ای عالمینین سروری باشون ساغ اولسون
یا حجة ابن العسکری باشون ساغ اولسون
یالقیز قویوب لشکر بو گون بیکس حسینی
آغلاتدیلار پیغمبره نور دو عینی
عرشه دایاندی اهلبیتین شور و شینی
یا حجة ابن العسکری باشون ساغ اولسون
یکسر باتوب قانه جوانلاری حسینون
غلطان اولوبدور قانه انصاری حسینون
یتمیش نفردن قالمادی یاری حسینون
یا حجة ابن العسکری باشون ساغ اولسون
اُلدی حسینون آشناسی گولدی غیری
نه عابسی قالدی حسینون نه بُریری
قانه بویاندی عون و فضلیله زُهیری
یا حجة ابن العسکری باشون ساغ اولسون
قاندان خضاب ایتدی حسینون پیر حبیبی
گیتدی الیندن عاقبتده شیر حبیبی
چوخ حسرتیله اولدی جاندان سیر حبیبی
یا حجة ابن العسکری باشون ساغ اولسون
بیر طوی توتولدی قاسم داماده بو گون
گلدی ملک لر عرشده فریاده بو گون
ویردی عدو طوی حجله‌سین بر‌باده بو گون
یا حجة ابن العسکری باشون ساغ اولسون
لیلا جوانین یوللادی میدان رزمه
بیر شوقیله گیتدی گیدور گویا که بزمه
باخموب وجودین دوغرویار افواج گزمه
یا حجة ابن العسکری باشون ساغ اولسون
باشدان باشا شمشیریله دوغراندی یکسر
گل تک سریلدی توپراقا اول قانلو پیکر
یغدی عبایه پیکرین فرزند حیدر
یا حجة ابن العسکری باشون ساغ اولسون
بیر ظلم ایدوبدور حرمله حیراندی عالم
بو ظلمه آغلار حشر اولونجا نسل آدم
حلق علی کتف حسین اوخلاندی با هم
یا حجة ابن العسکری باشون ساغ اولسون
گورمز بو ظلمین مثلینی دور زمانه
اُلدورماقا سقانی مشک اولدی بهانه
مین لر خدنگه پیکری اولدی نشانه
یا حجة ابن العسکری باشون ساغ اولسون
باغلاندی یکسر یولّاری سردار دینین
دوشدی بدندن قولّاری غمخوار دینین
غم چولقادی اطرافنی سالار دینین
یا حجة ابن العسکری باشون ساغ اولسون
فریاد او وقتن شمر گلدی باش آپارسین
ابن زیاده اول باشی شاباش آپارسین
آز قالدی دنیانی او دم قانیاش آپارسین
یا حجة ابن العسکری باشون ساغ اولسون
باش گیتدی قالدی عترتی چوللرده یالقیز
اوتلاندی خیمه آغلادی هر یاندا بیر قیز
اول قیزلارین احوالینه آغلاردی اولدوز
یا حجة ابن العسکری باشون ساغ اولسون
غارت قوتاردی تا چکلدی قاره پرده
قاره گجه گل تک بدنلر قالدی یرده
چخدی سمایه قیزلارین فریادی بیرده
یا حجة ابن العسکری باشون ساغ اولسون
بیر یاری یانمش خیمه ده آغلاردی زینب
فریادینه گوی اهلنی داغلاردی زینب
هر دم ده بیر پاره قولاق باغلاردی زینب
یا حجة ابن العسکری باشون ساغ اولسون
شام غریبان اولجاقین قوپدی قیامت
گودالین ایچره اولدی بیر اوزگه جنایت
تاپدی حسینی ساربان ایتدی جسارت
یا حجة ابن العسکری باشون ساغ اولسون
بند زر اوسته اللرین کسدی حسینون
بیر زیور اوسته اللرین کسدی حسینون
اول پیکر اوسته اللرین کسدی حسینون
یا حجة ابن العسکری باشون ساغ اولسون
اوندان قاباق گودالین ایچره گلدی بجدل
گوردی گمانه تک گلن بیر اَلدی بجدل
کسدی کیچیک بارماقنی دینجلدی بجدل
یا حجة ابن العسکری باشون ساغ اولسون
یازما نگین زهرا گوزی آغلار قالوبدی
بو غملی نامه طاقتین دلدن آلوبدی
لیکن بو وردون قلبینه مرهم سالوبدی
یا حجة ابن العسکری باشون ساغ اولسون
- شنبه
- 14
- مرداد
- 1402
- ساعت
- 22:30
- نوشته شده توسط
- یوسف اکبری
- شاعر:
-
مختار وطن پرست
ارسال دیدگاه