الغرض حمل اولدی زهرا جسم پاکی مدفنه
گلدی معناده سماوات اهلی داد و شیونه
شیر یزدان توکدی اشگ دیده گریانینی
اوز الیله قویدی قبره اوز عزیز جاننی
روشنان چرخ ظلمات شب دیجورده
خیره اولموش بو، تراب ابچره مه مستورده
غرق خاموشی در و دشت و زمین و آسمان
حالت بهت و تحیرده هامی کون و مکان
ناگهان سندی سکوت محض بیر آوازیله
دولدی بو آوازیدن اقطار، سوز و سازیله
لحن دردانگیزیله گلدی مقاله بو تراب
تربت قبر بتوله ائیلدی بیله خطاب
ای تراب تیره نور دیده طاهادی بو
دفن اولور گزلنجه سنده، حضرت زهرادی بو
ببر آز عمریله جهاندا چوخ چکوب رنج و بلا
روز و شب آزار ایدوبدور اینجیدوب اهل جفا
سرو تک قدی اولان بار مصیبتدن دوتا
مصطفی ریحانه سی انسیه حورادی بو
بو وجود محترم که ایلیوبدی سنده نزول
احترامین سانمیوب دنیاده اشرار جهول
رتبه و شان و مقاماتنده حیراندور عقول
بحر عزتده اولان بیر گوهر والادی بو
بسکه جان فرسادی درد فرقتی من بیکسه
قان اولان دل، چوخ چتندور رشته الفت کسه
آغلورام هی سسلورم سس ویرمور آخر بو سسه
قبری اوسته بیر دیمور نه شور و واویلادی بو؟
بو همان زهرادی دنیاده یوزی هیچ گلمیوب
روز و شب قان آغلیوب بیر استراحت بولمیوب
انقضای عمریله بو زار و مضطر ئولمیوب
نسگلی چوخدور قتیل فرقه اعدادی بو
بو همان زهرادی حقی غصب اولوب فاش و علن
نعشین اما نصف شب دفن ایلورم گزلینجه من
ای تراب تیره آغوشونده راحت ساخلا سن
درد و محنتلر انیسی، مونس ایذادی بو
بو همان زهرادی حسرتدور ملک پابوسینه
تازیانه ووردی اما اشقیا بازوسینه
سینوه آهسته آل، صدمه یتوب پهلوسینه
درد سقطیله ئولن صدیقه کبرادی بو
بو همان زهرادی دائم حضرت خیرالانام
بضعه منی خصوصینده دیردی صبح و شام
لیل تار ائتدی گوزینده گوندوزی قوم ظلام
باخمادیلار مهجه قلب شه بطحادی بو
بو همان زهرادی هر موقع گورنده مصطفی
ورد و ذکریدی آتاسی بو قیزا اولسون فدا
بیله شانین صاحبین ئولدوردی ثانی برملا
سانمادی مخدومه دنیا و مافیهادی بو
ای تراب تیره زهرا چوخ یانوبدور اودلارا
یاندیراندا درگهین ثانی یخوب توپراقلارا
جسمینی سالما فشاره، سنه سینده وار یارا
طاقتین یاره آلوب بی طاقت و یارادی بو
بو همان زهرادی ای نعش بتوله خوابگاه
یر سالوردی گر دوشیدی جسمینه بیر پر کاه
نیلی سیلی ندور گل صورتینده آه آه
سن سوروش سرین دیسون، صورتده نه معنادی بو
بو همان زهرادی هر گون باش وئرردی قرص هور
بو امیدیله که ایتسین درگهندن کسب نور
سر ان اعرف وجودینده بونون ایلیوب ظهور
نسخه مشروح توحید حق یکتادی بو
بو همان زهرادی اون بیر گوهرین دریاسیدور
محفل قدسین چراغ انجمن آراسیدور
حسنی اکلیل نبوت دره البیضاسیدور
نوع انسانه نشان فضل کرمنادی بو
بو همان زهرادی مفخردور وجودی خلقته
اصل تکوین جهان بوندان یتوب حیثیته
ذاتی رحمت، لطفوله شرم و حیاسیز امته
هر سراشیب بلاده عروه الوثقی دی بو
بو همان زهرادی گورموبدور یوزینی آفتاب
بو وجوده مقنعه اولموش، حیا ، عفت نقاب
کسب عصمت ایلیوب بوندان هامی عصمت مآب
گلستان عصمته بیر نو گل زیبادی بو
یاتدی سنده بو گجه بیر خسته رنج و ملال
قویدی بیر جمعی آیوق، بو یاتماقیله ماه و سال
داد بو هجرانیدن یوخ بیرده امید وصال
کیم بولور مندنصورا نه محنت عظمادی بو
عاقبت دفن ایتدی، زهرادن ال اوزدی شاه دین
منزله گلدی ملول افسرده حال و دل غمین
گوردی زهرانین یرین بوش چکدی آه آتشین
آغلادی ذکر ایلدی نه بی وفا دنیادی بو
مرتضایه چوخ اثر ایتمشدی هجران بتول
اولدی علت نالیه شام غریبان بتول
سس سسه ویردی او شاهیله یتیمان بتول
ای گوزوم آغلا عزای حضرت زهرادی بو
مخفیانه نصف شبده قوردولار بزم عزا
فرشدن اوج ایتدی عرشه داد و فریاد و نوا
یاندورب سکان عرشی بو عزای غم فزا
بولمورم نه سریدور نه ماتم اخفادی بو
(عاصیا ) مطلق سنه روح القدسدن یتدی دم
بو دم آلماقدان بو نوحه دفتره اولدی رقم
دست خالی اولماسان، محشر گوننده چکمه غم
مغفرت اسبابدور سرمایه عقبادی بو
- دوشنبه
- 12
- مهر
- 1400
- ساعت
- 16:17
- نوشته شده توسط
- یوسف اکبری
- شاعر:
-
مرحوم حسن عاصی تبریزی
ارسال دیدگاه