خلق جهان سراسر مشغول دور عزایه
گویا دوتوبلا ماتم پیغمبرِ خدایه
چون حجّة الوداعی درک ایلدی او سرور
مشتاق اولوب لقای حقه حبیب داور
امر ایلیوب مهاجر انصاریله برابر
حاضر اولوب حضور پرنور مصطفایه
بیر نوع اؤز وفاتین اصحابینه او حضرت
اظهار ائدوب بویوردی آگاه اولون جماعت
وار بیر سفر نظرده یتدی زمان رحلت
بو عاریت سرادن سر منزل بقایه
باقی سیزون یانوزدا ایکی امانتیمدور
بیر مصحف الهی بیرده اؤز عترتیمدور
اولادیمه مودّت اجر رسالتیمدور
حقّینده اهل تبیین نازل اولوبدی آیه
مندن صورا مبادا آل رسول دلدن
چکسون اذیت ائتسون شکوه بتول سیزدن
هئچ بیر عمل یانیمدا اولماز قبول سیزدن
صدقیله وورماساز چنگ دامان مرتضایه
ترک ائتدی بو جهانی اول گون که شاه بطحا
قویدی منافقین امت بنای شورا
تا ائتدیلر سقیفه هنگامه سین مهیا
بو اختلافی اوّل او سالوب آرایه
چون دست قدرت حقّ وقف اولدی آستینه
بی دست و پاگروهین فرصت دوشوب الینه
دست جسارت آچدی بیر نوع اهل کینه
ووردی شراره باب ناموس کبریایه
درگاه مصطفاده یاندوردی نار ظلمی
کرب و بلایه کم کم گِتدی شرار ظلمی
اولدی سنان الیله گه آشکار ظلمی
گه شمردن خطاسی ظاهر باخون خطایه
مقتول یوم الاثنین عنوانی آشکارا
اولدی اوگون که جبراً غصب اولدی حقّ زهرا
غصب ائتدیلر فدک تک نهر فراتی اعدا
فریاد العطشدن شیون چخوب سمایه
گوردی امام مظلوم سوز عطشدن اطفال
دلدن دوشوب تماماً اصغر اولوبدی بی حال
قنداقینی او طفلین آلدی ال اوسته فی الحال
دوتدی یوزین او قوم بی شرم و بی حیایه
ای قوم دون گورور سوز اصغرده قالمیوب تاب
منع ائلیوب بو چولده آل رسولدن آب
گر ائتمه سوز بو چولده بو شیرخواری سیراب
عذروز ندور جماعت محشرده مصطفایه
تا حرمله ائشیتدی بیر اوخ قویوب کمانه
سسلندی یاحسین سو اولماز ولیک قانه
اصغر منه قوناقدور قویدی او دم نشانه
آی قرصی تک بوغازین بیرناوک جفایه
حلق لطیف اصغر اولدی نشانه ی تیر
بازوی شاه دینه اولدی خدنگ جاگیر
گوردی اوخون یریندن قانی اولور سرازیر
اوجوندا دوتدی خون پاکی آتوب هوایه
عرض ایلدی الهی قالسون بو قان امانت
محشر گونی بو قاندور سرمایه ی شفاعت
بوندان زیاده یوخدی دلده«حقیر»طاقت
الده قلم سیزیلدار نی تک گلوب نوایه
- جمعه
- 9
- مهر
- 1400
- ساعت
- 13:19
- نوشته شده توسط
- یوسف اکبری
ارسال دیدگاه