آچ گوزون ای قلبیمون صبر و قراری فاطمه
ای منه جدی پیمبر یادگاری فاطمه
بو نه عالمدی بیله پوزقون پریشان یاتمیسان؟
ترک ایدوب اطفالوی گوزدن حسینی آتموسان
ای علینون کوکب بختی نولوبدور باتمسان؟
گیتدی سنله عمریمون فصل بهاری فاطمه
بو همان اوغلون حسیندور بسلدون چوخ نازیله
سینون اوسته پرورش ویردون بونا اعزازیله
اگلشوبدور باشین اوسته بو امید آزیله
قول بویون اولسون سنیله بیرده باری فاطمه
اشقیا جور و جفاده چخدیلار اندازه دن
آز زماندا بو اسفلی حالته دوشدون ندن؟
زلف آغاردی، قامتون اولدی خمیده غصه دن
بو سببدن آرتدی قلبون انزجاری فاطمه
دین اسلامون یولوندا جام غم نوش ایلدون
هر بلا گلدی دایاندون سینوی توش ایلدون
حق مرام اوستونده اوز جانون فراموش ایلدون
زینبه سرمشق ویردون بردباری فاطمه
ضرب سیلیدن اولوب پژمرده رخسارون سنون
اولدی نیلی تازیانه آتدا قولارون سنون
اهل اسلامه اولا سرمشق رفتارون سنون
عفت و عصمت اولان هر آن شعاری فاطمه
ای گل باغ نبی پیغمبرین ریحانه سی
راضی اولمازدون اوجالسون زینبین شیون سسی
گور نجه عرشه چخور ایوای آنام وای ناله سی
اولدی سنسیز لیلیدن تیره نهاری فاطمه
سن بولورسن قیز آنایه چوخ علاقه مند اولار
هر قیزین ئولسه آناسی گل کیمی رنگی سولار
اولماسان سن قیزلاریم باشین آچار زلفین سولار
بیرده اولماز خوش گونی خوش روزگاری فاطمه
گیتسه گل بلبل الندن اود دوتار قلبی یانار
کیم دیور آیا عم اوغلون بو غمی آسان سانار
زینب و کلثومه باخدوقجا وجودیم اودلانار
یاندیرور بو عالمی آهیم شراری فاطمه
چوخ چتندور بو گورم جان اوسته زهرا جان سنی
وار یری عرشه چخا یالقوز عم اوغلون شیونی
قلبیمی یاندورما چوخ، آچ گوزلرون دیندیر منی
ای اولان آل عبانون افتخاری فاطمه
گتدی پیغمبر الیمدن عرشه چخدی شیونیم
قولاریمی باغلادی گوردون یانوندا دشمنیم
ای پیمبر یادگاری وار نه تقصیریم منیم؟
دینمیسن دیندیرمیسن بو اشکباری فاطمه
هر بلایه دوزموشم زهرا پیمبردن صورا
باغریمی قان ایلوری اما منیم بو ماجرا
سن هارا؟ پیغمبرون ریحانه سی سیلی هارا؟
نه دیر طاها گوره بو گل عذاری فاطمه؟
دوقوز ایل دوزدون ایویمده هر بلا و محنته
آج قالوب اوچ گونلریله صبر قیلدون شدته
نیلیوم زهرا گله لعنت وفاسیز امته
حقیمی الدن آلوب امت شراری فاطمه
تیره اولدی لیل یلدادن بو ایوده گوندوزون
من نجه یاددان چخاردوم جور و ظلمون قنفذون؟
ذکریوی عجل وفاتی ایلمشدون سن اوزون
ای گجه گوندوز چکن مرگ انتظاری فاطمه
مستجاب اولدی سوزین تا یتدی حی داوره
مقصده یتدون گیدورسن محضر پیغمبره
حوریان ماتم دوتوب، قاره چکوبلر گویلره
گیت خلاص اولدون، مصیبت دلفکاری فاطمه
وار یری سالسون شرر بو دود آهیم گویلره
اولموشام سندن خجالت نه دیوم پیغمبره؟
حقی وار آلسا خبر آیا ندور بو منظره؟
گورسه پیغمبر بو جسم زخمداری فاطمه
عرض قیلام حق یولوندان امتون کج دوردولار
قویدولار قبره سنی بزم سقیفه قوردولار
یا رسول الله قیزون زهرایه قمچی وردولار
اولدی سن سیز چوخ مصیبتلر دچاری فاطمه
- دوشنبه
- 12
- مهر
- 1400
- ساعت
- 16:40
- نوشته شده توسط
- یوسف اکبری
ارسال دیدگاه