گُوزون فداسی اوُلوم ای حسین عَزاداری
که گُوزلرونده اولور قطره قطره قان جاری
دوشور خیاله جفا جو سپهرِ کَج رفتار
که زینبین دوزه له ،بلکه بیردَه پَرگاری
یزید حیله ایله رأفت ایلیوب اظهار
حضوری نه چاغیروب عابدینِ بیماری
آتاسینین باشینی اوُغلونا اِئدوب تسلیم
اونیلا سالدی یولا اهلِ بیتِ اَطهاری
یتیشدیلر او زمان کربلایه گُوردوله کیم
کی کربلایه گلوب دور مدینه زوّاری
قوروب لا چادرِ نیلی ستونی آه دیلی
توکوب دیلر یئره گویا سپهرِ دوّاری
باسوب دی باغرینا جان تک جوان لارین قَبرین
گلوب زیارتِ اَنصاره پیرِ اَنصاری
یازیلدی صفحهء آفاقه نقشِ یا محبوب
جهانی دولدوروب از بس مُحنت آثاری
قوجاق لیب باجی قارداش، آنا اوُغول قَبرین
آلوب آرایه حرم لر مَزارِ سرداری
گزردی قَبرلر اطرافینی حیالی گَلین
بهار بلبلی تک سیر اِئدردی گُلزاری
دیلین دَه زمزمه سی هارداسان عم اوُغلی جان
چاغیر گیلان یانووا بیر جه بو دل اَفکاری
نه وقته جَن دولانوم چوللّر اِیچره سرگردان
دییم دیلیم دَه عم اوُغلی گُویول دَه یا باری؟
اگر مزاری وی تاپسام مجاورون اولّام
کناره آتما منی ای بو بی کسین یاری
یئتیب دماغی نه عطری جوان عم اوُغلوسنون
تاپوب مَزارین اولوب گرمِ نوحه و زاری
قاباق جا دسته ایله زلفینی ائدوب جاروب
سوپیردی قَبرینی سو سپدی چشمِ خونباری
گوتوردی زلفین اوزون دَن دوشوب یوزی اوُسته
اوپردی قَبرینی یاده سالیردی اِقراری
دئدی عم اوُغلی سؤزوم چوخدی، ایله سم تقریر
توکر بهشتی دَه روحون سرشگِ گُلناری
مَطاعِ حُسنه خریدار اولوب باشون دالیجا
دولان میشام باش آچیق دَهنه دَهنه بازاری
منی گُورنده دوه اوُسته کوفی و شامی
سالیب لا یاده کنیزانِ رُوم و تاتاری
دییردیلر هره بیر سوز، ائشیت مَسین قولاغین
یئتیب عزیزی وه بی حدّ ذلّت و خواری
اگر ائدم قره واشلیق منیم آقام سن سن
ئولونجه من سنه یارم کُور اوُلسون اَغیاری
جنابِ سیّدِ سجادَه عرض ائدوب جابر
گرک یولا دوشه سیز سسله نین شترداری
چاتیلدی یوکلری باغلاندی هُودج و مَحمل
سوار اِئدنده بناتِ رسولِ مُختاری
گوروب دی بیر اوجا تل اوُستونه چیخیب کُلثوم
دونوب فراته طرف سسله نیب عَلمداری
تعال یابن ابی، یا أخاه و یا عبّاس
گل ای علی کیمی بی کس لرین پرستاری
گئدیلّه باجیلارون چون مدینیه قارداش
قاباق جا چَک عَلم ای اهلِ بیت غَمخواری
گلیب تزلزله عبّاس قَبری گلدی صدا
یوخوم دی اَل گتیرم من لَوای کراری
یوکُوم آغیردی یولوم چوخ (دخیل) یا عبّاس
رفیقیم آتلی پیاده نئجه چکیم باری
یازاندا ماتمِ قُدّوسیانِ توحیدی
خیالیمین اولا روح القُدُس مدد کاری
- چهارشنبه
- 7
- مهر
- 1400
- ساعت
- 18:54
- نوشته شده توسط
- یوسف اکبری
ارسال دیدگاه