هایاندا قوش تک ایلدون سن آشیانه آی ننه
محالیدور یولون دوشه بو دودمانه آی ننه
بابام که رحلت ایلدی ایونده امنه یتمدون
قوناقلیقا نه گلشنه نه باغه سیره گیتمدون
بو ایکی آی یانیمدا سن گلوب تبسم ایتمدون
گوروم تبسم ایتمسون لب زمانه آی ننه
نه سرو گورمیوب فلک او قامت وزین کیمی
نه رحمسیز بشر گلر او قنفذ لعین کیمی
چوخ ایوده تای دوشون سنون گزور هله گلین کیمی
مزاره قنفذ ایلدی سنی روانه آی ننه
ویرنده غسلوی آتام ایدنده جسموه کفن
ایلیکه گیدی خلعتین او ضربه لر گورن بدن
نظاره ایلدیم اوزوم بویووا دقتیله من
کفنده هیچ یاراشمیور تزه جوانه آی ننه
یتیم اوشاقلارون آنا نه سختمش زمانه سی
سنه بو زینب ایلسون گلایه یوخ بهانه سی
بو رسم روزگاردور قوشون یاناندا لانه سی
اوچوب او لانه دن گیدر بر آیری یانه آی ننه
هایاندا عندلیبدن گل اوسته خوش ترانه وار
او یرده اوچی وار و یا زمیه سی خزانه وار
هر ایوده شور حق وار صفای عاشقانه وار
فلک تز آیریلیق اوخون قویار کمانه آی ننه
یتشدی جانی بر خطر بو غملی خانوادیه
دچار اولوب بیوک کیچیک بلای فوق العادیه
ایدردی غبطه ماخلق آتامدا که ارادیه
همین اراده صاحبی دویوبدی جانه آی ننه
بو غملی منزله آتام نمازدن گلن زمان
قاپودا مکث ایدور بر آز ایدور نظاره ناگران
گورور نه غملی منظره بزه دیمور او باغریقان
یقین یارالی سینه دن قالوب نشانه آی ننه
روا دگولدی بو ایوی صدای الامان دوتا
هوایه توستی قوزانا فضاسنی دومان دوتا
یتیم اوشاقلارون سنون عزای جاودان دوتا
یانان قاپون اولوب بیزه بیوک بهانه آی ننه
قرا گونه قالان قیزون شرار غمده اودلانور
کیچیکده اولسا زینبون مطالبی گوزل قانور
محل دفن محسنه گوزوم دوشور اورک یانور
نه غملی آستانه دور بو آستانه آی ننه
نباته چکسون آرزو گوروم مدینه داغلاری
یتورمه سون شقایق و نه لاله غملی باغلاری
غروب وقتی ایولرون یانان زمان چراغلاری
منمده قلبمون اودی چکر زبانه آی ننه
- جمعه
- ۹
- مهر
- ۱۴۰۰
- ساعت
- ۲۲:۰
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه