دَگل بی جا گُوگُلدَه بَی نَهایت دَرد و مُحنَت وار
اُوزوم پَژمُردَه حالَم، گُوزلریمدَه اَشگِ حَسرت وار
پُوزوب اَحوالیمی اُوضاعِ عالَم غِیبتِ کُبری
جَمالِ حُجّتِ باریدَه گُون تَک اَبرِ غِیبت وار
او سُلطانِ حَقیقی گَلمیونجه سُوزِ دل سُونمَز
گُوگُلدَه گُون به گُون سُوزِ نَهانی لردَه شِدّت وار
فَرج بیر اَمرِ حَتمی دور ظُهورِ حُجّت اللّهدَه
بیزه اُون سُوز هُجومِ جُور و ظُلم و زَجر و زَحمت وار
نه یالقوز مُنتظر اَحباب اِیدَر داد و فَغان آغلار
اِمامِ مُنتظردَه بیزدَن آرتوخ حالِ رِقّت وار
گَزر آغلار گُوزیلَه پَردهء غِیبتدَه سَرگردان
دِیمه داد و نَوادَن اُوندا بیر ساعت فَراغَت وار
باخاندا ذُوالفقاره گُوزلَری جاری اِیدَر قان یاش
گُوزیندَه اِنتظارِ اِنتقامِ آلِ عِصمت وار
نِجه یاددان چخار دار عمّه سی زِینب اَسیر اُولسُون
گُوزی گُورسُون تَماشاچی جَماعتدَه نه کِثرت وار
زِیاد اُوغلی اُوتُورسُون شاد دل تَختِ حُکُومتدَه
دِیسُون مُجرادی اَمریم، مندَه فَرمانِ حُکومُت وار
قولی باغلی گَرک گَلسُون حُضوره عِترتِ حیدرِ
بو گُون چون اِنتقامِ روزِ بَدره اَلدَه فُرصَت وار
خیالیم وار یازام اِبنِ زیادین مَجلسین باشدان
امامِ عَصره امّا بیانِ حالَه خِجلَت وار
اَیا شَمس الهُدی، یابن الحَسن، یا غِیرتِ رَحمن
نه قَدری عمّه وون قَلبیندَه صَبر و تاب و قوّت وار
نِجه عَرض اِیلیوم عمّن او بَزمَه گِیتدی بی پَردَه
نِجه مَجلس او مَجلسدَه نه قدَری بی شَرافت وار
آتاسی حیدرِ کرّار تَک وَقرِ تَمامیلَه
خیالَه سالمادی بیگانه لَر بیمِ اِسارَت وار
اُولوب بی اِعتنا داخل، دوتوب بیر گُوشه دَه مَسکن
اُوتوردی دور و بَردَه هاشمیه هر نه عُورت وار
بُو جُرات، بُو جَسارت، بُو تَکبّر، بیر اَسیر عُورت
اِیوین آباد یا زَهرا، قیزوندا گُور نه جُراَت وار
دِیلیم دوتمُور دِیوم زَنجیریلَه قولاری باغلیدی
وَلِیکن اَبرِ زُلفیلَه حِجابِ حِفظِ صُورَت وار
هلَه قانی آخوردی باشدا کی مَحمِل یاراسیندان
باشندا زَخمِ کاری وار، بَدندَه ضَعفِ حالت وار
زیاد اُوغلی سُوروشدی بُو تَکبّر صاحبی کیم دور
بو قدرتدَه اَسیر اُولماز گُورون بُوندا نه قُدرَت وار
جَوابه اُولمادی نائل، گِنه اِیتدی سُوزین تِکرار
خانم گُوردی او بی دینون خیالیندَه اِهانَت وار
نَهانی رَمزیلَه وِیردی کَنیزه رُخصَتِ گُفتار
دِیدی اُول جاریه اَصراریوَه آیا نَه عِلت وار
بُو دُخترتِ حیدرِ کَرّار دور، زَهرا قیزی زِینب
اِیکی نُورین عَظمدَن وِجودیندَه وَراثَت وار
اِیشیتجَک بُو سُوزی مَرجانه اُوغلی گَلدی گُفتاره
دِیدی یا زِینبا اللّهه حَمدِ بی نَهایت وار
دالنجا اُوزگه بیر سُوزدَه دِیدی، توضیحه مَعذورَم
قیزیشدی شیر تَک زَهرا قیزی گُوردی شَمادَت وار
دل آچدی شیرِ داور تَک دِیدی ای اِبنِ مَرجانه
خدایه حَمد اُولا بیزلَردَه تَکریم شَهادت وار
بیزَه نازِل اُولوب قرآن، بیزوق مِصداقِ کَرمِنّا
بیزه تَطهیریدَن قرآنِ مُنزَلدَه اِشارَت وار
نبُوّت بیزدَه دور، بیز خانوادَه مَعدَنِ وَحیُوق
کیمُون من تَک آتاسیندا شُئوناتِ اِمامَت وار
بیزیم دامانی میز لُوثِ مَعاصیدَن مُبرا دور
اُوزون اِنصاف اِیله سیزلَردَه دَه گُور بو لَیاقت وار
اُولار رُسوای فاسِق لَر، اُوداکی غِیری دور بیزدَن
اگر چه سَلطنَت وار ظاهراً سیزدَه خِلافَت وار
یالانچَی اِبنِ مَرجانه اُوزون سَن هم اَمیرون دور
سیزون آبا و اَجدا دوزدَه اوّلدَن لَئامَت وار
بُو سُوزلَر زادهء مَرجانه نی اِیلَه آلشدیردی
قَرالدی رَنگی گُویا صُورتیندَه حالِ رِحلَت وار
غَضَبدَن بُوینونین اَعصابِ شَریانی گِره لَندی
یوزیندَه ظاهر اُولدی دِلدَه هر بُغض و عَداوت وار
یِریندَن قاخدی فُوراً مُنتهای غِیظ و بُغضیلَه
با خون مَقتل لَره، هُمِ بَها عیناً عِبارت وار
بِیلَه مَعلوم اُولان زَهرا قیزین اِیستُوردی اُلدورسُون
خانیمدا گُور آتاسی مُرتضی تَک نه شُجاعَت وار
اُودا دوردی یِریندَن دشمنِ بی شَرمی قَصد اِیتدی
مُجسم اِیلَه سَن مَجلسدَه اُوضاعِ قیامَت وار
یازولا بیر بیریلَه قول قولا باغلیدی آل الله
هامی دوردی یِریندَن گُور نَه هِنگامَه نَه وَحشت وار
خانم قیزلار دوراندا مَجلس اَهلی بیر بیره دَگَدی
هامی دوردی، دِیمَه اَگلشماقا بیر کَسدَه طاقت وار
اَسیرِ سِلسلَه بیر سِلسلَه یانمیش تالانمیشلار
تَماماً دِلدَه وا غُوثا خیالِ اِستعانَت وار
هَمان هِنگامَه عُمرو اِبنِ حَریسی وَحشته سالدی
جَماعَتدَه گُوروب اِبنِ زیادَه فکرِ نِهضَت وار
دِیدی اِبنِ زیاده اِی اَمیر اُول بیر زَمان خامُوش
خیالوندَه اَگر بُو عُورَتَه فکرِ سیاست وار
مُجازات اِیلمزلَر عُورتی گُفتاریلَه خاصه
بیر عُورَت که اُونون قَلبیندَه یُوز داغِ مُصیبَت وار
گِیدوب قارداشلاری اَلدَن، اُولوب اُوغلانلاری مَقتُول
سُوزینده گُورمُوسَن قَلبی یانان شَخصه شَباهَت وار
دوباره تَختین اُوستوندَه اُوتوردی اِبنِ مَرجانه
دِیدی ساکت اُولون، حُضّاره اَمریندَه اِجابَت وار
او دَمدَه اِبنِ مَرجانَه نه گُوردی قارداشی عُثمان
اِیلَه آغلور که اَشکیندَه به سانِ سِیل سُرعَت وار
تَعجُب یُوز وِیروب اِیتدی او حالین سِرین اِستفسار
دِیدی قارداش مَنیم بو نالَه و دادیمدَه حِکمت وار
اُو عُورت که اُونی قَصد اِیلدون قَهراً دانشدیردون
اُونُون بُلمم بُو باشیلَه آراسندا نَه اُلفَت وار
اُونی سَن قَصد اِیدندَه بُو کَسُوک باش گُوزلَرین آچدی
سَراسَر مَجلسَه باخدی که گُور سُون نه حِکایَت وار
او قانیلَه دولان گُوزلَر باخوب حُضّارَه فَردَاً فَرد
یِتندَه زینبه حالیندَه گُوردی بَسکه خِفّت وار
یُومُوب قانلی گُوزین بیر قطره قانیاش عارضُه تُوکدی
گُورنمُور خوار عَیالین، گُور نه قدری بُوندا غِیرت وار
سَنی آلِ اُمیّه بیعتی اَل چَک او عُورتدَن
دانشدیرما بُو مَجلسدَه، گُورورسَن چوخ جَماعَت وار
او بی دین و شَقی گِیچدی اگر چه قَتلِ زِینبدَن
بیر آیری ظُلم اِیدوب توضیحی نَه کیمدَه جَسارَت وار
او ظالِم اُوچ اِمامین مَحضریندَه کُفر اِیدوب اِظهار
خیالَه سالمادی اَحکامِ قرآن وار، شَریعَت وار
آپارام سینه دَه قَبره او ظُلمی که اِیدوب حِجام
زیاد اُوغلیندا هِند اُوغلیندان آرتوخ بیر شَقاوَت وار
اَله آلدی حُسینون قانلی باشین باخدی بیر گُلدی
او قانلی باشدا اَصلاً باخمادی چوخ چوخ جَراحت وار
یارالی باشین الَده اُوینا دوردی اِبنِ مَرجانه
گِنه سُویلَردی باشوندا حسین فِکرِ رِیاسَت وار؟
دِیردون اِیتمَرم اَصلاً اَمیرِ کُوفیه بِیعت
عُبیداللّهیدَه بُلمُوردون اِستیلای بِیعت وار
اگر باش اَگمه سَن قانلی باشوندان اَخذِ کام اِیلَر
دِیمُوردون بُو قیامین آخریندَه قَتل و غارت وار
بُو باشوندور اَلیمدَه، بُو قُولی باغلی عَیالوندور
بُویُون لاردا دوشاخه، گُوزلریندَه اَشگِ حَسرت وار
حسین چُوخ تیز قُوجالدون، نُو جَوان قارداشلارون نُولدی
هانی گَلسُون اَبُوالفضلِ رشید و سَرو قامَت وار
نه زیبا دِیشلَرون وار، دُر تَک قانیلَه مَرجانی
مَنیمدَه چوبِ تَعلیمیم، قولیمدا زُور و ضَربَت وار
دِیوب گُلدی شَمادَتدَن، یُورولدی ظُلم اَلین آچدی
او ظالم باخمادی حَسرت باخان اَهلِ خدارت وار
نه جَدّیندَن اُوتاندی، نه حَیالی اَهلِ بِیتیندَن
گُوروب لَعلِ لَبیندَه آیهء ظُلمَه قَرائت وار
وُوروب تیغِ فَناریلَه او گُل تَک قانلی لَبلردَن
دَگُل جای عَجب، قَلبیندَه چون بی حَد قَساوَت وار
اُولیدون کاش یا زهرا او گُون حاضر او مَجلسدَه
گُوریدون اُوغلیوون باشیندا بیر جای سَلامت وار؟
دِییدون وُورما اَل، ساخلا، اُوتان ظالَم، حَیا اِیله
بُو لَبلَردَه گُورورسَن غُنچهء گُل تَک لَطافت وار
زِ بَس مَرجانه اُوغلی ظُلمیدَه اَندازه دَن گِیچدی
گُوروب زِید اِبنِ اَرقَم آز دایانسا چوخ نِدامت وار
بُو ظُلمِ بی نَهایَتدَن دوتوب اُود قَلبی اُودلاندی
گُوزیندَه اشگ، دِلدَه زِینبَه فِکر حِمایَت وار
دِیدی ای اِبنِ مَرجانه دایان، دور، بیر اَلون ساخلا
مَنه هر نه مُجازات اُولسا مَندَه اِستقامَت وار
اُوزوم گُوردوم او لَبلَردَن همیشه جَدّی پِیغمبر
اُوپُوب اِیگلَردی سُویلردی بالامدا عَطرِ جَنّت وار
اُوتانمُورسان پِیمبردَن زِنا کار عُورتین اُوغلی
نه قَدری سَندَه آیا کینهء خَتمِ رِسالت وار
یارالی باشی وُورمازلار، خُصوصاً بیر کَسُوک باش که
دِلیندَه دَم به دَم آیاتِ قرآنه تَلاوت وار
اِیشیتدی مَجلس اَهلی بُو سُوزی سَس چَکدی آغلاشدی
خانم قیزلار اُورکَلَندی گُورندَه قَصدِ نُصرَت وار
وِیروبلَر سَس سسَه سَس چَکدیلَر اَلغُوث یا جَدّا
اَمانَت قویدوقون اُولادَه گَل گُور نه خَیانَت وار
او حالَتدَن گِنه شَرم اِیتمدی وُوردی عُبیدالله
نه اَندازه گُورون قَلبیندَه زَنگِ کُفر و غَفلَت وار
دایاندی بیر یِره ظُلمی قَلم عاجِزدی شَرحیندَن
او ظُلمی که اُولوب تَقریرینَه دِلدَه صُعوبَت وار
داشوب دریایِ صَبرِ ذاتِ باری سِیّد سَجاد
گُوروبلَر وَجه وَجه اللّهیدَه آثارِ کُدورَت وار
عُروقِ هاشمیه سَجدَه گاهیندَه گِره لَندی
خیالیندَه یَقین تاُدیبِ اَتباعِ ضَلالَت وار
او قُطبِ عالَمِ اِمکان باخوب اِقطارِ آفاقه
دُعا قَصد اِیتمَه میش دَربارِ حَقدَه اِستجابَت وار
هُویدا طاقِ مَجلسدَن اُولوب بیر شُعلهء آتَش
قویُوب دور تَخته یُوز، گُوردی زیاد اُوغلی هَلاکت وار
دوروب قاچدی، قاچاندا نِطقَه گَلدی شاهِ دین باشی
مَهِ بُرجِ وَفادَه گُور نِجه نُورِ هِدایت وار
بُویُوردی یا عَدوّ الله قاچُورسان نارِ دنیادَن
دِیمُور سَن آخرت وار، نارِ دُوزخ وار، عُقوبَت وار
یِتر عُمریم تَمامه مَجلسِ کُوفه تَمام اُولماز
اَگر فِکریم بُو اُولسا نَظم اِیدم هر نَه رَوایت وار
#حسینی دور آدیم یا فاطمَه گَر چه گُنه کارَم
قیامَتدَه وَلی اُوغلوندان اُمّیدِ شَفاعَت وار
سَنی وِیرم قَسم اُوغلون حَسینه زِینبه لُطف اِیت
اَلیم بُوش دور باشیمدا لِیک سُودای زیارت وار
او تَحت قُبّه دَه بیر مَجلسِ ماتَم اِیدَم چیدَه
تَوَجُه اِیله سَن بَه بَه او ماتَمدَه نه لذّت وار
- شنبه
- 14
- مرداد
- 1402
- ساعت
- 22:21
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه