ملامحمد«فضولی»حضرت‌لرینین ماه‌مبارک رمضان‌غزلینه‌تضمین«قیزیل‌قلم‌دن»
اؤن بیر آی سسله‌میشم صدقیله یا حق یا هو
شوقِ وصل‌اییله ووْروب قُمریِ جانیم کوکو
گؤز یاشیم صورتِ گلناره اولوب آبِ وضو
چیخدی شعبان آیی گؤرسندی هلالِ مَهِ نو
((رمضان‌اولدو چکیب شاهدِ مئ پرده‌یه رو))
((مئ ایچون چنگ توتوب تعزیه آچدی گیسو))
گؤرسنیر گؤزلره به‌به رمضان اِعجازی
آز قالیب عاشق و معشوقین آچیلسین رازی
جان گلیب‌رقصه،سماع ائتمه‌دی هئچ آوازی
مئ طلب قیل کی گؤزل ساقی چوخ ائیلر آزی
((بیلدی مطرب کی نه‌دیر حال گؤتوردو سازی))
((بزم‌دن چکدی اَیاغینی صُراحیّ و سبو))
قورولوب بزم ضیافت چوخالیر وَجد و شَعَف
درِ میخانه‌ده اصحابِ وفا باغلادی صَف
ساقی‌لر اَلده قَدَح چرخ وورور بیردی هَدف
باشلانیب رقص و سماع یوخدو داخی جایِ اَسَف
((بزم قانونی پوزولدو نه ایچون چنگ‌ایله دَف؟))
((ییغیشیب ائتمه‌یه‌لر حاکم ائشیگین‌ده غُلُو))
باغلی قالماز اؤن ایکی آی بیزه حکمت قاپی‌سی
هر کیمه ایسته‌سه مفتوح‌دی قسمت قاپی‌سی
خادمِ جمع آچار اُمّته خدمت قاپی‌سی
«فَـتَـحَـیَّواْ» آچیلیب فیض و کرامت قاپی‌سی
((رمضان آیی گرک آچیلا رحمت قاپی‌سی))
((نه روا کیم اولا میخانه قاپی‌سی باغلو))
ختمِ«اَنعام»توتوم یوخسا آلیم فاتحه‌لر
اوخویوم شیشه‌ی جان ایچره سالیم فاتحه‌لر
درِ میخانه‌ده افطاره قالیم فاتحه‌لر
فیضِ افطاری اوباشدانه چالیم فاتحه‌لر
((فتحِ میخانه ایچون اوخویالیم فاتحه‌لر))
((اولا کیم اوزوموزه آچیلا بیر باغلی قاپو))
عارفه لازم و تکلیف‌دی هر دَم‌ده خضوع
عابده لحظه‌ی افطار گؤزلدیر آچا جوع
عاشقه واجب عینی‌دی اؤز عشقینده خشوع
زاهدین عادتیدیر زهدین ائده رَفع و رجوع
((آفتابِ قَدح ائتمز رمضان آیی طلوع))
((نه بلادیر بیزه یارب نه قرا گون‌دور بو))
منتظردیر گؤزوم اُوْل شاهِ جهانین پایینا
قیماز البته‌ده‌کی بیر کیمسه گؤزوندن یایینا
باخماز ایستکلی‌لرین،رنگ و لِسان و سایینا
هو صداسین اوجالاندیر گؤیه پای آل هایینا
((انتظارِ مئیِ گلگون‌ایله بایرام پایینا))
((باخه‌‌ـ‌باخه اَنَه‌جَک‌دیر گؤزوموزه قره سو))
عشقه باغلاندی رَگ و لَحمی فضولی‌نین کیم
واردی هر عصرده خوش فهمی فضولی‌نین کیم
گلدی«ستّاری‌یه‌ده»رحمی فضولی‌نین کیم
وار«قیزیل‌بیرقلمه»سهمی فضولی‌نین کیم
((رمضان اولدو بودور وَهمی«فضولی‌نین»کیم))
((نئچه گون ایچمه‌یه مئ زهدایله ناگه توتا خو))
تضمین:اکبرستاری✍️«قیزیل‌قلم»✍️(۵۹
- چهارشنبه
- 7
- مهر
- 1400
- ساعت
- 22:5
- نوشته شده توسط
- یوسف اکبری
- شاعر:
-
اکبر ستاری
ارسال دیدگاه