اِیلیوب عَزمِ وَطن قارداش عیالِ بُوتراب
قَبروین قربانی زینب اِیلمه نازیله خواب
ای بو هشتادَه یاخین شوریدَه بلبللّر گولی
مُصطفا دل پاره سی زَهرا آناما سؤگولی
تازه دَن ترک اِیلوری هر بیر گُولی اؤز بلبلی
کامی جه بیر بلبل امّا دوتمادی گُولدَن گلاب
گورمیوب بیر بیله عالم خلق اولاندان چرخِ پیر
چوخ چتین اوُلسون بیله بیر عالمه مَحشر نظیر
هر باجی اؤز قارداشین دان رشتهء اُلفت کسیر
هر اوُغول دان آیریلور بیر مادرِ خانه خَراب
بی سبب اوُج ایتموری افلاکه داد و شیونیم
دولموری دُرَّ سرشکِ حسرتیله دامنیم
آلتی گوشه قَبری وه نیلوم علاقم وار منیم
دَفن اوُلوب روحیم بو یِرده ای شهِ عالی جناب
تا جهان وار فرقته اصغر آناسی توش اوُلی
ایسلادور بو علته اشکِ تَری صاق و صُولی
بیردَه مشکل دور دوشه بو غملو صحرایه یولی
وِئر علیّ اصغرین اؤپسون بوغازین نان رباب
هر اوُغول قَبرین آلوب آغوشه گر چه بیر آنا
بیر آنانون حالی نه امّا گرک عالم یانا
بیر یانا هر بیر آنا، لیلای مُضطر بیر یانا
قَبرِ اکبر اوُسته قارداش اؤز اؤزین ایلر کباب
شَرم اولور مانع اوجادان آغلاسین تازه عَروس
اللّری قوینوندا آهسته اِیدر آه و فِسوس
وار یِری احوالی نه یانسا بو چرخِ آبنوس
شُعلهء آهیله چکسه شُعله عَرشِ نُه قُباب
نهرِ عَلقم اوُسته کُلثومین اوجال میش ناله سی
نالهء جان کاهی نون وار عمری جه دنباله سی
داغِ عبّاسیله گلزارِ مُصیبت لاله سی
داغلانوب گورسه گلر فریادَه حالین شیخ و شاب
هر بلاکش بیر مَزار اوُسته دوتوب دل دَن شرار
توشه اَخذ ایلور تُرابِ تیره دل زارو فکار
مندَه بیر قبضه مَزارون توپراقندان یادگار
ساخلارام گُوز کاسه سین دَه تا دَمِ روزِ حساب
حسرتیله قَبر پاکوندان اگر اولسام جدا
شهرِ یَثربدَه گِیدوب ای یوسفِ مصرِ بلا
قَبرِ زَهرا اوُسته سالّام کُوینگون دل دَه نوا
ایلرم مَحشر عیان ای شهریارِ مُستطاب
بیر سنق نِی تک اِیله فریاد و افغان اِیلرم
قان اِیدوب دُرَّ سرشکی رشکِ مرجان اِیلرم
حالِ زَهرانی بو زلفیم تک پریشان اِیلرم
عرض قیلّام یاتما دور ای دخترِ ختمِ مآب
چینِ غم دَن بیر سوری گلدی مَلر آهو آنا
قبری وه جمله سپور گُوز کاسه سیندَن سو آنا
وِیر اجازه من دَه بو قَبره توکوم گیسو آنا
قانیله گر چه اوُلوب دور کوفه شهرین دَه خَضاب
شام دَن گلدوخ ایکی باجی آنا دل دَه الم
اَل دَه بیر تُحفه نه تُحفه مایهء اندوه و غم
من بیر اوُخلی پیرهن کُلثوم بیر قانلی عَلم
نه عَلم نه پیرهن ایجادِ شور و اِنقلاب
ای شَهیدِ کوی جانان وِی ذبیحاً من قَفا
زینبون جانی گُوزل بو قَبری وه اوُلسون فَدا
(حافظی) (نجمی) گجه گُوندوز اِیدور شور و نَوا
ایسته بو قَبره گلوب توکسونله باهم اشکِ ناب
- چهارشنبه
- 7
- مهر
- 1400
- ساعت
- 19:17
- نوشته شده توسط
- یوسف اکبری
- شاعر:
-
مرحوم حافظی تبریزی
ارسال دیدگاه