرای ایمنه گله جاق
او آلتی گوشه مَزار اوُسته شیونه گله جاق
بتول حسین آدینی دل دَه از بر ایلیه جاق
عیان او دشتی دَه بیر تازه مَحشر ایلیه جاق
ابُوتراب شه لافتی گریبان چاک
او دشت دَه سپه جاق شیوینیله باشنه خاک
سالوب او قَبره اوزین مُجتبی فغان ایده جاق
دلن دَه قارداش آدی گوزیاشین روان اِیده جاق
یانا یانا گله جاق دل دَه نالهء جانکاه
حسین زیارتی نه جابر اِبنِ عبدالله
پیمبرین قوجا اصحابی درد و غم اوتاجاق
پیمبر اوُغلونا قبرین دَه اربعین دوتا جاق
حسین دیه دیه گوزیاشلی شام اسیر لری
زیارته گله جاق شمر دست گیرلری
رباب اصغره لای لای دیه دیه گله جاق
یواش یواش بالام ایوای دیه دیه گله جاق
عروس اوُد سالاجاق حسرتیله اِیجاده
فغانیله گله جاق اربعینِ داماده
شرارِ حسرتیله لیلی سینه داغلیه جاق
علیّ اکبره پایین پاده آغلیه جاق
سکینه قبرِ حسین اوُسته دل دَه شور و نوا
سیزیلدییوب دیه جاق یانه یانه وا اَبتا
بیوک لر آغلیه جاق خردا قَبردَه یاتانا
لبِ فراتی دَه لَب تشنه قانی نه باتانا
باتوب فغانیله کُلثوم تازه بیر یاسه
سرشگیله سپه جاق سو مزارِ عبّاسه
خدا بولر که نه حاله علی قیزی قالا جاق
اوزون نجه او گوزل مَدفن اوُستونه سالاجاق
دلن دَه ناله اَلن دَه حسین پیرهنی
نه نوعی اوخشیاجاق دور او شاه مُمتحنی
یوزندَه گُوزیاشنی قطره قطره سان ویره جاق
کبود اوُلان بدنین قارداشا نشان ویره جاق
سپهره اوُد سالاجاق آتشِ مَلالن دَن
او قَبره سو سپه جاق اوز سرشک آلن دَن
دویونجا آغلیاجاق گوزیاشین روان ایده جاق
رقیّه حالنی قارداشنا بیان اِیده جاق
حسیننه دیه جاق تیکمه چوخ گُوزوی یولا
خرابه دَه بالام اُلدی سنون باشون صاق اوُلا
ویرنده جان سنی گُوزلردی سینه داغلاردی
باخاردی صاق صُولا حیرتله سینه داغلاردی
قوری یِر اوُسته ویروب جان ایکی قولوندا طناب
باخوب اونا باشا توپراق سپوب بو خانه خراب
او حالتی بالامون اُمّهاتی یاندوردی
سالوب شَراره دلِ کایناتی یاندوردی
اونون او حالی نه تا وار جهانیان، یاناجاق
ولیِّ عصرین اوُلوب اشکِ چشمی قان یاناجاق
مجسم اِیلیه جاق (نجمی) حالین آغلیه جاق
رقیّه وای دیه جاق غم له سینه داغلیه جاق
- چهارشنبه
- 7
- مهر
- 1400
- ساعت
- 18:50
- نوشته شده توسط
- یوسف اکبری
- شاعر:
-
مرحوم نجمی تبریزی
ارسال دیدگاه