______________________
گلمیشم پای پیاده یاحسین دیداروه
سن ننون زهرا جانی لطف ایله بو زواریوه
قبریون قربانیم*******کربلا مهمانیم
گلمیشم قبرین کنارینده دوینجا آغلیام
قتلگاه یوز قویوب بو سینمی من داغلیام
باشیمه قاره گرکدی بو عزاده باغلیام
دردمندم باخ اوزون بو خسته دل بیماریوه
قبریون قربانیم*******کربلا مهمانیم
اربعین زواریم دردیم دواسی سنده دی
عمرون زهرا جانی ذوق وصفاسی سنده دی
بو گلن زائرلرین لطف و عطاسی سنده دی
جان فدا اولسون سنین مولا گوزل درباریوه
قبریون قربانیم********کربلا مهمانیم
قومادون حری قاپوندان چیخدین استقبالینه
قول قانادی سینمشیدی چک ال سن بالینه
پر ویریب قوندی بهشته خوش اونون اقبالینه
قوشدون آخر حری سن جاندان گیچن انصاریوه
قبریون قربانیم ****کربلا مهمانیم
گل منی حره باغیشلا گر چه عاصی بنده یم
چوخ گناهیم واردی سندن یاحسین شرمنده یم
من سنون عشقینله مولا بو جهاندا زنده یم
نا امید ایتمه منی من نوکرم سرداریوه
قبریون قربانیم **کربلا مهمانیم
باخسا گر عباس آقا عالملره ناز ایلرم
قوش مثالی پر ویریب گوگلرده پرواز ایلرم
قاتسا دوز اشعاریمه سو صحبتین باز ایلرم
ایلرم بو جانیمی قربان سوسوز دلداریوه
قبریون قربانیم ****کربلا مهمانیم
ای قلم سو صحبتین سالما اورکلر قان اولار
هم رباب آغلار هم اصفرگوزلری گریان اولار
نهر علقمدن آخان سو موج لو طوفان اولار
سسلنر عباس احسن مرحبا ایثاریوه
قبریون قربانیم ***کربلامهمانیم
ای اولان مشکل گشای اهل عالم اللری
ناامید ایتمه امیدیله گلن زائرلری
یازدی بو اشعاری آغلار گوزلریله(ماه پری )
تا که بلبللر نوا سالسین گوزل گلزاریوه
قبریون قربانیم******کربلا مهمانیم
__________________
- شنبه
- 17
- تیر
- 1402
- ساعت
- 16:59
- نوشته شده توسط
- یوسف اکبری
- شاعر:
-
رضا ماه پری زنجانی
ارسال دیدگاه