گُوزوم قُولاقُوی آچ گُور نه شُور و غُوغا دور
نُولوب یِر اوُسته که گُویلَردَه حَشر بر پا دور
سالوبدی غُلغلَه آفاقَه کَف کَفِ ناقَه
صدای زَنگ جِرنگا جِرنگ پیدا دور
چخوبدی آتلولارین های هُوسی اَفلاکه
گلوبدی شِیحیَه آتلار نه شورِ عُظما دور
هوانی توز بُوریُوب بسکه گُوز گُوزی گُورمَز
دَگندَه بیر بیره هر کیم دِیر نه غُوغا دور
گلولَّه شهره ائشیکدن جَماعتِ اَعراب
دیولّه بیر بیرینه کُوفه دَه تماشا دور
حِجاز اسیری عَراقه گلور قَطاریلَه
اسیرلَر هامی آلِ علىّ اَعلا دور
دیولَّه ایمدیه دین گلمیوب بو یوزده اسیر
نجومِ لامعه یا قرصِ بَدرِ بیضا دور
باسوبدی یوزلرینی توز سالوب طَراوَتدَن
اگر چه طرّه لَری طرّهء مُطَّرا دور
دونوب مدینیه سَسلَلَّه یا رَسول الله
عزیز عَیالوه گُور نه بو ظلمِ بیجا دور
حَرملَرون قباقندا باخون او بیماره
گُورون نقدر دل آرا جوانِ رَعنا دور
دولاندیراندا گوزین آغلا دور گُوز اَهلی لَرین
گه عینِ ماحَذرو مَن بَکا و اِبکا دور
اسیر اولوبدی قولی باغلی چون غلامِ حبَش
تمام عالمه مُولا وجودِ مُولا دور
اَسُوبدی یِل سُووروب خار و خَس دوتوب بدنین
گورن دیر که لباسی حریرِ خارا دور
بو ناتوانه آغر دور دوشاخه و زنجیر
مگر بونون یری دیلم و یا بخارا دور
بویوردی که من امامم بابام مُحَمّد دور
که دینی ناسخِ شرعِ کلیم و عیسا دور
عصا الینده یانینجا کیشیکچی دور موسی
قبول ایتسن اگر همدمیم مَسیحا دور
باشمدا زرکش عمامه حمایلیم قرآن
بابامدی حضرتِ یاسین بیر آدی طاها دور
اوجا سسیله گرک کوفه نین اوجالسون آدی
نچونکه کوفه مقامِ علیّ اَعلا دور
دورا دورا چکیلور کوفیه قطارِ حرم
که قافله باشی رنجور و ناتوانا دور
نجه روادی دیولسون غلام او مُولایه
که جدّ اَمجَدی سادات نسلِ مُولا دور
گلوب او دمده بیر عورت دیدی یواش یرییون
مهارکش سیزه هر چند قوم اعدا دور
دیدی اسیرلره سیزلره بیوک کیمدور
گلوب جواب او اسیر بلند بالا دور
آدین سوروشسان اگر مادرِ عزا زِینَب
اسیر بند بلا ملجاء اسارا دور
دیون گوروم منه ای قومِ مبتلا کیمسوز
که یوز ویروبدی سیزه محنت و بلا کیمسوز
بوقدر عورت اوشاق قزگلین اسیر اولماز
مگر که ایلمی سوز بیر بیوک خطا کیمسوز
چاپوب سویوب تالیوب هم دوتوبلا ائللیقیله
ایاق یالین باش آچوخ قوم و اقربا کیمسوز
گلن گولور سیزه طعنه ایدور شَماتَت اِیدر
دگول سیزه سخن ناروا روا کیمسوز
اوشاقلاروز هامو آهو بالاسینا بنزر
بویوندی نازک آریخ ساق و گوز قرا کیمسوز
اگر دیم سیزه کافر دوتار منی قرآن
که ورد اولوب سیزه قرآن و هَل اَتی کیمسوز
خبر ویرون ندی ناخوشلوقی او بیمارین
که تاپموسوز اونا بیر شربت و دوا کیمسوز
بو حالته در و دیواردن گلور ناله
دوتوبلا سیزلره جنّ و بشر عزا کیمسوز
- شنبه
- 14
- مرداد
- 1402
- ساعت
- 22:14
- نوشته شده توسط
- یوسف اکبری
ارسال دیدگاه