قتلگهده بویادی زلفون آنان قانه اوغول
گلدی خولی ایوینه شام غریبانه اوغول
منه تودیعه گلندن سن ایا سبط رسول
گزورم چوللری آردونجا گوزی یاشلی ملول
ایتموسن هاردا بو یوللاردا سن اجلال نزول
اوردا من دلده آدون گلمیشم افغانه اوغول
کربلا دشتینه چکدی منی دردین هوسی
مخیمونده واریدیم عمریون آخر گجه سی
خیمه دن عرشه چخاندا باجوون ناله سسی
من اوزوم همدمیدیم زینب نالانه اوغول
آخر عمرونده قویاندا یوزوی توپراقا سن
دوشه میشدیم بوغازون آلتنا آق زلفمی من
الینی گوزلریمه قویدی آتان شاه زمن
دوشمیه تا نظریم خنجر برّانه اوغول
دیمه بیر لحظه سنی گوزدن آنان آتمیشدی
قانه هر بیر یارادان که بدنون باتمیشدی
یاره لر قانی منیم زلفمی ایسلاتمیشدی
سن کیمی اوردا بلشمشدی آنان قانه اوغول
مَصرعونده بلیمی بوکدی منیم لشکر شام
عمریون گیچدی چراغی گونوز اولدی منه شام
گون گیمی گیچدی باشون نیزیه گون اولدی تمام
چکدی قان لخته سی پرده خُورِ رخشانه اوغول
گیجه نین ظلمی گونوز ظلم لریندن باشیدی
هله گوندوز یاخیلان قانیله زلفوم یاشیدی
او بدن که کفنی نیزه قلج اوخ داشیدی
اوزگه ظلم ایتدیلر اول پیکر عریانه اوغول
ساربان اولدی سبب قانه دؤنن گوز یاشما
اللرون کسدی دوتوب قانوی یاخدیم باشما
گلمدیم دشمن بیرحم ایوینه اوز باشما
گتدی عشقون منی بو کوفهء ویرانه اوغول
بلمیوب کوفه لیلر قدریوی من بولَّم اوغول
هر یره گیتسه باشون دلده آدون گلَّم اوغول
کول دولوبدور گوزیوه زلفمیله سیلَّم اوغول
آناوی عشقون ایدوب گور نجه دیوانه اوغول
گوندوزوم شامه دونوب سنسیز ایا صبح ازل
کیم سالوبدور سنی بو حاله اولا اللری شل
یاتما نازیله کول اوسته بالا دور سینمه گل
قویما اوج ایتسون آنان ناله سی کیوانه اوغول
سن بو ماتمزدهء خونجگره سویگلوسن
جور خاریله سولان گلشنیمون بیر گلی سن
یارالی سینه مه ترجیح ویروبسن کولی سن
گلماقون سینه مه منّتدی گینه جانه اوغول
سن اوغول اوغلی اُلن قلبی یانان بیر آتاسان
من اوغولسوز آناوی حاش گوزوندن آتاسان
نه گلوب سینهء زهرایه کول اوسته یاتاسان
کول اولا مردمک عالم امکانه اوغول
گلمیشم آچگوزون ای برج امامت قمری
آناوون گور نجه رخساره آخور اشگ تری
یوخوموش خولی بی رحمده انصاف اثری؟
بو نه منزلدی ویروب سن کیمی سلطانه اوغول
سینمی تیر غمه هر غمون آماج ایلیوب
منزلون دشمن ایوی، صبریمی تاراج ایلیوب
چرخ آیینه نی خاکستره محتاج ایلیوب
کوله محتاج اولا بو چرخ ذلیلانه اوغول
ای جمال اللهه آیینه رخ انوریله
سیلینن گرد رخی صورت پیغمبریله
دوزدی گردون سیلر آیینه نی خاکستریلن
نه بو آیینه نه بو کول نه بو کاشانه اوغول
اولا هر ظلم و ستم دهریده مظلومه چاتار
غم اوخی غملر الیندن دل خونینه باتار
میزبان رذل اولا مهمانی کول اوستنده یاتار
گوشهء مطبخ اولار مأمن شاهانه اوغول
سخیلار اوچی الیندن یارلی قوش بوداقا
جبر ایدر شاهی پناهنده محقَّر اطاقا
لیک ویرمزله مکان کنج تنوری قوناقا
حتک حرمتدی بو یر، سن کیمی مهمانه اوغول
بودی دنیانین ایش خوار ایده هر سوگلینی
داغیله غنچه اَكَن لالهء نعمان دلینی
آفت باد خزانه ویره گلشن گلینی
هر بهار آغلار اودور ابر، گلستانه اوغول
بسلدیم من گل طاهانی دل اوستنده بالا
خاره یالوارمشام آخر بو گل اوستنده بالا
یارالی صورتوی قویما کول اوستنده بالا
حیفدور گل دوشه خاکستر سوزانه اوغول
بوغازوندا باخورام زخم مکرر یرینه
حنجرونده یانورام اون ایکی خنجر یرینه
گور دوزر هانسی آنا اولسا بو منظر یرینه؟
توکمز اشگ بصرین من کیمی دامانه اوغول؟
گزدیم ای یوسف گمگشته سراغونده سنون
تاپدیم آخر او چوخور یرده یارالی بدنون
گوندرم غصه لی یعقوبوه بو پیرهنون
تاپمادیم، جبرأ آپارمشدیلا تالانه اوغول
پیکرون بنزوری گوردوم یازیلان قرآنه
جلدی یوخدور داغلوب هر ورقی بیر یانه
من باخوردوم او داغلمش بدن عریانه
گوردوم اول جسمده گلمور یارالار سانه اوغول
ایتموسن عهد اَلستونده بلایانی قبول
او بلایا که اونا واله و حیراندی عقول
داغیدوب ناطق قرآن بدنین سُمّ ِ خيول
برده شیرازه وورولماز بیله قرآنه اوغول
قان ایدوبدور یارالی قلبوی قارداش یاراسی
باشدا شمشیر جبینونده اوغول داش یاراسی
قاریشوب بیربیرینه داش یاراسی باش یاراسی
آناوون قانه دونر گوزیاشی گور یا نه اوغول؟
قان سریرینده یاتوبسان یارلی پیکریله
سایه سالمش سنه اوخلار قوشی شهپرلریله
اهرمن ال تاپوب انگشتوه انگشتریله
آچیلوب غارت الی دست سلیمانه اوغول
گیتمز ایستکلیسی ایستکلیدن عالمده یانش
دیندیرر خوش دلیله هر کیمی دیندیرسه تانش
چوخدی غصّم بلوسن گوگلومی آل بیرده دانش
آشنایم دگلم من سنه بیگانه اوغول
منزل ذهنی سائلده بو اشعاری یازان
صابر و حافظی و نجمی و سعدیّ ِزمان
مسگر و رنجبر و و سالک و طهباز جوان
اولدی بانی حسنینیله بو عنوانه اوغول
بیزه نوكردی بولار شاهه تیکر گوز نوکر
اودی گوز یاشلی هره درد دلین عرض ایلر
جمله سی دردینه درمان و زیارت ایستر
دعوت ایله اولاری وقفهء قربانه اوغول
- یکشنبه
- 11
- مهر
- 1400
- ساعت
- 19:16
- نوشته شده توسط
- یوسف اکبری
- شاعر:
-
مرحوم حافظی تبریزی
ارسال دیدگاه