بوشلا رقیّه قبرینی فاطمه گِئتدی کاروان
زینبون آلما صبرینی ایلمه بیر بیله فغان
یولّانوری قطاری میز حسرتیله مدینیه
دور گِیداق اوُل کجاوه دَه مونسِ دل سکینیه
باش داشینی رقیّه نین باسما بو قدری سینیه
آز باجی باجی دئ قیزیم عمّه وی اِیتمه باغری قان
منده بو وضعِ حالتون قویمادی طاقت آغلاما
گُوز یاشوی بو نوعیله گُوزدَن عذاره باغلاما
قلبیمی داغلیوب فلک سنده دوباره داغلاما
توپراقا قویما صورتون گُوز یاشون ایلمه روان
آغلاما وقتی وار گلوب ناله و داده آغلاروخ
جمله سالوب رقیّه نون حالینی یادَه آغلاروخ
سس چکروخ میدنه دَه بزمِ عَزاده آغلاروخ
اوندا که فرصت ایلدوخ منزله یتدی کاروان
یثربه یتدوخ اوندا که بزمِ عزا گرک قوراخ
کاسۀ چشمی دم به دم اشکیله جمله دولدوراخ
آهیله عرش بامی نه بیرقِ درد و غم ووراخ
شورش حشرِ اَعظمی دَهردَه ایلیاخ عَیان
سالّام او بزمِ غم دَه من یاده سوسوز حسینیمی
قاننه ظلمیله باتان گُول کیمی نور عینیمی
قوزارام عرشه فرش دَن ناله و شور و شینیمی
عرش دَه سس چکوب اِیده حالیمه ناله قدسیان
هر کس او بزم دَه سالار یادینه اوز عزیزینی
چشم خیالدَه گورر پیکرِ ریز ریزینی
دَم به دَم اشگه دولدورار دیدۀ اشکریزینی
بیر بیره آلِ مُصطفا درد دلین اِیدر بیان
لیلی سالاندا یادینه شوریله اوُغلی اکبری
بختی قرا رباب اِیدَن وقتده علی اصغری
سنده او بزمِ غم دَه سال یاده بو زار و مُضطری
اشکوی توک عُذاره دئ شوریله باجی باجی یان
بیردَه اگر گذاری میز دوشسه بلا دیاری نه
اهلِ مَحبتین اوُلان طرفه او لاله زاری نه
گول کیمی تشنه دوغرانان قارداشمون مزاری نه
شرح ایلمه رقیّه نون حالینی دل دَه قیل نَهان
ساخلا بو اشکِ حسرتی قبر علیّ اکبره
ایله نوا او دشتی دَه شبه رُخِ پیمبره
سنگِ مزارِ اکبری ایله گوزون دَه مَنظره
گوزدَن عذاره خونِ دل شوریله باغلا آغلا قان
(نجمی) بو غم دَه وار یِری آغلاسا حشره دین گُوزون
شامه دونوبدی مُحنتِ شام دَه گر چه گُوندوزون
بس دی بو یِرده ساخلا اَل یازما که طول اولار سوزون
چیخما کناره رشته دَن قوی قلمی یِره دایان
- جمعه
- ۹
- مهر
- ۱۴۰۰
- ساعت
- ۱۳:۱۱
- نوشته شده توسط
- یوسف اکبری
- شاعر:
-
مرحوم نجمی تبریزی
ارسال دیدگاه