ای بو قربانگاه حقده بیر قوزی قربان اوغول
کیم بوغازوندان ووروب اوچ شعبه لی پیکان اوغول
هانسی قربانی اوغول ذبح ایلیوبله تیریله
یا بیله رفتار ایدوب صیّاد بیر نخجیریله
زهرلی اوخ نسبتی یوخ طفل بی تقصیریله
ظلمیده طغیان ایدوب بو فرقه ی عدوان اوغول
بو امیدیله علی میدانه گوندردیم سَنی
حالیوی بلکه گوروب رحم ایلیه قوم دَنی
بُلمدیم بو باره ده عفو ایت گذشت ایله مَنی
سو یرینه قوم کین پرور ایچیردَر قان اوغول
اِزدیاد دردیمه بو نکته دور اولموش سبب
قالدون اوچ گون اوچ گئجه ای غنچه لب سن تشنه لب
بونلا بیله من سنه لایلای دیردیم روز و شب
راضی اولمازدیم که اولسون گوزلرون گریان اوغول
آلتی آی صبح و مَسا چکدیم تمام زحمتون
شیره ی جان سود یرینه ویردیم ایتدیم خدمتون
سنده تیز کَسدون بو بیر ساعتده مندن الفتون
ایلدون عمریمجه توش محنت هجران اوغول
شدّت سوز عطشدن سینمی ایتدون خراش
حالیوه باخدوقجا من آخدی گوزومدن قانلی یاش
ایلدیم بونلا بیله دردون علاجینده تلاش
حیف اولا اولمادی مندن دردیوه درمان اوغول
گرچه بیر مدّت منی محنتله دمساز ایلدون
ناله ی لیلائیله دائم هم آواز ایلدون
شه حضورینده ولی یاخشی سرافراز ایلدون
خاکِ پایِ شاهه اولدون تشنه لب قربان اوغول
گُلشن اسلامی گوردون سولدوروب قوم عدو
قانیویله ویردون آخِر گُلستان دینه سو
تا جهان وار گُلشن اسلامیده وار رنگ و بو
ایتمیسَن دین مبینه خدمت شایان اوغول
اوچ گئجه گوندوز علی لای لای دیدیم هر آن سنه
بیر یاتوب دینجَلمدون اولسون آنان قربان سنه
نه دیلیله دیندیروب لای لای دیدی پیکان سنه
بیله راحت یاتموسان گوز آچموسان بیر آن اوغول
آتش غم یاندیرور از بس من زاری یاخور
اشک چشمیم تک عُذاره قلبیمون قانی آخور
سس اوجاتماقا نیدیم سلطان مظلومان باخور
قورخورام خجلت چَکه مندن شه عطشان اوغول
اولماسا مانع حیا من سس چکوب بیر آغلارام
سوزِ آهیمله دل آل عبانی داغلارام
اشکیله قانون یوووب، زلفومله زخمون باغلارام
لیک معذورم منِ حیران و سرگردان اوغول
اوچ گئجه گوندوز که سن لب تشنه قالموشدون علی
طاقت و آرامیمی قلبیمدن آلموشدون علی
بیر ساری گُل تک گیدن وقته سارالموشدون علی
اولموسان قونداق دولوسی لاله ی نُعمان اوغول
(عاصینی) غملر یوروب، درد ایلیوب زار و علیل
بستر محنتده دور بیر عمریدور طول و طویل
صدق اوزیله آستان پاکیوه دوشموش دخیل
سندن ایستر درد بی درمانینه درمان اوغول
- سه شنبه
- 13
- مهر
- 1400
- ساعت
- 14:48
- نوشته شده توسط
- یوسف اکبری
- شاعر:
-
مرحوم حسن عاصی تبریزی
ارسال دیدگاه