اوج ائتدی شامِ شوم دَن افلاکه غل غله
کرب و بلایه کوچ اِئلین وقته قافله
اَمر ایلیوب یزید که زرّین کجاوه لر
اول بانوانِ عصمته ترتیب ویردیلر
آگاه اولوب دی زینبِ نالان بو قصّه دَن
صبر و ثباتی قالمادی تنگ اوُلدی حوصله
فی الفور گوندروب او زنا زادیه پیام
ظالم اوتان نه داغیدی ویردون گئنه دله
ایله حَیا حسین و ابوالفضل دَن صُورا
زینب نه نوع اَگلشه زر تار محمله
اوُلسون گرک کجاوه لرین اؤرتؤگی قرا
باتسون قرایه کعبه کیمی اهلِ قافله
بولسونله عالم اهلی که بیزلر عزا لیّوق
اوُلسون تمام عالمه واضح بو مَسئله
القصّه شامِ شوم دَن آوازِ الرّحیل
عرشِ بَرینه سالدی اوگون شور و لوله
احرام باغلیوب حرمِ بزمِ کبریا
تا اربعین زیارتنه شام دَن گله
بیر مُرشدِ عزیز قاباقدا اولوب دلیل
ارشاد ائدوب دی تا یته لر فیضِ کامله
اوُلدی او یولدا وردلری ذکرِ یاحسین
گوز یاشلاری اولوب اولارا زادِ راحله
یوخ دور ایشیم نه نوعی گلوب لر او یوللاری
عرض ائلسم مطوّل اولور چوخدی فاصله
بیر سر زمین دَه بویورب میرِ کاروان
بو کاروان نزول اِئده جاق دور بو منزله
بو یردی کربلا حرمِ باطنِ خدا
زوّارِ عشق ایچون داخی طی اوُلدی مَرحله
بیردَن توکول دولر یئره اوُل زائرانِ حق
ایلر امام گوردوله بیر یاندا هر وله
ششگوشه قَبره یوز چوروب دور وِئرور سلام
عرض ایلور ای بو چول دَه باتان قانه ظلمیله
گتدوم غریب عیالوی بو توزلی قَبریوه
بی کس عیالوه دور اوزون خوش صفا اِیله
اوُل مُرقدِ شریفه یئتن وقته اهلِ بیت
صف چکدیله نظامی له چون مدِّ بِسمله
بیردَن ویروبله سس سسه اوُل بی پناهی لر
شاهِ شَهید قَبری گلوب دور تَزلزله
زینب دوشندی قَبری نه آهسته عرض اِئدوب
قربان اوُلوم بو قَبریوه قارداش اویان گله
سندن یتوب دی هر نه بلا نوش دور منه
اولسون قسم بو قَبریوه هئچ اِئتمرم گله
وار دور شکایتیم سنه امّا یَزیددَن
وئرسن اجازه عرض اِئدرم آیری وجهیله
بیر بزمِ عام شام دَه قوردی او بی حَیا
بی کس عیالوی آپاروب دور او مَحفله
روم و فَرنگ ایلچی لری صف صف اَگلشوب
سجادی ساخلیوب دوله بوینوندا سلسله
دوتدی تکبریله اوزی تختی دَه قرار
طشتِ طلادَه باشوی قویدی مُقابله
گاهی شراب ایچوردی گھی اوینیوب قُمار
گه باشوا شَماتت ائدیردی گُوله گُوله
بولدی پیمبر اوُغلوسان امّا اوتان میوب
چوبِ جَفا دوداقی وه ووردی بوله بوله
ضایع ائدوب دی عقلنی چون نشئۀ شراب
سر مست اولوب تاپوب اوزی نه اوزگه مَشغله
فرمان وئروب دی سیّدِ سجاد قتلی نه
آز قالدی بو یتیمه لرون قورخودان ئوله
عُذر ایستورم دیم آتام اوغلی بو سوزلری
زینب باجون بو ظلمی گوروب ئولمیوب هَله
شام اهلى فاطمه قیزیوی اِیسته دی کنیز
حرمت اِئدوبله عترتیوه گور نه رَسمله
اکبر آناسی سالدی اوزین قَبرِ اکبره
سویلوب گلن آناندی نوایه اویان گله
بو نسگلون ئولنجه منى یاندیرور اوُغول
لیلا نه نوع تاب اِئلسون گُور بو نسگله
قلبیم کیمی بو قَبریوی آلموش غُبارِ غم
یوخ بیر نفر بو قَبریون آخر توزین سیله
اِیمدی وَطندَه گوزلوری یول فاطمه باجون
صبح و مَسا توکر سرشکنی نِی تک گَلر دله
حیران گزردی هر طرفی بینوا عروس
گردابِ عشق دَن چیخا بولمزدی ساحله
دامادلیق حمیّتی گویا که جوش ائدوب
بیر قَبری دَن اوجالدی صدا گوئیا بئله
گل بوردایام دولانما گلن چوخ بو وَرطه نی
ای اوخشیان بو دشت دَه شوری دَه بلبله
آز قالدى روحینی اِئده آزاد وجدی دَن
گوردی بو نوعیلن که یئتر لطفِ شامله
عرض ایلدی عم اوغلی بو عالم دَه رسم دور
قاره چکلّه قَبری نه هر کیم جوان ئوله
سن سیز منی اَسیر اِیلدی شمر ظاهراً
زلفون دَه باغلانوب اورگیم بندی بیر تله
بیر باش باشونلا کوفه و شامه چکوب منی
گلدی دیارِ شام دَه مقصودی حاصله
اولسون قسم بو قَبریوه من آغلیان زمان
قمچی وراردی باشی مه زَجریله حَرمله
لیکن سنون یولوندا بولار نوش دور منه
اولسون بو قَبریوه قسم هئچ ائتمرم گله
هر بلبل اوخشیاردی او گلشن دَه اوز گُولون
بیردَن دوروب ایاقه هامی اِئتدی هل هله
یوز قوی دولار تمامی عَلمدار قَبری نه
دشتِ عراقه سالدى نوا شور و غل غله
دولدوردولا سر شکیله چون جام گُوزلرین
سو سپدیلر مَزارِ عَلمداره اشکیله
کُلثوم عرض اِئدوب گئدروخ بیز مدینیه
قربان اوُلوم او اللّریوه آل علم اَله
اَل دَن اَلون فداسی اگر وار خجالتون
غم چکمه ای اِئدن غمی تأثیر هر دله
آلسون حَکم گرک دی حکم دَن قصاصوى
ویرسون جزا بیر اوزگه جزائیله نُوفله
دوت صدقیله (سهیلی) ابوالفضل دامنین
بی شک حَل اولور هر ایشون دوش سه مُشکله
- چهارشنبه
- 7
- مهر
- 1400
- ساعت
- 19:1
- نوشته شده توسط
- یوسف اکبری
- شاعر:
-
میرزا احمد سهیلی
ارسال دیدگاه