یاعلی اکبر ع
بودور مرآت حق لم یزلدی
پیمبر جدی دی نور ازلدی
باباسی عدلیده ضرب المثلدی
آتاسی مظهر خیر العملدی
عموسی فاتح جنگ جملدی
اوزی نام آور جنگ و جدلدی
بونون استاد جنگی بی بدلدی
بولار نسلا به نسل اجدادی یلدی
گوزلیخدا گوزلردن گوزلدی
بو نور منشق از نور جلیدی
حسین بن علی اوغلی علیدی
❌❌❌❌❌❌❌
علیدی نور چشم مرتضادی
عزیز حضرت خیرالنسادی
جوانان جهانه مقتدادی
علیدی عالمه مشکل گشادی
دئمم گوهر وجودی کیمیادی
آدی عاشقلره نام آشنادی
ولایتده منیر و رهنمادی
بونا لیلی عالم مبتلادی
شهید اوغلی شهید کربلادی
علیدی لیلینون آزاده اوغلی
حسینون ارشد و شهزاده اوغلی
❌❌❌❌❌❌❌❌❌
گلوب عرش خدایه زیور اولسون
گوزلیخدا گلوبدی مظهر اولسون
وجودی اشبه الپیغمبر السون
علی المرتضای دیگر اولسون
حسینون بد گونونده یاور اولسون
جهاندا نور چشم مادر اولسون
سلاطینه تماما رهبر اولسون
شهنشهلر باشیندا افسر اولسون
جوان و پیره از دم سرور اولسون
دوباره عالمه حیدر گلوبدی
جهانه حضرت اکبر گلوبدی
❌❌❌❌❌❌❌❌❌❌❌❌
محبت عالمینده بی کراندی
نگار خوشکل و ابرو کماندی
شیرین دیلدی دیلی گوهر فشاندی
ایشیخلی اختر هر کهکشاندی
صفای گلشن و باغ جناندی
ولادت گونلری روز جواندی
حسینون جسمینه روح و رواندی
عموی حضرت صاحب زماندی
بئله یاز طائرا چوخ مهرباندی
خلوص نیتیله داده سسله
علی اکبری امداده سسله
- جمعه
- 20
- اسفند
- 1400
- ساعت
- 16:24
- نوشته شده توسط
- طائر
- شاعر:
-
طائر اورنگی
ارسال دیدگاه