گل ای سرمایه عزّ و وقاریم یا ولی الله
یتشدی باشه عمر مستعاریم یا ولی الله
منی جذب ایلیوب شوق لقا خلوتگه یاره
حضوریندن مرخص عازمم دیدار دلداره
امید التفاتونلا دیدیم گل یوخسا احضاره
جسارت ایلمزدیم ای وقاریم یا ولی الله
بو خواهشدور حضوریندن , نه احضار و نه دعوتدور
قصور اولسا گذشت ایله , سنه هر چند زحمتدور
بو خواهشدن او زحمتدن امیدیم بیر اجابت دور
که اولسون محضرونده احتضاریم یا ولی الله
سنون الطافوین خرسندیم اولدن عالمده
سنیله روحیم آرامش تاپب هر دمده هر غمده
منه بو منتهای آرزودور جان ویرن دمده
باشیم اوستنده اولسون شهریاریم یا ولی الله
اگرچه هر یارانمیش خلق اولوب بیر سرنوشتیله
گروهی کعبه ایله خوشدی بعضی لر کنشتیله
ویرر بیر عده عمرون باشه سودای بهشتیله
منیم سنسن بهشتی انتظاریم یا ولی الله
ازلدن شاکرم حمد ایلرم بو سرنوشتیلن
کهمانوسم بهار لطفوین اردیبهشتیلن
جمالون گورماقون ایتمم عوض مین لر بهشتیلن
بهشتین, عزّتیم, شانیم, وقاریم یا ولی الله
بهشتی آرزو دنیاده هر زیبا و زشت ایلر
مقیم کعبه و دیر و کلیسا و کنشت ایلر
سنون امّا قدومین آرزو باغ بهشت ایلر
بهشته آرزو ای تاجداریم یا ولی الله
- سه شنبه
- 13
- مهر
- 1400
- ساعت
- 15:20
- نوشته شده توسط
- یوسف اکبری
- شاعر:
-
علی اصغر زاهدی(معتکف)
ارسال دیدگاه