ویروبلر زهرکین گل گور بونالانه حسین قارداش
شرارظلمیله فلبیم دونوب قانه حسین قارداش
گل ای اولان غم آشناسی
بیردرده دوشدوم یوخ دواسی
.
جفا وجوراعدادن داخی صلب توان اولدی
یانوب قلبیم شرار زهریله چون غنچه قان اولدی
بهارعمرومه باد خزان اسدی خزان اولدی
گوزوم قالدی داخی حسرت گلستانه حسین قارداش
.
اولوب دورچشم پر اشکیم سنون دیداریوه مایل
گل اگلش بیرکناریمده اولوم مقصودیمه نایل
ایدوم بووصلیله دلده اولان اندوهیمی زایل
ایدورچون چرخ دوران توش هجرانه حسین قارداش
.
منی اوزبزمینه جانان حسین قارداش ایدوب دعوت
گرکدور تزگیدم تأخیره یوخ دورالده بیرفرصت
گل اگلش باشیم اوستونده ویروم جانانه جان راحت
اولوبور مرغ روحه تنگ کاشانه حسین قارداش
.
جهاندا رسم دور دردی اولان یولداشی چوخ ایستر
خصوص اولسا محبّت اهلی گر گوز یاشی چوخ ایستر
بولر عالم که قارداش مهربان قارداشی چوخ ایستر
سنون تک گلمیوب قارداش بو دورانه حسین قارداش
.
چتین دور اهل دال دلداریدن گر ال اوزه قارداش
توان وتاب ایدوب ایا م هجرانه دوزه قارداش
بو آخر دمده گل منله قویاق بیر یوزیوزه قارداش
یتوب ایام وصلت چون که پایانه حسین قارداش
.
جفای زهرمنیم الدن قرار وصبریمی آلدی
بلالی زینبیم باشه بومحنت ده قرا سالدی
ستمله قاسم وعبداللهیم قارداش یتیم قالدی
توکللر اشک حسرتله یتیمانه حسین قارداش
.
یانوب احوالیمه آغلا جهانی دل کباب ایله
گوزوندن دم به دم جاری عذاره اشک ناب ایله
یتیم اطفالمون سن اول پرستاری ثواب ایله
بو فعلون خوش گلر خلّاق سبحانه حسین قارداش
.
گرک دورهرگلستانی خزانه چرخ توش ایتسون
بساط عیشینی پوزسون زمانه قاره پوش ایتسون
هامی ذی روحه لازمدی شراب مرگ نوش ایتسون
که قالموب بیرکسه بو دار ویرانه حسین قارداش
.
فقیرو شاه وعالم جاهل وهم عالی ودانی
گرکدور طی ایده هر شخص سالک راه عقبانی
بقاسی یوخدی واضحدور فنادورعالم فانی
فنایه باغلاماز بل شخص فرزانه حسین قارداش
.
سبوی عشقیدن (هوشی) حسین آب حیات ایستر
توکر گوز یاشینی روزحسابه بیربرات ایستر
تابی یوخ یانماقا قارداش جهنّمدن نجات ایستر
اوزون ایله اونا بیرلطف شاهانه حسین قارداش