«آپارما خیمیه قارداش داخی رضا دگولم
مسافر خجلم رسمه آشنا دگولم
سکینه خدمتینی جابجا ایدنممیشم
گوتور بو آدی که سقّای کربلا دگولم
هامی شهید لره یر ورنده یانوندا
منی کناریده قوی من سنه سزا دگولم»
شهید ایدوبله منی چون سنون رکابوندا
آغیردی قیمتیم ای شاه کم بها دگولم
منی گذشت ایله ای شهریار خونین دل
غلام منفعلم لایق عطا دگولم
کمال معذرتیم وار بو نوعی یاتماقدان
دورانمورام ایاقا صاحب قوا دگولم
سالوبلا قوللاریمی کاسه ی سریمده سینوب
بو حالیله گوروسوز مقتدر به پا دگولم
بو اللّریم بو علم بو شکسته جامِ سریم
ثبوت ایدر که اوز عهدیمده بی وفا دگولم
یاغیش تک اوستومه اوخ یاغدی بسکه هر یاندان
پر آچدی جسمیم هُما تک اگر هُما دگولم
علاوه دگدی بیر اوچ شعبه اوخ جبینیمدن
گنه بو ظلمه خوشام صاحب بُکا دگولم
قان آغلادور منی یالقوزلوقون سنون مولا
فسوس و آه ندیم قادر وغا دگولم
آپارما نعشیمی قتلایه مصرعیمدن اخا
قالام بو یرده خوشام حمله ارتضا دگولم
خجالتم سو خصوصینده اهل بیتیندن
گیدنمرم الی بوش گیتماقا رضا دگولم
هنوز چوخلاری بو حالیمی منیم بولمور
بیله بولولّه منی سرنگون لوا دگولم
منی خیامه آپارسان جری اولالا سنه
سپاه کوفه دیر ظلمه انتها دگولم
چکوب بیر آه ، آخوب گوز ، یازاردی قانی یره
فدای لایق سلطان نینوا دگولم
«دخیل» سوزلرینه شرکت ایتدی راهنما
همای اوج «دخیل» منده «رهنما» دگولم
- دوشنبه
- 12
- مهر
- 1400
- ساعت
- 16:15
- نوشته شده توسط
- یوسف اکبری
ارسال دیدگاه