دوزدی کی عاشق و معشوق سوزی جار اولماز
عاشقم من سنه سن تک منه دلدار اولماز
عشقیمیزدن گرک عالمده بیزیم درس آلالار
صفت عشقه بیله کیمسه وفادار اولماز
چوخ دارخمشدی علی فاطمه جان هجرینده
بو ترابین غمینه سن کیمی غمخوار اولماز
الامان جور فلکدن که نه چکدی باشیمیز
دلده نسگیل لریمز قابل گفتار اولماز
ائتمدیم من گله یاندیردیلا دشمن قاپیمی
اوتلی سینمده کی دللرده یانان نار اولماز
باخمیشام من نچه ایللر یخیلان مقتلوه
آیری بیر ائوده بو نوعی در و دیوار اولماز
آیریلیب ترک ائدنی غمله هم آغوش اولدوم
درد هجرون کیمی بیر درد دل آزار اولماز
سن گئدنن گوزومه جمله جهان اولدی قرا
نه قرا،دیده ی اعماده بیله تار اولماز
گئجه لر صبحه کیمین آهیله قان آغلامیشام
هانسی عاشقدی گوزی هجریده خونبار اولماز
بیرجه سن حیدرین حقینده هوادار اولدون
بیر غریب حقینه هیهات طرفدار اولماز
آخرین لحظه ده گوردوم یوزون قاره سینی
بئله بیر نیلی اولان ظلمیله رخسار اولماز
چوخلارین قلبی اولوب تیر مصیباته هدف
عالمون غملری چون محنت مسمار اولماز
پوزدی مسمار علی حالینی اولدوردی سنی
سن کیمی کیمسه شهید من کیمی بیمار اولماز
سینه وین یاره سی بیر عمرودی یاندیردی منی
ایله یاندیم منه تای غمده یانان یار اولماز
بیزه تقدیر بودور خاری باساخ باغریمزا
ولیکن خار مغیلانه چاتان خار اولماز
قورخولی چولده تیکانلیخدا حسینون بالاسی
تک گورونموب بیری بو طرز گرفتار اولماز
ظاهرا کوفه نین اهلی منه اولموشدولا یار
باطنا خائن اولوبلار بئله اغیار اولماز
ملجمین اوغلی وئروب باشیمه شمشیر یاراسی
ایله کاریدی که حیدر داخی هوشیار اولماز
مست ائدیب شوق وصالون راغبم اولماقیما
آیری شوقیله دلیم شوریله سرشار اولماز
من سنی بو یارالی باشیله دیدار ائلرم
بیله بیر عاشق و معشوق آرا دیدار اولماز
روزه ی عمریمی سیندیردیلا بیر ضربتیلن
(طائرا) کیمدی دیوب قانیله افطار اولماز
۱۷ ماه مبارک رمضان سال ۹۶
ساعت ۳/۳۰ بامداد
موسی اورنگی (طائر)
- چهارشنبه
- 31
- فروردین
- 1401
- ساعت
- 0:40
- نوشته شده توسط
- طائر
- شاعر:
-
طائر اورنگی
ارسال دیدگاه