ای تراب تیره دل گنجینه ی تقوادی بو
زهره ی برج رسالت حضرت زهرادی بو
سن صدف سن بو سینان درّ یتیم عصمته
سن قفس سن محبس شهباز اوج همّته
ساخلا راحت طعنه وور بو امّت بی غیرته
حرمت ایت، مخدوم هاجر مریم و سارادی بو
بانوان دین دانشگاهینه استادیدی
بیر زن مردآفرینِ چرخِ بدبنیادیدی
افتخار بانوان عالم ایجادیدی
یکّه تار آسمان عصمت و معنادی بو
خاطراتی محو اولونماز صفحه ی افکاریدن
عالمه ویردی تکان بیر نطق آتش باریدن
جان ویروب آخِرده بو ظلم در و دیواریدن
قوی دیوم واضح قتیل مجلس شورادی بو
سنده مدفون اولدی شهبانوی شاهنشان دین
دختر آزاده خوی رحمة للعالمین
همچو دیبا اوستونده قویدی گورمیش صورتین
سینه دن زخمین مسمار خدنگ آسادی بو
شعله ی لرزان شمع دینه بو پروانه دی
عشقیله افسون اولوبدی فاطمه افسانه دی
بو یارالی حضرت پیغمبره ریحانه دی
کوره راهِ مُلک عشقه خسته رهپیمادی بو
ای بقیعون توپراقی زهرا امانتدور منه
روز محشر مُسترد ایله نه جور ویردیم سنه
قبری قوی گیزلین قالا ویرمه نشانه دشمنه
جان ویرن وقته منه بو نکته نی گویادی بو
خاکریز ایستردی ایتسون قبر زهرانی او شاه
سپدی گرد سیمگون قبر بتوله گویده ماه
پیکرین آغوشینه آلدی نسیم شامگاه
سسلدی راحت یاتا قوی دختر طاهادی بو
خاکریز ایتدی اودم قبر بتولی بوتراب
یوز دوتوبدی گوئیا ماهه بیله ایتدی خطاب
بستر زهرایه سپدون گرد سیم ماهتاب
دختر پیغمبره بیر خدمت باجادی بو
گرد مهتابیله اولدی بستری چون پرّ قو
چکدی آغوشه نسیم شب اونی چون آرزو
زخم مسمارین ایدر کیم سینه سی اوستن رفو
سالها بولّم که جسم پاکینه ایذادی بو
ایتمیه تا قائم آل رسول ا... قیام
آلمیه تا قاتل زهرادن اخذ انتقام
حشره تک تاپماز یقیناً صدر زهرا التیام
گور نه بیر زخم عمیقه قبریده دارادی بو
جان ویرنده ایستیوب پنهان اولونسون مدفنی
ایلمه زهرا یانندا شرمگین سنده منی
اولما راضی قبرینی تاپسون ستمگر دشمنی
سن اوزون یاخشی بولورسن کشته ی اعدادی بو
بو گجه بیرده غروبه ایلمه اصلاً شتاب
زینبه قوی چیره اولسون بو گجه بیر لحظه خواب
صبح آچیلسا قلب معصومین دوتار چوخ اضطراب
عصمت صغرادی زینب، عصمت کبرادی بو
کربلاده سیریوین تاخیرینی جبران ایله
مغربه تیز گیت بولود آتدا اوزون پنهان ایله
ساربانی سعی قیل تا یولدا سرگردان ایله
توپراق آتدا مادر مقتول عاشورادی بو
تیز غروب ایت تا او چولده تازه دن قان آخماسین
بو بلادیده گلوب بیر ظلم شومه باخماسین
اوز آغارمیش زلفینه خون حسینی یاخماسین
غنچه ی عشق حسینه بلبل شیدادی بو
تیز غروب ایت تا کول اوستونده کسوک باش یاتماسین
حنجریندن قان آخوب خاکستری ایسلاتماسین
خون و خاکسترله روی شاه عطشان باتماسین
سانماسین آی باتماقین، مهر جهان آرادی بو
قتلگاهه گلسه بیر قیز خیمه گهدن نصف شب
قتلگاهه سالما نورون ایت مراعات ادب
چون اوشاق قورخار تلالو ایلسه آلات حرب
موج اندوه حسینیمدن سنه ایمادی بو
خیمه گهدن ایلینده زینب عزم قتلگاه
نصف شبده سن اونا آپ نوریویله شاهراه
آختاران وقته قیزین سن ویر نشان قتلگاه
چون رضای مرتضی و حضرت اعلادی بو
کیم دوتا (هادی) مقدّم آل طاها خدمتین
گون به گون افزون ایدر حق رتبه سین شخصیّتین
اصغر خاقانیه حق شامل ایتسون رحمتین
چون تمنّای اونیله واقعاً انشادی بو
- دوشنبه
- 12
- مهر
- 1400
- ساعت
- 16:29
- نوشته شده توسط
- یوسف اکبری
- شاعر:
-
مرحوم هادی تبریزی
ارسال دیدگاه