چکنده نقشِ نگینْ حَیِّ‌ذوالجلالِ محمد
ملک‌لره مُتَجَلّی اولوب خیال ِ‌محمد
حَریر و سُنْدُسِ جنّت‌دی سبزه شال ِ‌محمد
اولوبدی مُهرِنبوّت گؤزل مدالِ محمد
((کنارِ لعل ِ‌لبین‌ده سیاهْ خالِ محمد.))
((کِاَنَّ چشمه‌ی زمزم‌ده‌دیر بِلالِ محمد))
تؤکَر شرابِ محبت جمالیمه خُمِ چشمیم
فراق ِ‌عشقینه قان آغلاییب‌دی قُلزم ِ‌چشمیم
گؤزل جمالینی من قؤیمارام اولا گُم ِ‌چشمیم
گزیر همیشه او ماهین سُراغینی اُمِ چشمیم
((چکر بیاضینه مِهرِ منیرِ مردُمِ چشمیم))
((کیم اوْلْ بیاضه چکه صورتِ مثالِ‌محمد))
مَلَک‌لر اولدو،او گل عارضین گؤرَن کیمی حیران
باخاندا صورتینه عاشق اولدو هر آییق انسان
محبتین اِئلییب قلب ایچینده نازیله پنهـان
نِئچه اُویس ِ‌قَرَن‌لر اولوبدی عشقینه قربان
((نَه مِیل ِ‌باغِ بهشت اِئیلَییر نه حور نَه غلمان))
((اگر مُیَسّر اولا دولتِ وصالِ محمد))
سَپیپ جمالینین عطرین گل ایچره گلشنه خالق
بیر آز هدیّه وِئریب عطر ِیاس و سوسنه خالق
مبارک آیه‌لرین‌ده دِئییبْ،دؤنَه،دؤنَه خالق
آچیب‌دی یِئر اوزونه رَحمت اوسته روزَنَه خالق
((بهشت وصفینی کیم بونجا ائیلییر منه خالق))
((مشخص اولدوکی منظوردور وصالِ‌محمد))
حریمِ عشقینه کیم گلمیشوق اراده‌ائیله
محبت اهلی بیزوک قلبِ صاف و ساده‌ائیله
قبول اِئدر اؤزو،خوش‌صورتِ گشاده‌ائیله
سواره‌لَردَه آیاغلاشدیلار پیاده‌ائیله
((حرام اِئدَر بیزه هجرانی شُربِ باده ائیله))
((اولوبدی قانیمیز آیا نَدَن حلالِ محمد))
آلیب‌دی صبریمی دل‌دن منیم او ماه دلْ آرا
اولوبدی مملکتِ جانیما،او،شاه،او،دارا
وار اعتقاد و یقینیم اورک‌ده عالی شعارا
الهی مرحمتینله منیمله ائیله مدارا
((ایشیم‌دی سجده همیشه دوطاقِ اَبْرویِ یارا))
((خمیده قیلدی قَدیمْ حسرت هلالِ محمد))
«قیزیل‌قلم»سؤزو تضمین إئدیب بو حال‌دا سید
غزل یارات‌دی بو تضمینِ ایده‌آل‌دا سید
او پاکْ جدّینه قربان‌دی مُلک و مال‌دا سید
گؤزوم قالیب‌دی هَلَه چشمه‌ی زلال‌دا سید
((صفا‌ایسَهْ غَرَضین کعبهٔ وصال‌دا«سیّد»))
((بَسیندی عشق محمدله مِهرِآلِ‌محمد))
- چهارشنبه
- 7
- مهر
- 1400
- ساعت
- 22:16
- نوشته شده توسط
- یوسف اکبری
- شاعر:
-
اکبر ستاری
ارسال دیدگاه