آناوی حالون ایدوب زار و پریشان یارالی
خانهء صبریم اولوب ظلمیله تالان یارالی
وورولوب سنگ جفا قلبوون آئینه‌سینه
آچولوب باب جفا دشمنوین کینه‌سینه
نجه دوزسون بو آنان کینهء دیرینه‌سینه
دیوه مغلوب اولوب جاه سلیمان یارالی
اونداکی لشکر اغیاری چکوردون محکه
گمانون گلمدی افسوس اوغول بیر کمکه
آناوون ناله‌سی تاثیر ایلییَر نُه فلکه
نالمه ناله چکر زُهره و کیوان یارالی
اورگون باشنی یاندوردی بو گون قوم دنی
اکبری قانینه گوزیاشه بویاندوروی سنی
زکریّا بوله گر بیله غم‌افزا محنی
چخادار محنت یحیاسینی یاددان یارالی
هر نفس سنله واریدیم بو اوزون یوللاری من
شاهدم قارداشوی دوغرادیلار قوم فتن
یانمشام حالوه اوپدوقجا کسیک قوللاری سن
نجه اولماز بس آنان دیده‌سی گریان یارالی
قوللاری اولدی قلم دوشدی یره صاحب‌عَلَم
او رسا قامتی بوکدی قدوی ایلدی خم
ایمدیده وار گل اوزونده اثر غصّه و غم
ایله بیر قارداشا آغلار هامی دوران یارالی
باشوون قانینه قاتدی بو قشون گوزیاشوی
اُلدوروب اوغلووی یولداشلارووی قارداشوی
اون ایکی ضربتیله شمر کسوبدور باشوی
ایلیوب زینبوی حالی پریشان یارالی
آناوون گوز‌یاشنی قهریله قان ایلدی شمر
چکمه‌لی سینوون اوستنده مکان ایلدی شمر
تازه‌دن اوخ یریوب، ظلمِ عیان ایلدی شمر
باشوی کسدی اولوب ظلمی دو چندان یارالی
باشه گلمز باشوون غملری ای بیکس اوغول
باشوی شمر کسندن دیمیوبدور بس اوغول
هر جفا بُلدی سنه ایلدی اول ناکس اوغول
آیئروب باشووی تا باشلانا طوفان یارالی
کوفیان مقتله گلدی هره بیر نیّتیله
هره بیر پای آپاروب جرئتیله غارتیله
کهنه پیراهنوی سویدولا چوخ زحمتیله
یوسفی تکله‌دیلر جرگهء گرگان یارالی
پیکرون محو ایده ایستوردی عمر‌سعد لعین
اون نفر امر اولونوب نعل‌لری تازه‌لسین
نعل‌لر تازه‌لنوب آتلارینی ایتدیله زین
لَحمون عَظمه قاریشا تاپدیلا امکان یارالی
ساربان گلدی گجه حقّی رعایت ایلدی
دوز چورک حقنی دانماقدا خباثت ایلدی
اللرون کسدی عجب جور و جنایت ایلدی
تازه‌دن مقتله گوردوم که آخور قان یارالی
سن جمال الله مظهرسن اوغول بو یوزوله
عِینِ عِینُ اللّهی تفسیر ایلوسن بو گوزوله
وصفون عارف ایلسون بولموری هانسی سوزوله
چوخ چتین وصفون اولا شرحیله تِبیان یارالی
دوزدی آی دورینی عادتله اوغول هاله آلار
هاردا آی ظلمیله آیا بیله احواله قالار
یوزوون هاله‌سی بو غمزده‌نی درده سالار
ایله بیر درد که اولماز اونا پایان یارالی
آچ گوزون ای یاراسی مرهمه حسرتده قالان
یاتما ای انفس و آفاقی غمی درده سالان
صبر ایّوبیسی ای صبرلری الدن آلان
صبریوه واله اولوب عالم امکان یارالی
گلمیشم سینمون اوسته یارالی باشون آلام
کوله باتمیش یاراوا گوز‌یاشی مرهمدی سالام
دردلریم چوخدی ولی دردلریوی جانه آلام
دیه‌سن جان آناجان منده دِیم جان یارالی
هانسی بیرحم سنی جبریله بو حاله سالوب
سنی بو حاله سالان من آناوون صبرین آلوب
حسرتیله بو سنان اَل اودی سینمده قالوب
یارالی سینمه گل، دردیمی بیر سان یارالی
ایله بیر شه که اولا زینت آغوش رسول
میهمان کیم ایلییَر ظلمیله مطبخده اوغول
قدروی بولمدیلر فرقهء اشرارِ جهول
بَلَدی گُل یوزوی کوللره دونان یارالی
بورویوب دست جفا دیده‌وی خاکستریله
احترامون قورویوب کولدن اولان بستریله
کول دولان گوزلریوی سیلّم اوغول معجریله
باخاسان گوزلریمه بلکه سن آسان یارالی
حشره تک محنتوی شرح ایلسه کلک #نگین
مین مصیبتدن اولانماز اولا بیر ذره یقین
وار امیدی ایلیاخ اجرینی پربار و وزین
الیمیزدن آلا تا تحفهء شایان یارالی
- شنبه
- 14
- مرداد
- 1402
- ساعت
- 22:28
- نوشته شده توسط
- یوسف اکبری
- شاعر:
-
مختار وطن پرست
ارسال دیدگاه