دیار شامیدن گلدیم اورکده مین ملالیم وار
خجالت چکمه دور قارداش باشیمدا چوخ جلالیم وار


هله فکر ایلمه تک گلمیشم بو غملو صحرایه
جلالیلن گلوبلر عترت طاها بو مأوایه
گئجه گوندوز پرستارم ربابه أم لیلایه
یانیمدا قرخ نفر عورت اوشاق، باشی بلالیم وار


منی بو غملو صحرایه چکن شوق وصالوندور
حسین جان پیشواز ایله گلن اهل و عیالوندور
خمیده قامتیلن گلمیشم وجهی ملالوندور
سوروشسون حال زینبدن غریبه شرح حالیم وار


گئدنده شامه گوردوم پیکرون عریان جراحتدور
گمانیم سایبانه اولمادی زینب خجالتدور
ورولموشدیم سویولموشدیم بو بیر اعظم مصیبتدور
خیال ائتمه کئچن ایّاملر تک ترمه شالیم وار


اورگون یاره سی بیلّم ساغالماز تا دم محشر
چکیلمش سینه ی مجروحیوه داغ علی اکبر
بدنده چوخ یارون گوردوم ووروبلار نیزه و خنجر
نجه دور جسمیده یارون اونی سندن سؤالیم وار


دلیم گلمز دیم قارداش سکینون نازپرورده
خرابه گوشه سینده وئردی جان یاتدی قوری یرده
یانار زینب نه قدری عمری وار بو نسگل و درده
همان غمدن یوزومده قانه دونموش اشک آلیم وار


تمنّا ایلورم سندن حسین گلمیش اله فرصت
سوروشسون حالیمی قارداش اولور بو جانیمه منّت
بونی بیلّم باشون یوخدور بدنده ائتمگه صحبت
نه چاره ایلیوم آخر منیم صحبت خیالیم وار


سینه م گنجینه سی آکنده دور درد اسارتلن
نه لر چکدی باشیم غارت گونی قوم قساوتلن
دایاندیم قمچی آلتیندا من روح رشادتلن
میسّر اولمادی اول گون ولی ایندی مجالیم وار