مدَّ نظردَه عمّه جان نورِ خدادی گورسنور
حیرته دوشمه جلوهء طورِ سنادی گورسنور
عمّه بو نور او نور دور اوُلدی کَلیمه جلوہ گر
گورجک او نوری غش اِیدوب دوشدی کَلیم بی خبر
نورِ جمالِ حق دور گورمز او نوری هر بصر
کشفِ بصیرت ایلین گوزدَه جَلادی گورسنور
عمّه بو نور دور ویرن نیّرِ اَعظمه جلا
کسبِ شرف بو نوری دَن ایلیوب عرشِ کبریا
فخر بو نورِ پاک دَن تاپدی مَلائکِ سَما
آیهء نور مظهری ضوء ضیادی گورسنور
عمّه بو نورِ اَنوره مطلع آتام مزاری دور
سسلر اوز اهلبیتینی نورِ صلای جاری دور
عطر که چولقیوب چولی تربتِ مُشگباری دور
جانه حیات قلب دَه ذُوقِ صفادی گورسنور
گور نه شمیمِ جان فزا عظمِ رَمیمه جان ویرور
نکهتِ بادِ صبحدم مژدهء دل ستان ویرور
شاهِ شهید قبرینی عمّه بیزه نشان ویرور
خضر خُجسته پی دی نه بادِ صبادی گورسنور
آغلاما سیل گُوزون یاشین دقتیله باخ عمّه جان
خونِ قتیلِ عشق ایدوب گور نجه طفی گُلستان
مژده ویر اهلِ بیتی نه ایتمیه لر داخی فغان
مقصدی میزدی منظرِ خیر نسادی گورسنور
یولما بو قدر زلفیوی آغلاما بیر تسلّی تاپ
دردَه گتورمه دللّری داغلاما بیر تسلّی تاپ
صبر و تحمّلین یولون باغلاما بیر تسلّی تاپ
گر چه محلِ ناله دور کرب و بلادی گورسنور
دوزدی مُصیبت اِیلیوب خون جگر آغلا دور سنی
یاده دوشوب دی غم لرون سر به سر آغلادور سنی
گوزدَه عیاندی گوردوقون ظلم لر آغلادیر سنی
هر طرفه باخاندا بیر نوعِ جَفادی گورسنور
عالمِ فکردَه باخان گُوز گینه گوردوقون گورر
سرّی بو دور که بو یِره تا ساتاشوب دوشر نظر
چوخ یارالی بدن گورر سو کیمی قانه غُوطه ور
سطحِ فضادَه ایمدیدَه باشدی جداده گورسنور
گاه نظردَه مُرتسم دور دوزولوب سپاهِ شام
غارته اَل آچوب سویار آل پیمبری لِئام
گاه به عینه گورسنور ظلم اوُدی نا یانار خیام
دودِ شراریله دولوب سطحِ فضادی گورسنور
درد و غمون فداسیم ایتمه بو قدر آه زار
گور نجه قیزلار آغلاشوب حسرتیله سنه باخار
سن بیله آغلیاندا بس خردا اوشاق لارا نه وار
آز قالوری هلاک اولا آلِ عَبادی گورسنور
یارب اولور که (ذهنی_ده) بیر گوز آچوب دوروب باخا
قبّهء اَنورین گوروب گوز یاشی اتّصال آخا
اَل دَه قلم یازا یازا عالمی یاندوروب یاخا
دوره دَه اهلِ دسته نون اَل دَه لوادی گورسنور
- جمعه
- 9
- مهر
- 1400
- ساعت
- 13:7
- نوشته شده توسط
- یوسف اکبری
- شاعر:
-
استاد مرحوم ذهنی
ارسال دیدگاه