شهادت امام حسن مجتبی ع
غریبین دردینه یارب جهاندا انتها اولماز
غریب لیخ چکمین هرگز بو درده آشنا اولماز
جهاندا چوخلار آماج غم و درد و محن اولدی
چوخی دست قضایله غریبانه کفن اولدی
غریب لر شاهی عالمده فقط مظلوم حسن اولدی
ایله دردی گراندور دردینه هرگز دوا اولماز
جفا زهرین چکوب باشه جفادن یاندی اکبادی
ایدوب تاثیر جنتده خانم زهرایه فریادی
بو درده کیم دوزر اولسا شریکی ایوده جلادی
دوزر هر درده درد اهلی ولیکن مجتبا اولماز
ایچیب زهری گجه یاری او دم حالی خراب اولدی
ایلان ورمیش کبوتر تک اسیر پیچ و تاب اولدی
ملائک قلبی گویلرده بو نیسگیلدن کباب اولدی
حسن تک دهریده هچ کس جفایه مبتلا اولماز
ایله ظلم ایلدی جعده حریم کبریا یاندی
او ملعونه جفاسیندان دل اهل ولا یاندی
پیمبر سوگوار اولدی بوغمده مرتضا یاندی
خداوندا بیر عورتده مگر ذره حیا اولماز
یری وار اهل دنیانون ایشی آه و فغان اولسا
گوزوندن عارضه اشکی بو ماتمده روان اولسا
روادور قامت زهرا دوباره گر کمان اولسا
اولوب اوز محرمی قاتل بو شدتده جفا اولماز
گورن کوچه قضایاسین یوموبدور گوز بو دنیایه
دمزدی دردینی هرگز حزین آغلاردی زهرایه
آنام وای ناله سی هردم چخاردی عرش اعلایه
یانیخلی دلدن آغلاردی بئله غمگین نوا اولماز
دیردی ظلمیله دلده قالیب دردی نهان ئولدی
جفای ثانیدن یارب نجه قدی کمان ئولدی
اونا ئولماخ یاراشمیردی آنام زهرا جوان ئولدی
آنام تک دین اسلامه بو نوعی کس فدا اولماز
ایکی عورت بو مظلومین یوزه اشکین روان ائتدی
بیری جعده کی اوز ظلمین قساوتله عیان ائتدی
بیری ده عایشه جسمین خدنگیله نشان ائتدی
باتوب تابوتیده قانه بیله درد و بلا اولماز
بو مظلومین قصاصینده اگر جان ورسه مین ثانی
آخا توپراقه عدلیله هزاران عایشه قانی
و یا جعده کمین مینلر کسین بیردن چخا جانی
خدایه آند اولا پور علییه خون بها اولماز
حسندور فاطمه جانی حسندور سبط پیغمبر
باجیسی زینب کبری آتاسی مرتضا حیدر
حسینیله برادر دور ایکیسی نازنین دلبر
حسن تک طائرا یاز کی امام و مقتدا اولماز
تقریر ۲۸ رمضان سال ۱۴۰۱
#طائراورنگی
- شنبه
- 10
- اردیبهشت
- 1401
- ساعت
- 23:49
- نوشته شده توسط
- طائر
- شاعر:
-
طائر اورنگی
ارسال دیدگاه