قلم ایستیر یازا موسی‌ابن‌جعفر
اوره‌ک سسلندی یا موسی‌ابن‌جعفر
آدی مشکل‌گشا موسی‌ابن‌جعفر
سنه جانیم فدا موسی‌ابن‌جعفر
آقا اوغلی آقا موسی‌ابن‌جعفر
امام صادقین نام آور اوغلی
پیمبرخصلت و پیغمبر اوغلی
ابوالرّیحاتینین برتر اوغلی
حسن خُلق و حسینی مظهر اوغلی
گلِ خیرالنّساء موسی‌ابن‌جعفر
اولان ای باب حاجت شیعیانه
او گون‌دن‌کی قدم قؤیدون جهانه
سنه ناسازگار اولدو زمانه
اؤزون ائیله نظر درد نهانه
سن ای درد آشنا موسی‌ابن‌جعفر
سراج روشن اهل طریقت
خروشان چشمه‌ی علم‌و‌فضیلت
ائدن ترویج احکام شریعت
سراسر حِلم و کِظم و معنویّت
مثال مصطفی موسی‌ابن‌جعفر
سخاوت ملکونون سلطانی سنسن
کویرِ مَسکنَت بارانی سنسن
لطافت باغینین ریحانی‌سنسن
بوتون درد اهلینین درمانی سنسن
دئییر هر بینوا موسی‌ابن‌جعفر
بئله ثبت ائیلییب اهل کتابت
وجودینده سالیب ریشه عبادت
سنین صبرین تاپیپ دنیاده شهرت
آلیبسان امتیاز استقامت
آدین کانِ وفا موسی‌ابن‌جعفر
سنیلن چوخ عناده دوردو دشمن
نئجه دام سیاست قوردو دشمن
دویونجاق دیل یاراسی ووردو دشمن
گلِ گلزارووی سولدوردو دشمن
سنی تاپدی بلا موسی‌ابن‌جعفر
آدین مسلم قویان مؤمن نمالر
یالانچی عابدِ پُر اِدّعالر
نمک نشناس و دون و بی‌حیالر
اصول دینینه بی اعتنالر
اولوب دین‌دن جدا ؛ موسی‌ابن‌جعفر
عنادین آرتیریب اهلِ سَعیّه
دوشوبدور بیر محیطِ تنگه شیعه
بویوردی حضرت نفسِ‌زکیّه
گرکدیر شیعه‌لر ائتسین تقیّه
دئدی عبدِخدا موسی‌ابن‌جعفر
سالیبدیر حضرتی دشمن حصاره
دؤزوب جور و جفای بی‌شماره
امامین قلبینه چوخ دگدی یاره
سؤزی درک ائیلییر اهل اشاره
چکیب گؤر نه جفا موسی‌ابن‌جعفر
سالیب زندانه هارون ستمگر
اولوب مأموری بیر سِند آدلی‌کافر
وئریب آزار او مولایه مکرّر
بساطِ ظلمی سِند ائتدی میسّر
دوشوب ائلدن جدا موسی‌ابن‌جعفر
همان زندانه قیرخ پلّه اَنَردی
سیه چال ایچره حضرت گؤرسنردی
گلیب فریاده زنجیر دیللنردی
دیله گلدیکجه گویا سسلنردی
حلال ائیله آقا موسی‌ابن‌جعفر
گلیرفریاده زنجیر اؤز سسیندن
سیزیلداردی امامین ناله‌سیندن
در و دیوار و زنجیر پاره‌سیندن
اوجالدی ناله محبس گوشه‌سیندن
بلایه مبتلا موسی‌ابن‌جعفر
رطوبت یئر قوجا سیّد گرفتار
دولاندی گوندوزی اولدی شب‌تار
قالیب بیرگؤز یاتانلار ایچره بیدار
نماز اوسته دوروبدور عبدّصبّار
ائدیردی التجاء موسی‌ابن‌جعفر
او زندان ایچره پوزقون حالتیلن
اوتوردی رو به قبله رأفتیلن
ایکی قبله مقابل وحدتیلن
دعا ائیلردی بوکیفیّتیلن
دیلینده ربّنا موسی‌ابن‌جعفر
اَلا ای غافرِ کلّ معاصی
وئرن ای یونسه غم‌دن خلاصی
ائدن موسایه لطف اختصاصی
قالیب زندان‌دا پیغمبربالاسی
نئجه اولسون رها موسی‌ابن‌جعفر
الهی یوسفه وئردین نجاتی
ائدن ایّوبه آسان مشکلاتی
یاراتدین ذرّه‌دن سن کایناتی
آییردین یکسره دشت‌وفَلاتی
دوشوب ناحق اودا موسی‌ابن‌جعفر
نه ظلم ائتدی اونا سِندابنِ‌شاهَک
وجودین تازیانه‌ایلن ائدیب حَک
او کافر بی‌مروّت‌دیر بلاشَک
دیین یوخدور امامه کَیفَ حالک
قالیب بی‌آشنا موسی‌ابن‌جعفر
یئدی جبرایله زهرآگین رطب‌دن
وجودی اُود دوتوبدور اُول سبب‌دن
آلیشدی قلبی سوزِ زهر و تب‌دن
دئدی خارج ائدن ای روزی شب‌دن
ائدیر آه و نوا موسی‌ابن‌جعفر
گلِ گلزارِطاها اولدو پرپر
اَسیبدیرگلشنِ زهرایه صرصر
باتیبدور ماتمه اولادِحیدر
اؤلوب زندان ایچینده بیر دلاور
گئییب عالَم قرا موسی‌ابن‌جعفر
اؤلوب زندان‌دا پیغمبربالاسی
یوخییدی اوغلو خویش و اَقرباسی
گلیب دیدارینه زهرا آناسی
قوروب زندان ایچینده بزم یاسی
دئییرمظلوم بالاموسی‌ابن‌جعفر
یازیب پیغامینی بادصبایه
روانه ائیلسین اوغلی رضایه
آتان اؤلدی اوغول تئزگل عزایه
گذارین دوشسه دشتِ کربلایه
دئییر یالیتنا موسی‌ابن‌جعفر
او یئرده یاده سال جدّیم حسینی
صوسوز اَلده ئولن نور دوعینی
گؤرنده قبرِشاهِ مشرقینی
چاغیرگلسین عزایه زینبینی
دئنن‌مظلوم‌بابا موسی‌ابن‌جعفر
- چهارشنبه
- 7
- مهر
- 1400
- ساعت
- 20:4
- نوشته شده توسط
- یوسف اکبری
- شاعر:
-
اکبر ستاری
ارسال دیدگاه