باش گوتور بو قبردن ای قانینه باتان یارالی
گلدی زینبون سفردن قامتی کمان یارالی
.
آتش فراقه یاندوم چوللری گزوب دولاندیم
اشقیای شام اَلیندن داد و اَلامان یارالی
.
.
قویموشام قدم اوگون که عرصۀ جهانه قارداش
تیر محنت و بلایه اولموشام نشانه قارداش
قدّیمی ایدوب خمیده گردش زمانه قارداش
غصّه دن آغاردی زلفوم باغریم اولدی قان یارالی
.
.
من کیمی باجی جهانه گلمیوبدی بیرده گلمز
وار سنه نجه علاقم خالقمدن اوزگه بولمز
آغلارام یوزوم جهاندا حشر اولونجا بیرده گولمز
ذکریم اولدی وای حسین وای واردی تا جهان یارالی
.
.
کیم بولر نه حاله قالدوم سندن آیریلان زماندا
وار دُوزَن مگر منیم تک هر بلایه بو جهاندا
هانسی باجینی دویوبلر قارداشندان آیریلاندا
باشمه ووراردی قمچی شمرله سَنان یارالی
.
.
دین بولوندا منده سن تک دوزموشم گَلن بلایه
شرکت ایتموشم سنیله ماجرای کربلایه
هانسی بیر باجی برادر دُوزدی من دُوزَن جفایه
دوتدی قاتلین اَلیندن هانسی مهربان یارالی
.
.
نیلیوم شکسته گوردوم حالوی من شکسته
دوزمدیم او حاله قارداش فکریم اولدی بسکه خسته
شمری من نجه گورِیدیم اگلشوبدی سینَن اوسته
الده خنجری ایاقدا قانلی چکمه جان یارالی
.
.
شرع و دین ده جهاده گر اولِیدی حقِّ نسوان
یوخسا شمری من قویاردوم اُلدوره سنی لب عطشان
حیف اولا که قولّاریمی باغلاموشدی حکم یزدان
باخدوم آغلادوم حسینم جان ویرن زمان یارالی
.
.
کوفیان بولوردی ظلمون پایه سین تمامه سن سیز
عترتون اسیر اولوبلار اشقیای شامه سن سیز
سعدون اوغلی حکم ویردی غارت خیامه سن سیز
بیر قیامت اولدی قارداش آغلادی سویان یارالی
.
.
خیمه لر یاناندا دوشدوم ششدر بلایه قارداش
عترتون اود ایچره گلدی نِی کیمی نوایه قارداش
شیونیم اوجالدی عرشه گلمدون هرایه قارداش
یوز قویوب چوله قاچاردی معجرین آتان یارالی
.
.
نچّه مین شقی جماعت غارته اَل آچدی بیردن
غارته گلن قُشوندان خیمه گاهی دوتدی شیون
قورخودان یتیم اوشاقلار چوللری ایدردی مسکن
اولمادی بیری او ساعت یادینه سالان یارالی
.
.
قیزلارون شکسته حالی صبری اَلدن آلدی قارداش
نوعروسی کعبِ نیزه گور نه حاله سالدی قارداش
سویگلی قیزون رقیه آت دوشونده قاچدی قارداش
آتلیه سلام ایدردی یعنی قورخودان یارالی
.
.
بیرگیجه بو چولده قالدوخ آه و اَلامانه گلدوخ
صبحه تک یانان چادردا درد اَلینده جانه گلدوخ
آغلاشاندا خوردا قیزلار ناله و فغانه گلدوخ
مجلس عزایه گلدی فاطمه آنان یارالی
.
.
من سنون یولوندا قارداش هر مصیبته دایاندوم
دوشدوم عترتون دالیجا چوللری گزوب دولاندوم
سالدیلار خُمِ بلایه رنگ صبرله بویاندوم
فاطمه آنام دیموشدی صبر ایله دایان یارالی
.
.
قورتولوبدی جور دشمن ظلم اهل کینه قارداش
شامدن اولوب عیالون عازم مدینه قارداش
گلموشوخ اَزل بو توزلی قبره اربعینه قارداش
آغلیاخ دویونجا یوخدور بیزلری ووران یارالی
.
.
سن کسوک باشیله گلدون مجلس یزیده دیده
منده گلموشم بو توزلی قبرون اوسته بازدیده
حیف اولا بو آز زماندا قامتیم اولوب خمیده
جور خارله اولوب دور گللریم خزان یارالی
.
.
رسم دور باجی گلنده اربعینه دل شکسته
دوره سین آلولّا یکسر قوم و خویش دسته دسته
مشعل عزا قویالّار قارداشون مزاری اوسته
باجی دور ویرور تسلّی دوره سین آلان یارالی
.
.
زینبون خرابه یرده هر مصیبته دایاندی
هر بلا و هر مصیبت چوخ چتیندی چوخ یاماندی
مطلبی سوروشما قارداش من خجالتم اماندی
جان ویروب خرابه یرده سویگلی بالان یارالی
.
.
بو قیزون رقیّه دائم یاندورب منی یاخاردی
متّصل باشی دیزیمده انتظارله باخاردی
بیر نفر اوشاق گورنده گوز یاشی یوزه آخاردی
اشک حسرتین ایدردی عارضه روان یارالی
.
.
بیر گیجه خرابه یرده گوردوم آغلوری رقیّه
سیل اشکنی عذارِ زرده باغلوری رقیّه
سورتوری یوزون ترابه سینه داغلوری رقیّه
سسلوری ای عمّه جان دور یاتما بیر اویان یارالی
.
.
باغریما باسوب بالامی سیلدیم اشکنی یوزوندن
ایمدی ده یانوبدی قلبیم او یتیمه نون سوزوندن
سویلدی نَدن سالوب دور قارداشیم منی گوزوندن
گلموری عیادت ایتسون اکبر جوان یارالی
.
.
چیخموری حسین یادیمدان نیسگِلی اورکده چوخدور
زینبه بو غملی مطلب نیزه دور قلیجدی اوخ دور
غسلونی ویرنده گوردوم صاف یری بدنده یوخ دور
تازیانه یرلریندن وار هله نشان یارالی
.
.
آبله ایاقلاریله گزدی چوخ پیاده قارداش
اولمادی رقیّه صد حیف ایمدی کربلاده قارداش
بیر «رجائیله» دایاندی دوزدی هر بلایه قارداش
سس سه ورِیدی منله شامده یاتان یارالی