سیّدعظیم شیروانی غزلینه تضمین«قیزیل‌قلم‌دن»
مُثَمّن قالبینده(مفاعلن فعلاتن مفاعلن فعلن)
«پیمبرِ دل»
یازیلدی جوهرِ گؤزیاشیم‌ایله دفتر دل
اَلوولو آهیم ایچیندن عیان‌دی آذر دل
یوبانما تئزیئتیش ای شهریار و رهبر دل
اولوبدو گؤر نئجه ماتمکده سراسر دل
هایانداسان سنه قربان‌دی لعل و گوهر دل
قانادلاری کسیلیب یوخدو اوچماغا پَرِ دل
((گَل ای جمالی اولان زِیبِ جان و زیور دل))
((گئدیبدی غارته سنسیز تمام کشور دل))
جهان قان ایچره چالیخلیراوجالدی آه و فغان
دوشوب تلاطمه جان زورقی اورَک‌لر قان
عدالت آختاران انسان قالیبدی سرگردان
ظهور علم چوخ امراضه ائیله‌ییر درمان
علوم عصر ایچینده غریب اولوب قرآن
اؤزون دعای فرج ذِکر قیل امام زمان
((دل صنوبریمیز بید تک اولوب لرزان))
((بلای باد فراقینله ای صنوبر دل))
جمال؛تک؛قد و قامت رسا؛جلالین؛تک
جلال؛تک؛رخ و اخلاق؛تک؛کمالین؛تک
مثال کعبه داشی؛تک‌دی؛ اوزده خالین تک
گونَش ظهوره چیخار حُسنِ ایده‌آلین تک
قمر تَلَألؤء ائدر گؤیده مَه جمالین تک
حدیث عشق اوزون‌دور سنین ملالین تک
((گؤگول‌ده کاش اولایدین نهان خیالین تک))
((آچیلمایایدی داخی روی عالَمه درِ دل))
گئچیر گئجه‌م گونوزوم درد و رنج و ماتم‌ده
گمیم باتیب‌دی لِهَه غرق اولوب درین یَم‌ده
ئورک داریخما توتوب یاندی آتش غم‌ده
سنی اوجا سسیلن سسله‌نیب‌دی هر دَم‌ده
داخی سخاوته اَل باغلی قالدی حاتم‌‌ده
گؤزوم قالیبدی او یَنبوع پاک زمزم‌ده
((یئتیشدی بیر یئره بی‌کسلیگیم بو عالَم‌ده))
((غمین تَرَحّم ائدیب آخر اولدو باور دل))
گَل ای حکیم مُحَکّم اَیا طبیب لبیب
مریض هجره طبابت قیل ای حبیب؛طبیب
اولوبدو ذِکر مداوم بیزه؛حبیب؛حبیب
سن ای انیس جهان قالما اؤز ائوین‌ده غریب
غریب‌لر سنه قربان وصالین ائیله قریب
آلیشدی خرمن جان شعله چکدی حَرّ لهیب
((زلال لعل لبین خضر خاله اولدو نصیب))
((ولیک ظلمت زلفون چکیب سِکندر دل))
یئتیردی موشدولوغی پیک یار ماه جمال
گؤروندو رؤیت فیض نماد استهلال
اولوبدو صائمه افطار وقتی باده حلال
عنایت ائیله اؤزون قالماسین کؤنولده ملال
ئورک باغیندا سن اول باغبان کؤلگه‌نی سال
اوچور سمای وصالین‌ده شاهباز وصال
((او شاهباز دالینجا اوچاردی کبک مثال))
((ولیک سنگ جفاییله سیندی شهپر دل))
سوموک بوغازدا قالیب؛گؤزده خار؛ای سید
گولر دوداغلاریمیز گلسه یار ای سید
قارانلیق ئوتسه یقین گون چیخار ای سید
گونَش پاریلدایاجاق آشکار ای سید
چاتار باشا بیلیرم انتظار ای سید
«قیزیل‌قلم»کیمی لیل و نهار ای سید
((فراق یوسفه اولدون دچار ای«سیّد»))
((گرک‌دی صبر ائده بو غم‌لره پیمبر دل))
- چهارشنبه
- 7
- مهر
- 1400
- ساعت
- 22:14
- نوشته شده توسط
- یوسف اکبری
- شاعر:
-
اکبر ستاری
ارسال دیدگاه