قولسوز دوشن زمانیده صاحب لوا يره
نقش ایلدی حسینه رموز بلا یره
ضربت دگنده باشنه باش آچدی فاطمه
عمامه‌سینی وردی شَهِ لافتی یره
قانلو علم که سینه ده میل ایتدی صاق صولا
دوشجک یره يخلدى شَهِ کربلا يره
يوخدور قولی دوشنده یره تکیه ایلسون
قولسوز دوشوب نه حالیده بس ای خدا یره
قولسوز گوروبدی آچدی قولون‌دشت کربلا
ایله نزول سسلدی بو باصفا یره
گورم سنون دوشوبدی قولون یوخدی صاف یرون
جسمون اولار بو حالیده دوشسون فنا يره
ام البنین هایاندا قالوب گلمیور ندن
گورسون دوشور نه حالیده قد رسا یره
ام البنين گلنمدی گلمشدی فاطمه
اوغلی دوزنمدی دوشه خيرالنسا یره
قولارین آچدی سسلدی معناده گل بالا
دوشمه بو وضع حالیله ای باوفا یره
آنون یارادی دوشمه یوزون اوسته تپراقا
دوزمز آنا بو حالیده دوشسون بالا یره
زهرایه بو بلا گونی سن ایلدون کومک
سن خدمتون يتوردون اوغول انتها يره
قارداش دیوب هرایه چاقر تز حسینمی
گلسون کومک‌لیک ایتمگه بو غم فزا يره
یالقوز امامی سسلدی سقای کربلا
درک ایله قارداشون يخوب اهل جفا یره
باش ویرمرم اگر باشیمون اوسته گلمسون
توکسه نقدری قانمی بو اشقيا یره
قارداشنون ایشتدی سسین چخدی خیمه‌دن
سلطان گلوب وزیری اولان مبتلا یره
گوردی ایدوله باشنون اوستنده کشمکش
قولسوز دوشوبدی مظهر شیر خدا یره
قولسوز گوروبدی قامت طوباسینی حسین
فرش ایلدی او دشتیده فرش عزا یره
قويدى الين بلنه خطاب ایتدی بو سوزی
سندی بلیم دوشنده سن آتدان اخا يره
آلدی باشین دیز اوسته چکوب آه سوزناک
گوزدن توکوب سرشکین او اعظم فدا يره
قانن سلوبدی گوزلرینون قویدی یوز یوزه
قدوسیان باخوبدی او محشر نما يره
شمس و قمر تصادفی بیر یرده اولدی جمع
مبهوت اولوب او حالتی گورجک سما یره
بی‌نفخ صور محشر اولوب کوی عشقده
چکمش عجیب منظره کلک قضا یره
ويرسون حسینه عالم معناده تسلیت
ایتدی نزول گوزیاشیلان انبیا یره
گویا حسین بو دللريلن نوحه باشلادی
توکدی دُر سرشکنی شمس الهدا يره
ای چاره‌سیز قویان منی بو عرصه گاهیده
نه حالیدور بو دوشموسن ای مه لقا یره
اوغلوم ئولوبدی سس ويرنيم يوخدى بيكسم
قان اولمیوب گوزیمده سرشکیم هوا یره
بو سرو قامتونده هانی قولارون أخا
سینونده اوخ کچوبدی اوخ اوستن یارا يره
سنسیز گیدم خیامه منیم گلمیور یوزوم
وار خجلتم اوتورمشام ای دلربا یره
اگلشمگه یوخومدی توانیم نه دورماقا
آواریم دوروم اوتوروم اینکه یا یره
دشمنلریم اگرچه باخور حالیمه گلور
درد و غميم يتوب داخی بی منتها یره
گلجک سسون خيامه منیم اسدی دیزلریم
بلدوم سنی یخوبدی بو قوم دغا یره
الله بلور نه حالدا چخوب خیمه گاهیدن
يالقوز حسين گلییدی بو یر ماجرا یره
آج قانلو گوزلرون منی دیندیر اوغو لسوزام
دوشسون سوزی بو بیکسون اولما رضا يره
هانسی لعین وروبدی یارا سجده‌گاهوه
قانون آخوبدی سو کیمی ويرمش جلا یره
اولسا رضایتون آپاروم خیمیه سنی
زینت ایدوم وجودون او ماتم سرا يره
سو گوزلین بالالارمی قويما منتظر
قويسون داخی سو جامنی آل عبا یره
گورسون سنی بوحالدا باجيم زينب اوخشاسون
خون دلینی توکسون او بی اقربا یره
مقصودینه يتشدی یاتار یاتمیان قوشون
اطفالیمی چکله يقين ناروا یره
«انور» کتابی ختمه يتور بو دو بیتلن
شکر ایتگلن اثر اولی گتسون بقا يره
- چهارشنبه
- 28
- تیر
- 1402
- ساعت
- 11:24
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه